2 Nofoaga he Tau Patuiki

7 KUA fakahiku e Solomona hana liogi, ti to hifo ai e afi mai he lagi, mo e fakaoti ai e poa huhunu mo e tau poa; kua puke foki e fale ke he lilifu a Iehova.

2 Kua nakai maeke foki ke he tau ekepoa ke huhu atu ke he fale a Iehova, ha kua puke e fale a Iehova ke he lilifu a Iehova.

3 Kua kitia he fanau a Isaraela oti e afi ne to hifo, mo e lilifu a Iehova ki luga he fale, ti fakaveveli fakafohifo ai a lautolu ke he tau maka tanaki mo laupapa, mo e hufeilo a lautolu, mo e fakaheke atu a lautolu kia Iehova, kua pehe atu, Ha kua mitaki ni a ia; ha ko e mena tukulagi ni hana fakaalofa.

4 Ti eke poa ai he patuiki katoa mo e motu oti, ki mua a Iehova.

5 Kua eke he patuiki ko Solomona e poa ko e tau povi ne uafulu e afe ti ua e afe, mo e tau mamoe ne taha e teau afe, ti uafulu e afe. Ne fakaulu pihia he patuiki mo e motu oti e fale he Atua.

6 Kua tutu atu e tau ekepoa oti ke lata mo e kotofaaga ha lautolu; ko e tau tagata Levi foki ha ha i ai e tau akau fakatagi a Iehova, ne eke he patuiki ko Tavita ke fakaheke atu ai kia Iehova, ha ko e mena tukulagi ni hana fakaalofa; ko e tau mena ia ne fakaheke atu ai a Tavita; kua ulo he tau ekepoa e tau pu ki mua ha lautolu, kua tutu ai foki a Isaraela oti.

7 Ne fakatapu foki e Solomona e lotopa ki loto ki mua he fale a Iehova; ha kua eke e ia ke he mena ia e tau poa huhunu, mo e gako he tau poa fakaaue, ha ko e fatapoa apa kula ne eke e Solomona nakai lata ia mo e tau poa huhunu mo e tau poa mena kai, mo e tau gako.

8 Ko e vaha ia ne eke ai e Solomona mo Isaraela oti fakalataha mo ia e galue, ko e fitu ni e aho, ko e fakapotopotoaga lahi ni, ne kamata mai he mena ne hu atu ai ki Hamato, ti liu mai ai he vailele a Aikupito, ti li mai ai he vailele a Aikupito.

9 Ko e aho valu ne eke ai e lautolu e fakapotopotoaga, ha ko e fitu ni e aho ne fakatapu ai e fatapoa, ti fitu foki e aho ne eke ai e galue.

10 Ko e aho uafulu ma tolu he fitu mahina ne fakafano atu e ia e motu ke o ke he tau fale ie ha lautolu, ne o a lautolu mo e olioli mo e loto fiafia ha ko e tau mena mitaki ne eke e Iehova kia Tavita, mo Solomona mo e hana motu ko Isaraela.

11 Kua oti he eke e Solomona e fale a Iehova, mo e fale he patuiki; ko e tau mena oti foki ne loto a Solomona ke eke ke he fale a Iehova mo e fale hana, ne eke ai e ia mo e monuina.

12 Ti fakakite mai ai a Iehova kia Solomona ke he po kua pehe mai kia ia, Kua fanogonogo au ke he liogi hau, mo e fifili ai e au e mena nai māku ke eke mo fale ke eke ai e tau poa.

13 Kaeke ke pāpā ai e au e lagi ke aua neke to e uha, kaeke foki ke poaki atu e au ke he tau he akava ke fakaoti ai e fonua, kaeke foki ke tuku atu e au e tatalu ke he hau a motu;

14 Kaeke ke fakatokolalo ai haku a motu kua ui ai ke he haku a higoa, mo e liogi a lautolu kia au, mo e kumi e lautolu au, mo e kumi e lautolu au, mo e liliu kehe a lautolu mo e tau mahani kelea ha lautolu, ti fanogonogo au mai he lagi, mo e fakamagalo e au ha lautolu e tau hala, mo e fakamaulu ai e au ha lautolu a tau motu.

15 Hanai, to kitekite atu haku tau mata, mo e hagao atu haku tau teliga ke he liogi ka eke ai ke he mena nai.

16 Ha kua fifili e au mo e fakatapu e au e fale nai, kia ha ha i ai tukulagi haku a higoa; to hagao atu foki ki ai haku tau mata mo e haku loto ke he tau aho oti.

17 Ka ko koe, kaeke ke faifano a koe ki mua haku, tuga ne faifano ai hau a matua ko Tavita, mo e eke e koe ke lata mo e tau mena oti ne poaki atu e au kia koe, mo e omaoma a koe ke he haku a tau fakatufono mo e haku a tau fakafiliaga;

18 Ti fakamau e au e nofoaiki he hau a kautu, ke lata mo e maveheaga ne eke e au mo e matua hau ko Tavita, kua pehe atu, Nakai vevehe kehe hau a fanau mo e pule kia Isaraela.

19 Ka ko e mena kaeke ke liliu kehe a mutolu, mo e tiaki e mutolu haku a tau fakatufono mo e haku a tau poaki, kua tuku atu e au ki mua ha mutolu, mo e o atu a mutolu mo e fekafekau atu a mutolu ke he tau atua kehe, mo e fakaveveli fakafohifo ai a mutolu kia lautolu;

20 Ti taaki e au a lautolu mai he kelekele haku ne foaki atu e au kia lautolu; ko e fale nai foki kua fakatapu ai ma e haku a higoa to liti atu e au mai mua haku, mo e eke e au ia mo kupu fakatai mo mena foki ke va ki ai ke he tau motu oti kana.

21 Ko e fale nai foki kua tokoluga, to eke mo mena ke ofo ai a lautolu oti ne o age ai, mo e pehe age a lautolu, Ko e ha ne eke pihia e Iehova ke he motu nai mo e fale nai?

22 Ti tali age ai a lautolu, Ha kua tiaki e lautolu a Iehova ko e Atua he tau matua ha lautolu, ko ia ne ta mai a lautolu he motu ko Aikupito, ne taofi ai foki e lautolu e tau atua kehe, mo e fakaveveli fakafohifo a lautolu kia lautolu, mo e fekafekau atu kia lautolu; ko e mena ia kua fakahoko ai e ia e malaia oti na kia lautolu.