Tau Salamo

45 KUA puna hake mai hoku loto e tau kupu mitaki, kua vagahau au ke he tau mena kua eke e au ma e Patuiki; ko e haku alelo ko e peni ia he tagata tohikupu lima vave.

2 Kua mua hau a fulufuluola ke he fanau he tau tagata, kua maligi hifo he hau a tau laugutu e tau kupu fakaalofa; ko e mena ia kua fakamonuina ai he Atua a koe tukulagi.

3 Kia pipi e koe hāu a pelu ke he hāu a hui, ko koe na ko e toa ko e hāu a fakahekeaga mo e hāu a lilifu.

4 Ko e hāu a lilifu foki kia heke ai e koe e manu, mo e monuina ai a koe, ha ko e tonu, mo e mahani molu, mo e tututonu; to fakaako foki a koe he hāu a lima matau e tau mena ke matakutuku ai.

5 Kua matila hāu a tau fana; to veveli e lanu tagata ki lalo ia koe; to tuina ai e tau loto ha lautolu kua fai fi ke he Patuiki.

6 Ko e Atua na e, to tukulagi tukumuitea e nofoaiki hāu, ko e tokotoko foki he hāu a kautu ko e tokotoko he tututonu ia.

7 Kua finagalo a koe ke he tututonu ka e vihiatia e koe e mahani kelea; ko e mena ia kua fakauku ai a koe he Atua, ko e hāu a Atua ni, ke he lolo he fiafia, he mua ni a koe ke he hāu a tau matakainaga.

8 Ko e hau a tau tapulu oti, ko e muro ia, mo e aloe, mo e kesia, mai he tau fale iki kua eke he tau hoe elefane, kua fakafiafia ai e lautolu a koe.

9 Kua fakalataha e tau tamafine he tau patuiki, mo lautolu kua fakahelehele e koe, kua tu mai e patuiki fifine ke he hāu a fahi matau; kua tapulu a ia ke he auro mitaki mai Ofaira.

10 Kia fanogonogo mai a koe, ko e tamafine na e, mo e kitekite, mo e haga mai hāu a na teliga; kia fakanimonimo foki e koe hāu a motu, mo e faoa he hāu a matua.

11 Kia manako ai e Patuiki ke he hāu a fulufuluola; ha ko ia ni ko e hāu a Iki, kia hufeilo a koe kia ia.

12 To hau e tamafine ko Turo, mo e mena fakaalofa to olelalo atu kia koe e tau maukoloa he motu.

13 Kua fulufuluola lahi i loto e tamafine he Patuiki; kua taute hana tapulu ke he auro.

14 To takitaki a ia ke he Patuiki mo e hana tau tapulu kilakila kehe; ko e hana tau kapitiga ko e tau tamafine kua mumui ke he tua hana, kua takitaki mai a lautolu kia koe.

15 To takitaki a lautolu mo e fiafia mo e olioli; to huhū atu a lautolu ke he fale he Patuiki.

16 To hukui ni hāu a tau matua he hāu a tau aloalomanava; to kotofa a lautolu mo tau iki ke he lalolagi oti.

17 To tokutoku atu e au hāu a higoa ke he tau hau oti kana; ko e mena ia ke fakaheke atu ai e tau motu kia koe tukulagi tukumuitea.