Gahua

12 KO e vaha ia ne fakaolo mai he patuiki ko Herota hana tau lima ke favale atu ke he falu he ekalesia.

2 Kua kelipopo e ia a Iakopo e matakainaga a Ioane ke he pelu.

3 Kua iloa foki e ia kua fiafia ai e tau tagata Iutaia, ati liu ai foki tapaki a Peteru. (Ko e tau aho ia he tau areto nakai fakaea.)

4 Kua tapaki a ia, ati tuku atu ai ke he fale puipui, mo e tuku atu ke he tau kau e takitokofa he tau vahega ne fa, ke leoleo kia ia; kua manatu a ia ke takitaki age a ia ke he tau tagata ka hili e paseka.

5 Hanai, kua leoleo a Peteru ke he fale puipui; ka kua eke e liogi fakamakamaka he ekalesia ke he Atua māna.

6 Kua hoko ke he vaha ke takitaki ai e Herota a ia ki fafo, ko e po foki ia ne mohe ai a Peteru he vaha he na tagata tau, kua lili ke he tau toua lapatoa ne ua; ko e tau leoleo foki i mua he gutuhala kua leoleo a lautolu ke he fale puipui.

7 Kitiala ko e agelu he Iki kua tu mai, kua kikila mai foki e maama ke he fale; kua ta e ia a Peteru ke he hana kahokaho, mo e fafagu a ia, kua pehe atu, Ati tu a ki luga fakaave. Ati mokulu hifo ai e tau toua lapatoa mai he tau lima hana.

8 Kua ta a age e agelu kia ia, Pipi a hau a tapulu, mo e fakamau hifo hau a tau afialoalohui. Ati eke ai e ia pihia. Kua tala age foki a ia kia ia, Kia tapulu a koe, mo e mui mai kia au.

9 Ati fano ai a ia ki fafo, kua mui atu kia ia; kua nakai iloa e ia kua moli e mena ne eke he agelu; piko na ia kua kitia a fakakiteaga.

10 Kua mole ki tua ia laua e leoleoaga fakamua, mo e leoleoaga ne ua aki, ati hoko atu ai a laua ke he puipui lapatoa ke hoko ai ke he māga, kua mavete noa ia laua; ati o atu ai a laua ki fafo, mo e o atu ke he puhala e taha; ati toka ai agataha he agelu a ia.

11 Kua matala e loto a Peteru, ati pehe ai a ia, Kua iloa nai e au, ko e moli, kua fekau mai he Iki hana agelu, mo e laveaki mai e ia au mai he lima a Herota, mo e amaamanakiaga ni he motu ko Iutaia.

12 Kua iloa tuai e ia, ati fano ai ke he fale a Maria e matua fifine a Ioane kua higoa ko Mareko; ne fakapotopoto ai e tokologa kua liogi.

13 Kua tukituki atu foki a Peteru ke he pa gutuhala, ati hau ai e taha tama fifine ko Rosa e higoa, ke fanogonogo mai.

14 Kua iloa foki e ia e leo a Peteru, ti nakai vevete ai e pa gutuhala he fiafia, ka kua poi ke he fale, mo e tala age ai ha ne tu mai a Peteru ke he gutuhala.

15 Kua pehe age a lautolu kia ia, Kua vikoia a koe. Ka e fakamakamaka age e ia ko e moli ni. Ati pehe age ai a lautolu, Ko e hana agelu ia.

16 Ka e tukituki agaia a Peteru; ati vevete ai e lautolu, kua kitia a ia, ati ofomate ai na lautolu.

17 Ka kua alo atu e ia hana lima kia lautolu kia fakamamate, ti kua fakamatala atu e ia kia lautolu ne takitaki mai he Iki a ia mai he fale puipui. Kua pehe atu foki a ia, Kia tala age e mutolu e tau mena nai kia Iakopo mo e tau matakainaga. Ati hu ai a ia ki fafo, kua fano ke he taha mena.

18 Kua aho, ati lahi ai e fakaatukehe he kau, po kua eke fefe a Peteru.

19 Kua kumi foki e Herota a ia, kua nakai moua ati fakafili atu ai a ia ke he tau leoleo, kua fekau atu kia takitaki age a lautolu ke kelipopo. Ti kua fina age a ia mai Iutaia ki Kaisaria kua nofo ai.

20 Kua ita lahi a Herota ki Turo mo Saitonu; ka kua o mai a lautolu kia ia mo e loto fakalataha, kua ole age foki a lautolu kia Palaseto, ko ia ne leveki e mohega he patuiki, ati ole atu ai a lautolu ke fakafeilo, ha ko e mena fagai e motu ha lautolu he motu he patuiki.

21 Ko e aho foki ne kotofa ai, kua tapulu a Herota he hana tapuluiki, kua nofo foki a ia ke he nofoaiki, kua vagahau atu kia lautolu;

22 Ati tauhea ai e motu, Ko e leo he atua, ka e nakai ko e tagata.

23 Ati ta ai agataha a ia he agelu he Iki; he nakai uta e ia e fakahekeaga ke he Atua; ati kai ai a ia he tau moko, kua mate ai.

24 Ka kua tupu e kupu he Atua, mo e tupu lahi.

25 Ti kua liliu mai foki a Panapa mo Saulo i Ierusalema, he oti ha laua a fekau; kua o mai a lautolu mo Ioane ne higoa ko Mareko.