Tau Salamo

7 IEHOVA na e haku Atua, ko koe ni kua tua au ki ai; kia fakamoui e koe au mai ia lautolu oti kua tutuli au, kia laveaki foki e koe au.

2 Neke hēhē au e ia tuga ne leona, neke malipilipi au, ka e nakai fakai taha ke laveaki mai.

3 Iehova na e, haku Atua, kaeke kua eke e au e mena ia; kaeke foki ha he tau lima haku ha mahani kelea;

4 Kaeke kua mahani kelea au ke he haku a kapitiga; kaeke foki kua moumou e au e tau mena he tagata ne fai fi teao kia au;

5 Kia tutuli au e ia ne fai fi mai, kia moua foki e ia au; kia holia foki e ia haku a moui ke he kelekele, mo e fakatoka haku a lilifu ke he efuefu. Sila.

6 Iehova na e, kia tu mai a koe ke he hāu a ita; kia tu ki luga a koe ha ko e ita ha lautolu ne favale mai kia au; kia ala mai a koe ha ko au ke he fakafiliaga ne kotofa e koe.

7 Ti agaagai a koe he fakapotopotoaga he tau motu; ti liu foki a koe ki luga ia lautolu ke he mena tokoluga.

8 To fakafili e Iehova e tau motu; Iehova na e, kia fakafili mai e koe au ke lata mo e haku a tututonu, mo e haku a mahani tonu ha ia au.

9 Kia fakaotioti la e kelea he tau tagata mahani kelea; ka kia fakatumau a ia ne tututonu; ha kua kumi loto mo e kumi manatu he Atua tututonu.

10 Ko e Atua, ko e haku akau punuti a ia, ko e fakamoui a ia he tau tagata kua tonu e tau loto.

11 Ko e Atua, ko e fakafili tututonu a ia; kua ita e Atua ke he tau aho oti kia ia kua mahani kelea.

12 Kaeke ke nakai mafoki mai a ia, ti fakamata ai e ia hana pelu; kua maloku tuai hana kaufana, mo e taute ai.

13 Kua taute atu foki e ia kia ia e tau kanavaakau ke mate ai; to eke e ia hana tau fana ke puho.

14 Kitiala, kua fitikeleu a ia ke he mahani hepehepe; kua fatu a ia ke he mahani kelea mo e fanau e pikopiko.

15 Ne eke e ia e luo, kua keli ni; ka e to a ia ke he luo ne eke e ia.

16 To liuaki ni hana kelea ke he hana ni a ulu; ti to foki hana favale ke he hana tumuaki ulu.

17 To fakaheke atu au kia Iehova ha ko e hana tututonu; ti lologo atu au ke he higoa a Iehova Mua ue atu.