Ioane

21 KUA mole e tau mena ia, ti kua liu foki a Iesu fakakite atu e ia a ia ke he tau tutaki ke he vai ko Tiperia; kua fakakite pehe a ia.

2 Ne fakalataha a Simoa Peteru mo Toma ne higoa ko Titumo, mo Natanielu ko e Kana i Kalilaia, mo e tau tama a Sepetaio, mo e falu a tutaki hana ne tokoua.

3 Kua tala age a Simona Peteru kia lautolu, Ko e fano ne fai au ke takafaga. Kua pehe mai a lautolu kia ia, Ke o foki a tautolu mo koe. Kua o atu a lautolu; ti hake agataha ke he foulua, ka e nakai moua ha mena he po ia.

4 Kua hoko ni ke he pogipogi, kua tu a Iesu ke he kauvai, ka e nakai iloa he tau tutaki, ko Iesu haia.

5 Ti tala age ai a Iesu kia lautolu, Ma fanau na e, fai kina nakai a mutolu? Kua tala mai a lautolu kia ia, Nakai.

6 Kua tala age a ia kia lautolu, Ati liti a e kupega ke he fahi katā he vaka, to moua ai e mutolu. Ati liti ai a lautolu, ti nakai tuai maeke ia lautolu he toho hake, ha ko e tau ika kua loga.

7 Ati tala age ai e tutaki ia ne ofania e Iesu kia Peteru, ko e Iki haia. Kua logona e Simona Peteru, ko e Iki haia, ti tapulu ai a ia he hana tapulu, ha ko e mena nakai tapulu a ia; ti hopo ni ke he vai.

8 Ka e o mai e falu a tutaki he vaka tote, ha ko e mena nakai vaha mamao mo uta, na kua ua a geau a kupita; kua toho mai e kupega mo e tau ika.

9 Kua hiki hake ni a lautolu, ati kitia ai e afi kaka, mo e ika foki kua fakatoka ai, mo e areto.

10 Kua tala age a Iesu kia lautolu, Ta mai a e falu a ika ne moua mai nai e mutolu.

11 Ati fina age ai a Simona Peteru, mo e toho mai e kupega ki uta, kua puke ke he tau ika lalahi; taha e teau ti limagofulu ma tolu; pete he loga pihia e tau ika, ka e nakai mahe ni e kupega.

12 Kua tala age a Iesu kia lautolu, O mai a, ke kai mena; ka e nakai fakamalolo taha he tau tutaki ke hūhu age kia ia, Ko hai kia a koe? ha ko e mena kua iloa e lautolu, ko e Iki ni a ia.

13 Ati haele age ai a Iesu, kua toto e areto, mo e age kia lautolu; ti pihia ni mo e ika.

14 Ko e fakakite lagatolu mai haia a Iesu ke he hana tau tutaki, tali he matike mai a ia ia lautolu kua mamate.

15 Kua oti foki he kai mena a lautolu, ati pehe age ai a Iesu kia Simona Peteru, Ma Simona na e, ko e tama a Iona, kua mua nakai hau a fakaalofa kia au kia lautolu nei? Kua pehe mai a ia kia ia, E, ma Iki na e, kua fioia e koe, kua fakaalofa au kia koe. Ati tala age ai a ia kia ia, Kia fagai e koe haku a tau punua mamoe.

16 Kua tala age a ia kia ia, ko e lagaua ia, Ma Simona na e, ko e tama a Iona, kua fakaalofa mai nakai a koe kia au? Kua tala age a ia kia ia, E, ma Iki na e, kua fioia e koe kua fakaalofa au kia koe. Ati tala age ai a ia kia ia, Kia leveki e koe haku a tau mamoe.

17 Kua tala age lagatolu a ia kia ia, Simona na e, ko e tama a Iona, kua fakalofa mai nakai a koe kia au? Kua momoko a Peteru, ha kua lagatolu he tala mai kia ia, Kua fakaalofa mai nakai a koe kia au? Kua tala age kia ia, Ma Iki na e, kua fioia e koe e tau mena oti kana, kua fioia e koe kua fakaalofa ni au kia koe. Ati tala age ai a Iesu kia ia, Kia fagai e koe haku a tau mamoe.

18 Ko e moli, ko e moli, ke tala atu e au kia koe, ke he hau a fuata, kua pipi ni e koe a koe, mo e faifano ke he tau mena ne loto a koe ki ai; ka fuakau a koe, to fakaolo atu e koe hau a tau lima, to lili foki a koe he taha tagata, mo e uta a koe ke he mena nakai manako a koe ki ai.

19 Ne tala age e ia e kupu ia ke fakailoa atu ai e kakano he hana mate ke fakaheke ai a ia ke he Atua. Kua tala age e mena ia, ti pehe age ai a ia kia ia, Kia mui mai a a koe kia au.

20 Kua haga age a Peteru, ti kitia ai e ia e tutaki ia kua ofania e Iesu, ha ne mui mai, ko ia foki ne falanaki atu ke he fatafata a Iesu ke he kaiaga mena mo e pehe atu, Ko e Iki na e, ko hai kia ka afo a koe?

21 Kua kitia e Peteru a ia, ati pehe age ai a ia kia Iesu, Ko e Iki na e, po ke eke fefe a ia nai?

22 Kua tala age a Iesu kia ia, Kaeke ke loto au ke tumau a ia ato hau au, to ku e mena ia kia koe? kia mui mai a koe kia au.

23 Ati fakapuloa ai e kupu nai he tau matakainaga, Nakai mate ni e tutaki ia; ka e nakai pehe atu a Iesu kia ia, Nakai mate a ia; ka e pehe, Kaeke ke loto au kia tumau a ia ato hau au, to ku e mena ia kia koe?

24 Ko e tutaki haia, ko e talahau ke he tau mena ia, ne tohi foki e ia e tau mena ia; ti iloa e tautolu ko e moli ni hana talahau.

25 Ko e falu a mena loga foki ne eke e Iesu; kaeke ke tohi kia oti kana, kua manatu au nakai maeke he toka ai ke he lalolagi e tau tohi ia ka tohi. Amene.