Numera

13 KUA vagahau mai foki a Iehova kia Mose, kua pehe mai,

2 Kia fakafano atu e koe e tau tagata kia toko atu e lautolu ke he motu ko Kanana ke foaki atu ai e au ke he fanau a Isaraela ko e takitaha e tagata ke he magafaoa he ha lautolu a tau matua ke fakafano atu ai, ko e tau iki a lautolu oti kia lautolu.

3 Ti fakafano atu ai e Mose a lautolu he tutakale ko Parana tuga ne kupu a Iehova; ko e tau tagata oti ia ko e tau iki ni a lautolu he fanau a Isaraela.

4 Ko e tau higoa foki ha lautolu hanai, ko Samua ko e tama a Sakuro, ma e magafaoa a Reupena haia.

5 Ko Safata ko e tama a Holi, ma e magafaoa a Simeona haia.

6 Ko Kalepa ko e tama a Iefuna, ma e magafaoa a Iuta haia.

7 Ko Ikalo ko e tama a Iosefa, ma e magafaoa a Isakara haia,

8 Ko Hosea ko e tama a Nuno, ma e magafaoa a Efaraimo haia.

9 Ko Paleti ko e tama a Rafo, ma e magafaoa a Peniamina haia.

10 Ko Katieli ko e tama a Soti, ma e magafaoa a Sepulona haia.

11 Ko e magafaoa a Iosefa; ko Kati ko e tama a Susi, ma e magafaoa a Manase haia.

12 Ko Amielu ko e tama a Kameli, ma e magafaoa a Tano haia.

13 Ko Seturo ko e tama a Mekaeli, ma e magafaoa a Asera haia.

14 Ko Naepi ko e tama a Vapesi, ma e magafaoa a Nafatali haia.

15 Ko Keueli ko e tama a Maki, ma e magafaoa a Kato haia.

16 Ko e tau higoa hanā he tau tagata ne fakafano atu e Mose ke toko atu ke he motu. Ti ui ai e Mose a Hosea ko e tama a Nuno ko Iosua.

17 Kua fakafano atu e Mose a lautolu ke toko atu ke he motu ko Kanana, kua pehe atu foki a ia kia lautolu, Kia o hake a mutolu ke he puhala nai ke he fahi toga mo e hake ai ke he mouga;

18 Ti kitekite a mutolu ke he kelekele po ke fefe ia, mo e tau tagata kua nonofo ai, po ke malolo a lautolu po ke lolelole, po ke tokogahoa a lautolu po ke tokologa;

19 Po ke fefe foki e kelekele kua nonofo ai a lautolu, po ke mitaki po ke kelea, po ke fefe foki e tau maga kua nonofo ai a lautolu, po ke nonofo ke he tau heagaapi po ke nonofo ke he tau taue;

20 Po ke fefe foki e kelekele, po ke talumelie po ke talue; po ke fai akau po ke nakai; kia fakamalolo a mutolu, ti ta mai ai foki e mutolu e tau fua he kelekele. Ko e tau aho foki ia he tau fua uluaki he tau vine.

21 Ti o hake a lautolu, mo e toko atu ke he motu, ne kamata mai he tutakale ko Tisina ti hoko atu ki Rehopo ne fina atu ai ki Hamato.

22 Ne o hake a lautolu ke he fahi toga ti hohoko atu a lautolu ki Heperona, ha ha i ai a Aimano, mo Sesai, mo Talemai, ko e fanau a Anaki a lautolu, ne ati ai a Heperona, ti fitu ni e tau to ati ai a Soana i Aikupito.

23 Kua hoko foki a lautolu ke he vailele ko Esekolo, ti hahala mai ai e lautolu e la vine mo e taha fuhi vine, ti tauloto ai he tokoua ke he akau, ti ta mai ai foki e lautolu e tau fua rimoni mo e tau fua mati.

24 Ti ui ai e mena ia ko e vailele a Esekolo, ha ko e fuhi vine ne hahala mai ai he fanau a Isaraela.

25 Kua mole atu e tau po ne fagofulu ti liliu mai ai a lautolu he toko ke he motu.

26 Kua liliu mai a lautolu ti o mai ai a lautolu kia Mose mo Arona, mo e fakapotopotoaga oti he fanau a Isaraela ke he tutakale ko Parana, ki Katesa; ti ta mai ai e lautolu e tala ke he motu ia ke he fakapotopotoaga oti, mo e fakakite mai e lautolu kia lautolu e tau fua he kelekele.

27 Ti tala mai e lautolu kia ia, kua pehe mai, Ne hohoko atu a mautolu ke he motu ne fakafano atu a mautolu ki ai, ko e moli foki kua tafe ai e puke huhu mo e meli, ko e hana tau fua foki hanā.

28 Ka e pete ia kua malolo ni e tau tagata kua nonofo ke he motu, ko e tau maga foki kua puipui ni ke he pa, to lalahi mahaki ni; ne kitia e mautolu ke he mena ia e fanau a Anaki.

29 Kua nonofo ai e tau tagata Amaleka ke he motu ke he fahi toga; ko e tau tagata Heti foki, mo e tau tagata Iepusi, mo e tau tagata Amori, kua nonofo a lautolu ke he tau mouga; ko e tau tagata Kanana foki kua nonofo a lautolu ki tahi katoa foki mo e fahi ne ha i ai a Ioritana.

30 Ti hataki e Kalepa ke he motu ke ua fai kupu a lautolu ki mua a Mose, kua pehe atu, Kia o hake a tautolu ki ai mo e eke ai e motu ma tautolu, ha ko e mena maeke ni a tautolu ke kautu ai.

31 Ti pehe age e tau tagata ne o hake mo ia, Nakai maeke a tautolu ke o hake ke tau mo e motu na; ha ko e mena mua e malolo ha lautolu ke he malolo ha tautolu.

32 Ti ta mai e lautolu e ogo tamaki he motu ne o a lautolu ke toko ki ai ke he fanau a Isaraela, kua pehe mai, Ko e motu ne o atu a mautolu ke toko ki ai, ko e motu ni kua fakaotioti a lautolu kua nonofo ai; ko e tau tagata oti foki ne kitia e mautolu ko e tau tagata lalahi ni a lautolu.

33 Ne kitia ai foki e mautolu e tau tagata makimaki, ko e fanau a Anaki, ne tutupu mai he tau tagata makimaki; ti tuga ni e tau he a mautolu ke he manatu ha mautolu, ti pihia foki a mautolu ke he manatu ha lautolu.