Tau Fakatai

27 AUA neke hula a koe ke he aho a pogipogi; he nakai iloa po ke heigoa e mena ke tupu a pogipogi.

2 Kia fakaheke he tagata kehe kia koe, ka e nakai ko e gutu hāu; kia fakaheke atu e taha ka e nakai ko e tau laugutu hāu.

3 Kua mamafa e maka, kua mamafa foki e oneone; ka ko e ita he tagata goagoa kua mua hana mamafa ke he tau mena ua na.

4 Kua favale e ita lahi; ko e ita ko e fakapuke haia; ka ko hai ke tu ki mua he ita tafua?

5 Kua mua e mitaki e akonakiaga kua fakakite, ke he fakaalofa kua fufu.

6 Kua fakamoli e kapitiga he fakakafokia mai e ia; ka e figita laga loga mai a ia kua fai fi mai.

7 Ko e tagata kua makona kua tiaki e ia e meli kua hihina hifo; ka e humelie e tau mena kona oti ke he tagata kua fia kai.

8 Tuga ne manu kua lele kehe he fata hana, kua pihia e tagata kua neva kehe mo e hana motu.

9 Ko e puke lolo mo e mena manogi kua fakafiafia ai e loto; kua pihia foki e fakaalofa he kapitiga he tagata, he fakatonu mena e ia kua eke ni mo e loto.

10 Aua neke tiaki e koe e kapitiga hāu, mo e kapitiga he hāu a matua tane; ua hu atu foki a koe ke he fale he hāu a matakainaga ke he aho ne matematekelea ai a koe; kua mua e mitaki he tagata ne katofia mo koe kua tata mai, ke he matakainaga kua mamao.

11 Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.

12 Kua kitia he tagata lotomatala e kelea, mo e fakamumuli ai a ia; ka ko e tau tagata goagoa, kua o age ai a lautolu, ti fakahala ai a lautolu.

13 Kia uta e koe e tapulu hana kua eke mo fakamoli ma e tagata kehe; mo e taofi e koe a ia ke fakamau aki e fakafua kua eke mo fakamoli, ha ko e fifine kehe.

14 Ko ia kua uhu matike, mo e fakamonuina atu e ia hana kapitiga mo e leo lahi, to talahaua ia ko e kaialu kia ia.

15 Ko e tutulu mau ke he aho uha, mo e fifine fa taufetoko kua fakataufataua ia;

16 Ko ia kua taofi a ia kua taofi ai e ia e matagi; ti hoko atu foki hana lima matau ke he puke lolo.

17 Kua fakamata ai e lapatoa ke he lapatoa, kua fakamalolo foki pihia e tagata ke he hana kapitiga.

18 Ko ia kua leveki e mati kua kai ai e ia hana tau fua; ko ia foki kua omaoma ke he hana iki kua fakaheke ai a ia.

19 Tuga ne fakafehagai e tau mata ke he vai; kua pihia e loto he tagata ke he taha tagata.

20 Ko e tukuaga mo e malaia nakai makona ia; ko e tau mata foki he tagata nakai makona ia he kitekite.

21 Ko e kapiniu ke tunu ai e ario, mo e gutuumu ke tunu ai e auro; kua kamatamata ai foki e tagata ke he hana fakahekeaga.

22 Pete he tuki aki e koe e tagata goagoa ke he tuki ke he kumete ne tukituki ai e tau mena, fakalataha mo e tau saito kua tuki, ka e nakai vevehe kehe hana goagoa ia ia.

23 Kia iloa mitaki e koe e tau tino he hāu a tau mamoe, mo e manamanatu a a koe ke he hāu a tau fuifui manu.

24 Ha ko e mena nakai tukulagi e koloa; nakai hoko foki e foufou iki ke hahau mo hahau.

25 Kua tatanaki ai e motie ne helehele, ti kitia ai e vao mui, kua fakapotopoto ai foki e vao ikiiki he tau mouga.

26 Ko e tau punua mamoe kua moua ai e koe hāu a tau tapulu; ko e taui foki he fonua, ko e tau koti tane haia.

27 Ko e puke huhu foki he tau koti ke kai ai a koe, mo e kai ai e magafaoa hāu; ke makona ai foki hāu a tau fekafekau fifine.