1 Samuela

7 Ti o age e tau tagata Kiriata-iarima, ti ta hake e lautolu e puhua a Iehova, ti uta ai e lautolu ke he fale a Apinatapu ke he mouga; ti fakatapu e lautolu a Eleasaro ko e tama hana ke leveki e puha a Iehova.

2 Ko e tau aho tali he toka ai e puha i Kiriata-iarima, ko e tau aho loga ni; ne uafulu ni e tau; ti tagi ai e magafaoa oti a Isaraela kia Iehova.

3 Ti talahau atu e Samuela ke he tau magafaoa oti a Isaraela, kua pehe atu, Kaeke kua liliu atu a mutolu kia Iehova mo e ha mutolu a tau loto katoa, ti tuku kehe ā ia mutolu e tau atua kehe katoa mo Asaira, ti tauteute ā e mutolu ha mutolu a tau loto ma Iehova, ti fekafekau atu a mutolu kia ia hokoia ni; ti laveaki mai e ia a mutolu he lima he tau tagata Filisitia.

4 Ti tuku kehe he fanau a Isaraela a Paala mo Asaira, ti fekafekau ai a lautolu kia Iehova hokoia.

5 Ne pehe atu foki a Samuela kia lautolu, Kia fakapotopoto mai e mutolu a Isaraela oti ki Misepa, ti liogi ai e au kia Iehova ma mutolu.

6 Ti fakapotopoto ai a lautolu i Misepa; ti utu vai e lautolu mo e liligi ai ki mua a Iehova, mo e fakakanopogi ai a lautolu ke he aho ia, ti pehe mai a lautolu, Kua hala a mautolu kia Iehova. Ti fakafili e Samuela e fanau a Isaraela i Misepa.

7 Ne logona he tau tagata Filisitia, kua fakapotopoto ai e fanau a Isaraela i Misepa, ti o hake ai e tau iki Filisitia ke tau mo Isaraela; ne logona ai he fanau a Isaraela ti matakutaku a lautolu he tau tagata Filisitia.

8 Ti pehe mai e fanau a Isaraela kia Samuela aua neke okioki a koe he ui atu kia Iehova ha tautolu a Atua ha ko mautolu, kia fakamoui e ia a mautolu mai he lima he tau tagata Filisitia.

9 Ti uta e Samuela e punua mamoe kai huhu, ti eke ai e ia e poa huhunu katoa kia Iehova; ti ui atu e Samuela kia Iehova ma Isaraela, ti fanogonogo mai a Iehova kia ia.

10 Ha ne eke e Samuela e poa huhunu ti fakatata mai e tau tagata Filisitia ke tau kia Isaraela; ti fakapaku mai ai e Iehova e lagi mo e paku lahi e lagi ke he aho ia ki luga he tau tagata Filisitia, ne fakamavehevehe ai e ia a lautolu, ti keli ai a lautolu ki mua a Isaraela.

11 Ti o atu e tau tagata Isaraela i Misepa, ti tutuli atu a lautolu ke he tau tagata Filisitia, mo e keli e lautolu a lautolu ke hoko ki lalo hifo a Peteka.

12 Ti uta e Samuela taha maka, ti to ai e ia ke he vaha a Misepa mo Sena, ti ui ai e ia hana higoa ko Epenesa, kua pehe a ia, Kua lagomatai mai e Iehova kia tautolu, kua hoko mai ke he aho nai.

13 Ti fakatokolalo ai e tau tagata Filisitia, nakai tuai o hake a lautolu ke he kelekele a Isaraela; ti ha i luga he tau tagata Filisitia e lima a Iehova ke he tau aho oti a Samuela.

14 Ti liu aki mai kia Isaraela e tau maga ne fofo he tau tagata Filisitia mai ia Isaraela, ke kamata mai i Ekerona ke hoko atu ki Kata, ti fofo e Isaraela ha lautolu a kelekele mai he tau lima he tau tagata Filisitia. Ti mafola a Isaraela mo e tau tagata Amori.

15 Ne fakafili e Samuela a Isaraela ke he tau aho oti he hana moui.

16 Ne fano a ia ke he taha tau mo e taha tau, ti takai ai a ia ki Peteli, mo Kilikala, mo Misepa; ti fakafili ai e ia a Isaraela ke he tau maga oti ia.

17 Ti liu mai a ia ki Rama, ha ko e mena ha i ai ke he mena ia hana fale; ti fakafili ai e ia a Isaraela ke he mena ia, ti ati ai foki e ia e fatapoa kia Iehova.