1 Tesalonia

3 KO e mena ia, ne mitaki ai kia mautolu ke toka a mautolu hoko mautolu i Atenai, ha kua nakai tuai maeke ke fakauka,

2 Ti fakafano atu e mautolu a Timoteo ko e matakainaga ha mautolu, ko e fekafekau he Atua, mo e ha mautolu a lagomatai ke he vagahau mitaki a Keriso, kia fakatumau ai e ia a mutolu, mo e tomatoma a ia kia mutolu ke he tua ha mutolu;

3 Neke fagahuatia taha he tau mena matematekelea nai; ha kua iloa e mutolu kua kotofa kia tautolu e tau mena ia ni.

4 Ha ko e vaha ia ni ne nofo ai a mautolu ia mutolu ne tala atu fakamua ai e mautolu kia mutolu to hohoko mai ni e tau mena matematekelea, kua hoko mai tuai pihia, ti kua iloa foki e mutolu.

5 Ko e mena ia kua nakai tuai maeke ia au ke fakauka, ti fekau atu ai e au kia iloa ai ha mutolu a tua, neke kamatamata a mutolu e ia kua kamatamata, ti eke ai ha mautolu a gahua mo mena nakai aoga.

6 Ka ko e ainei, kua hau tuai a Timoteo kia mautolu mai ia mutolu, kua ta mai foki e tala mitaki ke he tua ha mutolu, mo e fakaalofa ha mutolu, mo e ha mutolu a manatu mitaki mai kia mautolu nakai noa, kua manako lahi foki a mutolu ke fekitiaaki a tautolu mo mutolu, ti pihia foki ha mautolu a manako kia mutolu;

7 Ko e mena ia, ko e tau matakainaga na e, ne fakamafanatia ai a mautolu mai ia mutolu, ke he tau mena matematekelea oti kana ha mautolu, katoa mo e ha mautolu a mamahi, ha ko e tua ha mutolu.

8 Ha kua momoui tuai a mautolu a enei, kaeke ke tumau a mutolu ke he Iki.

9 Ha ko e heinoa kia e fakaaue kua maeke ia mautolu ke tuku atu ke he Atua ha ko mutolu, ha ko e fiafia oti kua fiafia ai a mautolu ha ko mutolu ki mua he Atua ha tautolu?

10 Kua ole atu fakalahi e mautolu ke he po katoa mo e aho kia kitia e mautolu e tau mata ha mutolu, mo e fakakatoatoa ai e tau mena nakai la katoa ke he tua ha mutolu.

11 Ka ko e Atua ni, ha tautolu a Matua, katoa mo e Iki ha tautolu ko Iesu Keriso, to takitaki e ia ha mautolu a fenoga kia mutolu.

12 Kia fakalahi he Iki a mutolu, mo e fakatupu lahi ni ha mutolu a fakaalofa ko e taha, kia taha, katoa mo e tau tagata oti, tuga a mautolu nai foki kia mutolu;

13 Kia fakatumau ai ha mutolu a tau loto, kia nakai maeke ke talahaua kelea a mutolu ke he mahani mitaki ki mua he Atua ha tautolu a Matua, ka haele mai e Iki ha tautolu ko Iesu Keriso, katoa mo e hana tau fekafekau tapu oti kana.