Mataio

10 KUA ui atu e ia ke he hana tau tutaki tokohogofulu ma ua, ti age ai e ia kia lautolu e pule ke he tau agaga kelea, ke vega a lautolu, ke fakamalolo foki e tau gagao oti mo e tau mamahi oti.

2 Ko e tau higoa hanai he tau aposetolo tokohogofulu ma ua; fakamua a Simona kua fakahigoa ko Peteru, mo Aneterea hana matakainaga; ko Iakopo e tama a Sepetaio, mo Ioane hana matakainaga;

3 Ko Filipo, mo Patolomaio; ko Toma, mo Mataio ko e telona; ko Iakopo ko e tama a Alefaio, mo Lepaio kua fakahigoa ko Tataio;

4 Ko Simona ko e Kanana; mo Iuta Isakariota, ko ia foki ne afo a ia.

5 Kua fakafano atu e Iesu e tokohogofulu ma ua na, kua tala age a ia kia lautolu, kua pehe age, Aua neke o a mutolu ke he taha hala he tau motu kehe, aua foki neke afe atu a mutolu ke he taha maga i Samaria;

6 Ka e mitaki ke o atu a mutolu ke he tau mamoe galo he faoa a Isaraela.

7 Ka e o a a mutolu mo e fakamatala atu, kia pehe atu, Kua tata mai tuai e kautu he lagi.

8 Kia fakamalolo e mutolu e tau tagata gagao, kia fakamea e tau tagata lepela, kia fakamamatike e tau tagata mamate, kia vega e tau temoni. Kua moua noa e mutolu, kia foaki noa atu e mutolu.

9 Aua neke uta ma mutolu e tau auro, po ke tau ario, po ke tau apa kula ke he tau pipi ha mutolu.

10 Aua foki neke uta ha kato mo e fenoga; aua foki neke takiua e tau tapulu tino, po ke tau afialoalohui, po ke tokotoko; ha ko e mena lata e mena kai ke he tagata eke gahua.

11 Ko e māga, po ke magamotu ke hohoko atu a mutolu ki ai, kia hūhū po ko hai ha i ai kua lata; ti nonofo ai a mutolu, ato o a mutolu.

12 Ka hūhū atu a mutolu ke he taha magafaoa kia fakaalofa atu a mutolu ki ai.

13 Kaeke foki kua lata e magafaoa ia, to hoko atu ki ai ha mutolu a fakamonuina; kaeke foki kua nakai lata, ti liliu mai ai kia mutolu ha mutolu a fakamonuina.

14 Ka nakai talia e taha a mutolu, po ke nakai fanogonogo ke he tau kupu ha mutolu, ka toka e mutolu e fale ia po ke māga ia, ti lulululu kehe ai e mutolu e kelekele ke he tau hui ha mutolu.

15 Ko e moli, ke tala atu e au kia mutolu, ko e aho fakafili to laukauka ai a Sotoma mo Komora ke he māga ia.

16 Kitiala, kua fakafano atu e au a mutolu tuga e tau mamoe ke he vaha loto he tau luko; hanai, kia loto matala a mutolu tuga e tau gata, kia totonu foki tuga e tau lupe.

17 A mutolu ni mo e tau tagata; ha ko e mena tuku atu e lautolu a mutolu ke he tau fono, mo e fahi e lautolu a mutolu ke he tau sunako ha lautolu.

18 Ke takitaki atu foki a mutolu ki mua he tau iki mo e tau patuiki ha ko au ni, ke eke mo talahau kia lautolu katoa mo e atu motu kehe.

19 Ka tuku atu e lautolu a mutolu, aua neke fakaatukehe a mutolu, po ke fefe, po ke heigoa foki ke tala atu ai e mutolu; ha ko e mena foaki mai kia mutolu ke he magaho ia ni e kupu ke tala age e mutolu.

20 Ha ko e mena nakai ko mutolu kua vagahau atu, ka ko e Agaga he Matua ha mutolu ke vagahau mai ai i loto ia mutolu.

21 To tuku atu he matakainaga hana matakainaga kia mate, to tuku atu foki he matua hana tama; to tutu atu foki e fanau ke he tau matua ha lautolu, ti kelipopo e lautolu a lautolu.

22 To fakavihia foki a mutolu he tau tagata oti ha ko e haku a higoa; ka ko ia ka tumau ato hoko ke he fakahikuaga, to fakamoui na ia.

23 Ka favale a lautolu kia mutolu ke he taha māga, ti fehola a mutolu ke he taha; ha ko e moli ke tala atu e au kia mutolu, nakai kati e tau māga a Isaraela kia mutolu, ato hau e Tama he tagata.

24 Nakai mua e tutaki ke he akoako, nakai mua foki e fekafekau ke he hana iki;

25 Ka e lata ni ke he tutaki kia eke a ia ke tuga mo e akoako hana, ko e fekafekau foki kia tuga hana iki. Kaeke kua ui e lautolu e patu he magafaoa ko Pelesepulo, nakai kia au atu he ui pihia e lautolu hana magafaoa?

26 Hanai, ua matakutaku a mutolu kia lautolu; ha kua nakai fai mena kua ufia ke nakai fakakite, nakai fai mena galo foki ke nakai kitia.

27 Ko e tau mena kua tala atu e au kia mutolu ke he pouli, kia talahau atu e mutolu ke he maama; ko e mena foki kua logona he tau teliga ha mutolu, kia fakamatala atu e mutolu ki luga he tau fale.

28 Aua foki neke matakutaku a mutolu kia lautolu ke kelipopo e tino, ka e nakai maeke ke kelipopo e agaga; ka e mitaki ke matakutaku a mutolu kia ia kua maeke ke fakaoti e agaga katoa mo e tino i Kehena.

29 Nakai kia fakafua ua e manu ikiiki ke he asari? Nakai to foki taha ia laua ke he kelekele ka noa mo e Matua ha mutolu.

30 Ka kua oti kana he totou ha mutolu a tau lauulu.

31 Ko e mena ia, ua matakutaku ai a mutolu; mena mua a mutolu ke he tau manu ikiiki loga.

32 Hanai, ko e tagata ke talahau au ki mua he tau tagata, to talahau foki e au a ia ki mua he Matua haku ha ha he lagi.

33 Ko e tagata ke fakatikai au ki mua he tau tagata, to fakatikai foki e au a ia ki mua he haku a Matua ha ha he lagi.

34 Aua neke manatu a mutolu kua hau au ke ta atu ai e mafola ke he lalolagi; nakai hau au ke ta atu e mafola, ka ko e pelu.

35 Ka kua hau tuai au ke fakafaitaua e tagata mo e hana matua tane, ko e tama fifine foki mo e hana matua fifine, ko e figona fifine foki mo e matua fugavai fifine hana.

36 Ke eke foki e tagata mo fi he faoa hana.

37 Ko e tagata ne lahi hana fakaalofa ke he hana matua tane po ke hana matua fifine, ka e fakatote mai kia au, nakai aoga a ia kia au; ko ia foki kua lahi hana fakaalofa ke he hana tama tane po ke hana tama fifine, ka e fakatote mai kia au, nakai aoga a ia kia au.

38 Ko e tagata foki nakai toto hana satauro, mo e nakai mui mai kia au, nakai aoga a ia kia au.

39 Ko ia ke moua hana moui, to moumou ai kia ia; ka ko ia ne fakamoumou hana moui ha ko au, to moua e ia.

40 Ko ia ka talia a mutolu, kua talia e ia au; ko ia foki ka talia au kua talia e ia a ia ne fekau mai au.

41 Ko ia foki ke talia taha perofeta ke he higoa he perofeta, to moua e ia e taui he perofeta; ko ia foki ke talia e taha tagata tututonu ke he higoa he tagata tututonu, to moua e ia e taui he tagata tututonu.

42 Ko ia foki ka age taha kapiniu he magavai momoko hokoia ke inu he taha ia lautolu nai kua fakateaga ke he higoa he tutaki; ko e moli, ke tala atu e au kia mutolu, nakai moumou hana taui.