Ioane

4 KUA fioia he Iki kua logona he tau farasaio kua tokologa e tau tutaki ne eke e Iesu mo e papatiso ai, ka e tokogahoa ha Ioane;

2 (Ka ko Iesu, nakai papatiso e ia, ka ko e hana tau tutaki ni,)

3 Ti toka e ia a Iutaia, ka e liu atu a ia ki Kalilaia.

4 To fano a ia he hala Samaria ke lata ia.

5 Ti hoko atu a ia ke he taha maga i Samaria, ko Sikara e higoa, ne tata age ke he fonua ne age e Iakopo ke he hana tama ko Iosefa.

6 Ha i ai e vaipuna a Iakopo. Ti kua nakai fahia a Iesu ke he hana fenoga, kua nofo ai a ia i luga he vai, kua hoko foki ke he magaaho tokai ko e ono.

7 Kua hau e taha fifine Samaria ke utu vai. Kua tala age a Iesu kia ia, Ta mai a kia au kou inu.

8 Ha kua o tuai hana tau tutaki ke he maga ke fakatau ai e tau mena kai.

9 Ati tala age ai e fifine Samaria kia ia, Po ke ole mai fefe e koe ko e tagata Iutaia e vai inu kia au, ko e fifine Samaria; ha ko e mena nakai feutaaki e tau mena a Iutaia mo Samaria.

10 Kua tala age a Iesu, kua pehe age kia ia, Ane iloa e koe e mena foaki noa he Atua, mo e iloa a ia ne tala atu kia koe, Ta mai a kia au kou inu; po kua ole mai ai a koe kia ia, ati foaki atu ai e ia kia koe e vai moui.

11 Kua tala mai e fifine kia ia, Ko e iki na e, nakai fai mena a koe ke tuku aki, ne hokulo foki e vaikeli; ke moua kia e koe i fe e vai moui?

12 Ko e mena mua kia a koe ke he matua ha mautolu, ko Iakopo, ko ia ne tuku mai kia mautolu e vaikeli, ne inu ai foki a ia, mo e hana fanau, mo e hana tau manu?

13 Ne tala age a Iesu, kua pehe age kia ia, Ko e tagata ka inu ke he vai nai, to liu foki fia inu a ia.

14 Ka ko e tagata ke inu e vai ke age e au kia ia, nakai tuai fia inu ni a ia; ka ko e vai ke age e au kia ia, ke eke ia mo vaipuna, ki loto ia ia, ke puna ai ki luga ke he moui tukulagi.

15 Kua tala age e fifine kia ia, Ko e iki na e, ta mai a kia au e vai na, kia nakai tuai fia inu au, kia nakai hau foki ki hinai ke utu vai.

16 Kua tala age a Iesu kia ia, Fano a a koe, ke ui ke he tane hāu, ti liu mai ai a koe ki hinai.

17 Kua tala age e fifine, kua pehe age, Nakai fai tane au.

18 Kua tala age a Iesu kia ia, Kua tonu hāu a kupu, Nakai fai tane au, ha ko e mena tokolima e tau tane ne nofo ia koe, ko ia foki kua fakalataha mo koe ainei, nakai ko e tane hāu a ia; ko e mena moli ni e talahau mai ai e koe.

19 Kua tala mai e fifine kia ia, Ko e iki na e, kua iloa nai e au, ko e perofeta a koe.

20 Ko e tau matua ha mautolu ne tapuaki ke he mouga nai; ka kua talahau mai e mutolu, ko Ierusalema e mena ke tapuaki ai ke lata ai.

21 Kua tala age a Iesu kia ia, Teme ne e, fanogonogo mai a kia au; to hoko mai e vaha, ti nakai ko e mouga nai, ti nakai ko Ierusalema ke tapuaki ai a mutolu ke he Matua.

22 Kua tapuaki fakahaupo na mutolu, ka kua tapuaki a mautolu mo e iloa, ha ko e mena mai Iutaia e fakamouiaga.

23 Ke hoko mai e vaha, kua hoko nai foki ki ai, ko lautolu ne tapuaki fakamoli, to tapuaki a lautolu ke he Matua mo e agaga mo e fakamoli; ha ko e mena kumi e Matua kia pihia a lautolu ne tapuaki kia ia.

24 Ko e Atua ko e agaga ni a ia; ko lautolu foki ne tapuaki kia ia, kua lata ke tapuaki atu ki ai mo e agaga mo e fakamoli,

25 Kua tala age e fifine kia ia, Kua iloa e au ka haele mai e Mesia, (ne ui ko e Keriso,) ka haele mai a ia, ti fakailoa mai e ia e tau mena oti kia mautolu.

26 Ati tala age ai a Iesu kia ia, Ko au haia, ha ne vagahau atu kia koe.

27 Ti o mai ai mogoho ia hana tau tutaki, kua ofo he vagahau a laua mo e fifine; ka e nakai pehe foki taha, Po ke heigoa hāu ne kumi? po ke pehe, Ko heigoa e mena kua vagahau ai a mua mo ia?

28 Ati toka ai he fifine hana vai, ka e fano ke he maga; ti pehe atu ke he tau tagata,

29 Ati o mai a, ke kitia e mutolu e tagata ne talahau mai kia au e tau mena oti kana ne eke e au, nakai kia ko e Keriso haia?

30 Ati o ai a lautolu he maga, kua o mai kia ia.

31 Ha ne eke e mena ia, kua ole age ai hana tau tutaki kia ia, kua pehe age, Rapai na e, ati taumafa a.

32 Ka e pehe age a ia kia lautolu, Ha ha ia au e tau mena kai nakai kitia e mutolu.

33 Ati vagavagahau ai e tau tutaki, Kua age nakai e taha ha mena kai kia ia.

34 Kua tala age a Iesu kia lautolu, Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.

35 Nakai kia talahau e mutolu, Kua toe fa e mahina, ti hoko ai e heleheleaga saito; kitiala, kua tala atu e au kia mutolu, haga hake a ha mutolu a tau mata, mo e kitekite ke he fonua kua hina mai nai ke he heleheleaga saito.

36 Ko ia foki ne helehele kua moua e ia hana palepale, ti tanaki e ia e tau fua ke he moui tukulagi; kia fakatau fiafia a ia ne gana e tau saito mo ia ne helehele.

37 Ha ko e mena ia kua fakamoli ai e kupu, Kehe a ia ne gana saito, ti kehe a ia ne helehele.

38 Kua fakafano atu e au a mutolu ke helehele e mena nakai gahua ai a mutolu; ne gahua e falu a tagata, ka kua hoko atu a mutolu ke he ha lautolu a tau gahua.

39 Ne tokologa e tau tagata Samaria ke he maga ia ne tua kia ia, ha ko e kupu he fifine ne talahau mai, Kua talahau mai ne ia kia au e tau mena oti kana ne eke e au.

40 Kua o mai foki e tau tagata Samaria kia ia, ti olelale atu kia ia, ke nonofo a ia mo lautolu; ati nofo ai a ia ke he aho ua.

41 Kua au atu ai he tokologa ne tua kia ia ha ko e kupu hana;

42 Ti pehe age a lautolu ke he fifine, Nakai ko e kupu hāu kua tua ai a mautolu nai; ha kua fanogonogo ni a mautolu, kua iloa foki e mautolu ko e moli ni ko e Fakamoui hanei he lalolagi, ko e Keriso ni.

43 Kua mole e na aho ua ia, ti toka ai e ia e mena ia, ka e haele atu ki Kalilaia.

44 Ha ko e mena talahau ni e Iesu, Nakai lilifu ha perofeta ke he hana maga ni.

45 Kua hoko foki a ia ki Kalilaia, ti talia mai ai a ia he tau tagata Kalilaia, ha kua kitia e lautolu e tau mena oti kana ne eke e ia i Ierusalema ke he galue; nukua o atu foki a lautolu ke he galue.

46 Ti liu atu a Iesu ki Kana i Kalilaia, ne faliu uaina ai e magavai. Ko e taha iki foki ne gagao hana tama i Kapanaumi;

47 Kua logona e ia kua haele mai a Iesu i Iutaia ki Kalilaia, ti fano a ia kia ia, mo e ole atu kia ia ke hifo mo e fakamalolo hana tama, nukua teitei mate a ia.

48 Ti pehe age a Iesu kia ia, Kaeke kua nakai kitekite atu a mutolu ke he tau fakamailoga mo e tau mana, nakai tua ni a mutolu.

49 Kua tala age e iki kia ia, Ko e iki na e, kia haele hifo a koe, ka e nakaila mate haku a tama.

50 Kua pehe age a Iesu kia ia, fano a a koe, kua moui tuai hāu a tama. Ti talia he tagata e vagahau a Iesu ne tala age kia ia, ti fano a ia.

51 Ha ha ne hifo ni a ia, ti feleveia ai mo e hana tau fekafekau, kua talahau e lautolu, kua pehe, Kua moui tuai e tama hau.

52 Ati hūhu atu ai a ia kia lautolu, po ke magaaho fiha ne kamata ai ke laukauka ai a ia? Kua tala age a lautolu kia ia, Ne maulu neafi hana vevela ke he magaaho fitu.

53 Ti iloa ai he matua, ko e magaaho ia ni ne tala age ai Iesu kia ia, Kua moui tuai hāu a tama. Ati tua ai a ia, katoa mo e hana magafaoa oti.

54 Ko e ua ia e fakamailoga ne eke e Iesu, ka kua haele mai a ia i Iutaia ki Kalilaia.