Amosa

6 OI te fakaalofa kia lautolu kua mahani fakateaga i Siona, mo lautolu kua nonofo fakahanoa ke he mouga a Samaria, ko e tau tagata talahaua ke he tau motu ne mua, ne o ki ai e magafaoa a Isaraela.

2 Kia o atu a mutolu ki Kalene, ko e kitekite atu, ti o atu a mutolu ki Hamato lahi; ti o hifo ai a mutolu ki Kata he tau tagata Filisitia; kua mua kia e mitaki ha lautolu ke he tau kautu nai, po ke mua e lahi he kelekele ha lautolu ke he kelekele ha mutolu?

3 Ko lautolu ne manatu kua mamao e aho kelea, mo e fakatata mai e lautolu e nofoa ha i ai e favale;

4 Ko lautolu kua tatakoto ke he tau mo hega nifo elefane, mo lautolu kua tatakoto ke he tau mohega ha lautolu; mo e kai e lautolu e tau punua mamoe he fuifui mamoe, mo e tau punua povi mai he fale povi;

5 Ko lautolu kua lologo fakalataha mo e leo he napeli, mo e taute e lautolu e tau akau fakatagi ma lautolu, tuga a Tavita;

6 Ko lautolu ne inu uaina ke he tau kapiniu lalahi, mo e tākai ai a lautolu ke he puke lolo kua mua he mitaki; ka e nakai mamahi ai a lautolu ha ko e malaia a Iosefa.

7 Ko e mena ia to fakapaea atu a lautolu ainei mo lautolu ne o age fakamua ke he paeaaga, ti mole atu e kalaga fiafia ha lautolu ne tatakoto.

8 Kua pehe mai a Iehova ko e Atua Sapaota, Kua omonuo e Iki ko Iehova kia ia ni; Kua vihiatia e au e lilifu a Iakopo, kua fakavihia foki e au hana tau fale iki; ko e mena ia to tuku atu e au e maga katoa mo e tau mena ne puke ai.

9 Kaeke foki ke toe ai e tau tagata tokohogofulu ke he fale taha to mamate ni a lautolu.

10 Kua lagaaki ai e tagata he matakainaga he hana matua, ko ia foki ne huhunu a ia, ne ta mai ai e ia e tau hui atua hana he fale, ti pehe age a ia ke he tagata ha ha he mena ki tua i loto he fale, Kua ha i ai nakai taha mo koe? Ti tali age a ia, Nakai ni ha i ai taha, Ti pehe age a ia, Fakamate ā ha kua nakai lata ke totoku ai e higoa a Iehova.

11 Ha ko e mena, kitiala, kua poaki mai e Iehova ti tuki ai e fale lahi ke malŏlŏ ai, mo e fale tote ke maihiihi ai.

12 Kua tafepoi kia e tau solofanua i luga he kaumaka? po ke keli ai kia he taha ke he aroti mo e tau povi? ha kua liliu e mutolu e fakafiliaga ke eke mo mena kona, mo e tau fua he mahani tututonu ke eke mo laena.

13 Ko mutolu kua fiafia ke he mena noa, kua pehe mai, Nakai kia moua ai e tautolu ke he malolo ha tautolu e tau hoe ma tautolu?

14 Ko e hanai, kitiala, ko e magafaoa a Isaraela na e, to fakatu ai e au e taha motu ke fai fi kia koe, kua pihia mai a Iehova ko e Atua Sapaota; ti favale atu a lautolu kia mutolu ke kamata mai he puhala ne fina age ai ki Hamato, ke hoko atu ke he vailele he tutakale.