1 Samuela

8 KUA hoko ke he vaha ne motua ai a Samuela ti kotofa e ia hana tau tama tane ke eke mo tau fakafili i Isaraela.

2 Ko e higoa he hana tama uluaki ko Ioelu haia; ka ko o higoa he tama ne ua aki ko Avia; ti eke a laua mo tau fakafili i Peresepa.

3 Ka e nakai o hana tau tama tane ke he puhala hana, ne afe ni a laua he fia eke koloa, ti talia e laua e tau mena fakaalofa mo e fakakeukeu e laua e fakafiliaga.

4 Ti fakapotopoto ai e tau patu Isaraela oti, ti o age, a lautolu kia Samuela, i Rama.

5 Ti pehe mai a lautolu kia ia, Kitiala, kua motua tuai a koe, ko e hau a tau tama foki nakai o a laua ke he hau a puhala; hanai, kia fakatu e koe e patuiki ma mautolu, ke fakafili e ia a mautolu ke tuga ne tau motu oti.

6 Ka e kelea kia Samuela e tau kupu ha lautolu ne pehe mai, Ta mai la e patuiki ma mautolu ke fakafili a mautolu; ti liogi ai a Samuela kia Iehova.

7 Ti pehe mai a Iehova kia Samuela, Kia fanogonogo ā koe ke he kupu he motu ke he tau mena oti ne tala atu ai a lautolu kia koe; ha kua nakai tiaki e lautolu a koe, ka kua tiaki e lautolu au, ke nakai eke au mo patuiki ha lautolu;

8 Tuga ne tau mena oti ne eke e lautolu tali mai he aho ne ta hake ai e au a lautolu i Aikupito, ke hoko mai ke he aho nai, kua toka e lautolu au ka e fekafekau ai a lautolu ke he tau atua kehe, ti pihia foki he eke e lautolu kia koe.

9 Hanai, kia fanogonogo a koe ke he kupu ha lautolu; ka e tala age fakalahi a koe kia lautolu, mo e fakakite atu e koe kia lautolu e mahani he patuiki ke pule kia lautolu.

10 Ti talahau atu ai e Samuela e tau kupu oti a Iehova ke he motu ne ole mai kia ia ke fai patuiki;

11 Kua pehe atu, Ko e mahani he patuiki ke pule kia mutolu hanai; to uta e ia ha mutolu a tau tama tane ti eke e ia a lautolu mana ke he hana tau kariota, to eke foki mo kau heke solofunua hana; to tafepoi foki a lautolu ki mua hana tau kariota.

12 To kotofa foki e ia a lautolu mo tau iki he tau takiafe, mo tau iki foki he tau takilimagofulu; to kotofa foki e ia falu ke keli hana tau fonua, mo e helehele ai hana tau fua he kelekele; to taute foki e lautolu hana tau kanavakau ke tau, mo e tau mena ke taute aki hana tau kariota.

13 Ko e ha mutolu a tau tamafifine foki to uta e ia a lautolu ke eke e tau mena manogi, ke kai tunu, mo e taute areto.

14 Ko e tau fonua foki ha mutolu, mo e ha mutolu a tau uluvine, mo e ha mutolu a tau ulu olive ne mua he mitaki to uta ni e ia mo e ta age ke he hana tau fekafekau.

15 To uta foki e ia e mena ne hogofulu aki ha mutolu a tau fua mena mo e ha mutolu a tau uluvine, mo e ta age ke he hana tau fekafekau pule mo e hana tau fekafekau.

16 Ko e ha mutolu a tau fekafekau tane, mo e ha mutolu a tau fekafekau fifine, mo e ha mutolu a tau fuata mitaki, katoa foki mo e ha mutolu a tau asini, to uta e ia ke eke aki hana tau gahua.

17 To uta e ia e mena ne hogofulu aki ha mutolu a tau mamoe; ko mutolu foki, to eke a mutolu mo tau fekafekau hana.

18 Ti tagi ai a mutolu ke he aho ia ha ko e patuiki kua fifili e mutolu ma mutolu, ka e nakai fanogonogo mai a Iehova kia mutolu ke he aho ia.

19 Ka e nakai mafai e motu ke fanogonogo he ke he tau kupu a Samuela, kua pehe mai a lautolu, Nakai ni, ka to fai patuiki ni a mautolu;

20 Ke tuga ne tau motu oti a mautolu, kia fakafili he patuiki ha mautolu a mautolu; ke fina atu foki a ia ki mua ha mautolu, mo e tau a ia ke he tau tau ha mautolu.

21 Ne fanogonogo a Samuela ke he tau kupu oti ia he motu, ti vagahau atu ai e ia ke he tau teliga a Iehova.

22 Ti pehe mai a Iehova kia Samuela, Fanogonogo ā koe ke he tau kupu ha lautolu, ti kotofa ai e koe e patuiki ma lautolu. Ti pehe atu a Samuela ke he tau tagata Isaraela, kia takitokotaha a mutolu mo e fano ke he hana maga.