2 Nofoaga he Tau Patuiki

5 KUA mau e tau gahua oti ne eke e Solomona ma e fale a Iehova; ti ta mai ai e Solomona e tau mena ne fakatapu ai he matua hana ko Tavita, ko e tau ario, mo e tau auro, mo e tau mena oti, ti tuku ai fakalataha mo e tau koloa he fale he Atua.

2 Ti fakapotopoto ai e Solomona e tau patu Isaraela, mo e tau tui oti he tau magafaoa, ko e tau iki he tau magafaoa he tau matua he fanau a Isaraela, i Ierusalema, ke ta hake ai e lautolu e puha he maveheaga a Iehova he maga a Tavita, ko Siona haia.

3 Ti fakapotopoto mai ai e tau tagata Isaraela oti ke he patuiki ke he galue, ko e fitu mahina haia.

4 Ne o mai e tau patu Isaraela oti; ti uta he tau tagata Levi e puha.

5 Ti ta hake e lautolu e puha, mo e fale uta fano he tutuutaaga, mo e tau mena tapu oti ne toka ai ke he fale uta fano, ne ta hake he tau ekepoa ko e tau tagata Levi e tau mena ia.

6 Ko e patuiki ko Solomona mo e fakapotopotoaga oti a Isaraela, ne fakapotopoto mai ai kia ia ki mua he puha, kua eke poa ai e lautolu ke he tau mamoe, mo e tau povi, nakai maeke ke talahau, ti nakai maeke ke totou ai, he loga lahi ni.

7 Ti uta he tau ekepoa e puha he maveheaga a Iehova, ke he mena ke toka ai a ia, ko e mena ke vagahau mai ai, ha ha he fale ko e mena tapu ue atu, ki lalo he tau tapakau he tau kerupi;

8 Ha ko e mena fofola ai he tau kerupi ha laua a tau tapakau ki luga he mena ne toka ai e puha; mo e fakamalu hifo ai he tau kerupi e puha mo e hana tau akau tauloto.

9 Kua fakaloa ai e lautolu e tau akau tauloto, ti kitia ai e tau potu akau he tau akau tauloto mai he puha ki mua he mena ke vagahau mai ai; ka e nakai kitia ki fafo; ti ha ha i ai ni, ke hoko mai ke he aho nai.

10 Nakai toka ai ha mena ke he puha, ka ko e tau lapa maka ne ua ne tuku ai e Mose i Horepa, he eke ai e Iehova e maveheaga mo Isaraela he o mai a lautolu i Aikupito.

11 Kua huhu mai e tau ekepoa he mena tapu, (ha ko e mena fakatapu ai e tau ekepoa oti ha ha i ai, nakai omaoma ai a lautolu ke he tau vahega;

12 Ko e tau tagata Levi foki ko lautolu ne uhu lologo, ko lautolu oti ni, ko Asafo, ko Hemana, ko Iutana, mo e tau tama tane ha lautolu, mo e tau matakainaga ha lautolu, ne tapulu ai a lautolu ke he ie lino, ha ha ia lautolu e tau kumepalo, mo e tau napeli, mo e tau kitara, ne tutu a lautolu ke he fahi uta he fatapoa, ne fakalataha foki mo lautolu e tau ekepoa ne taha e teau ti uafulu ia lautolu, ne ulo ai e tau pu;)

13 Ko lautolu ne ulo e tau pu, mo lautolu ne lologo kua tuga ne tagata tokotaha, ko e taha ni e leo he fakaheke atu mo e fakaaue atu ai a lautolu kia Iehova; ne lologo a lautolu fakalataha mo e tau pu ne ulo, mo e tau kumepalo, mo e tau akau fakatagi, mo e fakaheke atu a lautolu kia Iehova, kua pehe atu, Ha kua mitaki ni a ia, ha ko e mena tukulagi ni hana fakaalofa, Ti puke ai e fale ke he aolagi, ko e fale ni a Iehova,

14 Kua nakai maeke ke he tau ekepoa ke tutu ke fekafekau ai ha ko e aolagi; ha kua puke e fale he Atua ke he lilifu a Iehova.