1 Tesalonia

2 HA ko mutolu ni, ko e tau matakainaga na e kua iloa e mutolu ha mautolu a hohoko atu kia mutolu, nakai ko e mena teao ia;

2 Ka e pete ni he fakamamahi fakamua a mautolu, mo e fakakeleaina i Filipi, tuga he iloa e mutolu, ka e fakamalolo a mautolu ha ko e Atua ha tautolu ke vagavagahau atu kia mutolu e vagahau mitaki he Atua mo e tau lahi.

3 Ha ko e tomatoma ha mautolu kia mutolu, nakai eke ia mo e hehe, po ke mahani kelea, po ke fakavai.

4 Ka e tuga ne lata a mautolu ke he finagalo he Atua ke tuku mai kia mautolu e vagahau mitaki, kua pihia foki ha mautolu a vagahau atu ai; nakai ke fakafiafia e tau tagata, ka ko e Atua, ko ia kua kamatamata mai ha mautolu a tau loto.

5 Ha ko e mena nakai fakai a mautolu ke eke ha kupu ke fakaheke atu ai, tuga he iloa e mutolu, po ke eke ha ufiufi he velevelemena; kua fioia he Atua;

6 Ti nakai kumi foki e fakahekeaga mai he tau tagata, po ko mutolu, po ke falu a tagata, pete ni he maeke ia mautolu ke fakamamafa atu kia mutolu ha ko e tau aposetolo a Keriso a mautolu.

7 Ka kua mahani molu a mautolu he nofo ai a mautolu ia mutolu, tuga ne fifine fakahuhu tama kua leveki fakamitaki hana ni a fanau.

8 Ne hofihofi pihia ha mautolu a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu.

9 Ha kua nakai nimo e mutolu, ko e tau matakainaga na e, ha mautolu a gahua mamafa, mo e mamahi, he gahua ai a mautolu ke he po katoa mo e aho neke fakamamafa kia taha ia mutolu, ne fakamatala atu ai e mautolu kia mutolu e vagahau mitaki he Atua.

10 Kua iloa e mutolu katoa mo e Atua, ha mautolu a mahani Atua, mo e tututonu, mo e nakai maeke ke talahaua kelea, ka kua nonofo a mautolu ia mutolu kua tua.

11 Tuga ne iloa foki e mutolu, ne mahani a mautolu kia mutolu takitokotaha tuga ne matua tane ke he hana fanau, he tomatoma atu a mautolu kia mutolu, mo e fakamafana atu, mo e talahau atu kia mutolu,

12 Kia o fano a mutolu ke lata mo e Atua, ko ia ne ui kia mutolu kia o ke he hana kautu mo e hana monuina.

13 Ko e mena ia kua fakaaue atu foki a mautolu ke he Atua nakai noa, ha kua talia e mutlou e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua, (ko e moli ni haia,) kua gahua ai ni i loto ia mutolu kua tua.

14 Ha ko e mena, ko e tau matakainaga na e, kua fifitaki a mutolu ke he tau ekalesia he Atua i Iutaia ha ha ia Keriso Iesu; ha kua mamahi foki a mutolu he tau mena ne eke he tau tagata he motu ha mutolu, tuga ne mamahi foki a lautolu he tau tagata Iutaia;

15 Ko lautolu ne kelipopo e Iki ko Iesu, katoa mo e tau perofeta ha lautolu, ne favale mai foki a lautolu kia mautolu; kua nakai fiafia e Atua kia lautolu, ti kua eke foki e tau tagata oti mo tau fi ha lautolu;

16 Kua hataki mai kia mautolu, ua vagahau atu a mautolu ke he tau motu kehe ke momoui ai a lautolu, kia fakakatoatoa ai e lautolu nakai noa ha lautolu a tau hala; ka kua hoko kia lautolu e ita ke fakaotioti aki.

17 Ka ko mautolu, ko e tau matakainaga na e, kua vevehe kehe mo mutolu ke he magaaho tote, ke he tino ka e nakai ko e loto, kua au atu ai ha mautolu a fakamalolo mo e manako lahi ni ke fekitiaaki a tautolu mo mutolu.

18 Ko e mena ia ne fia o atu ai a mautolu kia mutolu, ko au ni ko Paulo, kua laga taha mo e laga ua, ka kua fakalekua a mautolu e Satani.

19 Ha ko e heinoa kia ha mautolu a amaamanaki, mo e hula, mo e foufou ke olioli ai? Nakai kia ko mutolu ki mua he Iki ha tautolu ko Iesu Keriso ke he hana haele mai?

20 Ha ko mutolu, ko e fakahekeaga ha mautolu ia, mo e ha mautolu a fiafia.