Ieremia

35 KO e kupu ne hoko mai ia Iehova kia Ieremia, ke he vaha ia Iehoakima ko e tama a Iosia ko e patuiki a Iuta, kua pehe mai,

2 Kia fano a koe ke he magafaoa he tau tagata Rakapā, mo e vagahau atu a koe kia lautolu, ti ta mai e koe a lautolu ke he fale a Iehova, ke he taha poko, mo e ta age e koe kia lautolu e uaina ke inu.

3 Ti uta ai e au a Iaasenaia ko e tama a Ieremia, ko e tama a Havasinia, mo e hana tau matakainaga, mo e hana tau tama tane oti, mo e magafaoa oti he tau tagata Rakapā,

4 Ti ta mai e au a lautolu ke he fale a Iehova, ke he poko he tama a Hanana ko e tama a Iketalia, ko e tagata he Atua, ne katofia mo e poko he tau iki, ne ha i ai i luga he poko he tau iki, ne ha i ai i luga he poko a Maaseia ko e tama a Saluma, ko e leoleo he gutuhala;

5 Ti fakatoka e au ki mua he fanau he magafaoa he tau tagata Rakapā e tau kapiniu hokulo kua puke he uaina, mo e tau kapiniu ke inu ai; ti pehe atu au kia lautolu, Kia inu uaina ā mutolu.

6 Ka e pehe mai a lautolu, Nakai inu uaina a mautolu; he poaki mai kia mautolu e Ionatapu ko e tama a Rakapā ko e ha mautolu a matua tane kua pehe mai, Aua neke inu uaina a mutolu mo e ha mutolu a fanau ke hoko ke he tukulagi;

7 Ti ua ta fale e mutolu, ti ua gana saito e mutolu, aua foki neke to e mutolu e tau ulu vine, ti aua neke ha ha ia mutolu e tau mena ia; ka kia nonofo a mutolu ke he tau fale ie ke he tau aho oti ha mutolu; kia loga ha mutolu a tau aho ke momoui ai ke he fuga kelekele kua nonofo paea ai a mutolu.

8 Kua omaoma a mautolu ke he tau kupu a Ionatapu ko e tama a Rakapā, ko e ha mautolu a matua tane, ke he tau mena oti ne poaki mai ai e ia kia mautolu, ke aua neke inu uaina ke he tau aho oti ha mautolu, ko mautolu, mo e ha mautolu a tau hoana, ko e ha mautolu a tau tama tane foki, mo e ha mautolu a tau tama fifine;

9 Aua foki neke ta fale e mautolu ke nonofo ai; nakai ha ha ia mautolu foki e tau ulu vine, po ke tau fonua, po ke tau fua saito;

10 Ka kua nonofo a mautolu ke he tau fale ia; kua omaoma a mautolu, mo e eke ai e mautolu ke lata mo e tau mena oti ne poaki mai e Ionatapu ko e ha mautolu a matua tane kia mautolu.

11 Ne hoko foki ke he vaha ne hake mai ai e patuiki a Papelonia ko Nepukanesa ke he motu, ti pehe a mautolu, Kia o mai a, kia o a tautolu ki Ierusalema ha ko e kau a Kaletaia, mo e kau a Suria, ko e mena ia kua nonofo a mautolu i Ierusalema.

12 Ti hoko mai ai e kupu a Iehova kia Ieremia, kua pehe mai,

13 Kua vagahau mai pehe a Iehova Sapaota, ko e Atua a Isaraela, Kia fano ā koe, mo e pehe atu ke he tau tagata Iuta, mo lautolu ne nonofo i Ierusalema, Nakai kia talia e mutolu e tau mena ne fakaako atu, kia fanogonogo a mutolu ke he haku a tau kupu? kua pihia mai a Iehova.

14 Ko e tau kupu a Ionatapu ko e tama a Rakapā, ne poaki atu e ia ke he hana tau tama tane, ke aua neke inu uaina, kua fakamoli ni, kua nakai inu uaina a lautolu ke hoko mai ke he aho nai, ha kua omaoma a lautolu ke he poaki he matua tane ha lautolu; ka ko au nai, kua vagahau atu e au kia mutolu, kua uhu matike ni au mo e vagahau atu; ka e nakai fanogonogo mai a mutolu kia au.

15 Kua fakafano atu foki e au haku a tau fe kafekau oti ko e tau perofeta, ne uhu matike au mo e fakafano atu a lautolu, kua pehe atu, Kia liliu mai ā mutolu takitaha e tagata mai he puhala kelea hana, kia taute e mutolu ha mutolu a mahani ke mitaki, aua foki neke mumui atu a mutolu ke he tau atua kehe ke fekafekau ki ai, ti nonofo ai a mutolu ke he kelekele ne foaki atu e au kia mutolu mo e ha mutolu a tau matua; ka e nakai haga mai a mutolu ha mutolu a tau teliga, mo e nakai fanogonogo mai a mutolu kia au.

16 Ha kua eke he tau tama a Ionatapu ko e tama a Rakapā e tau poaki he matua tane ha lautolu ne poaki atu e ia kia lautolu; ka ko e motu nai kua nakai ni fanogonogo mai a lautolu kia au;

17 Ko e mena ia kua pehe mai e vagahau a Iehova, ko e Atua Sapaota, ko e Atua a Isaraela, Kitiala, to fakahoko e au kia Iuta, mo lautolu oti kua nonofo i Ierusalema, e malaia oti ne vagahau atu e au ke hoko kia lautolu; ha kua vagahau atu e au kia lautolu, ka e nakai fanogonogo mai a lautolu; ne ui atu foki au kia lautolu, ka e nakai tali mai ai a lautolu.

18 Kua pehe atu foki a Ieremia ke he magafaoa he tau tagata Rakapā, Kua pehe mai a Iehova Sapaota, ko e Atua a Isaraela, Kua omaoma a mutolu ke he poaki a Ionatapu ha mutolu a matua, mo e taofi e mutolu hana tau poaki oti, mo e eke e mutolu ke lata mo e tau mena oti ne poaki mai e ia kia mutolu;

19 Ko e mena ia kua pehe mai e kupu a Iehova Sapaota, ko e Atua a Isaraela, Nakai vevehe kehe ai e fanau a Ionatapu ko e tama a Rakapā, ka e tutu ai hana tau tagata ki mua haku ke he tau aho oti ni.