2 Tau Patuiki

8 TI vagahau atu ai e Elisaio ke he fifine ne fakamoui ai e ia hana tama tane, kua pehe atu, Matike ā, ti o a mutolu mo e hāu a magafaoa, ti nonofo paea a mutolu ke he taha mena kua maeke ke nonofo ai; ha kua ui e Iehova ke he hoge; ke hoko ai foki ke he motu ke tau fitu.

2 Ti matike ai e fifine, ti eke e ia tuga ne kupu he tagata he Atua; kua o a lautolu mo e hana magafaoa, ti nonofo paea ai a lautolu ke he motu he tau tagata Filisitia ke fitu e tau.

3 Kua mole atu e tau tau ne fitu, ti liu mai a ia he motu he tau tagata Filisitia; ti fano ai a ia ke tagi ke he patuiki ha ko e hana fale mo e hana fonua.

4 Kua vagahau ai e patuiki mo Kehasi ko e fekafekau he tagata he Atua, kua pehe age, Kia tala mai la e koe kia au e tau mana oti ne eke e Elisaio.

5 Ha ne tala age a ia ke he patuiki, e tagata mate ne fakamoui ai e ia, ti kitiala, ko e fifine hana e tama tane ne fakamoui ai e ia, kua tagi mai ke he patuiki ha ko e hana fale mo e hana fonua. Ti pehe age ai a Kehasi, Ko e iki na e, ko e patuiki, ko e fifine hanai, ko e hana tama tane foki hanai ne fakamoui ai e Elisaio.

6 Ti huhu age ai e patuiki ke he fifine, ti tala age a ia kia ia. Ti kotofa ai he patuiki taha fekafekau ne mua, kua pehe age, Kia liu aki age e koe kia ia hana tau mena oti, katoa mo e tau mena oti ne tutupu mai ai he fonua tali mai he aho ne toka ai e ia e motu, ke hoko mai ke he aho nai.

7 Kua fina atu a Elisaio ki Tamaseko, ka kua gagao a Penihata ko e patuiki a Suria ti talahau atu kia ia, kua pehe atu, Kua hau e tagata he Atua ki hinai.

8 Ti pehe age ai e patuiki kia Hasaeli, Kia uta ā e koe e mena fakaalofa ke he tau lima hāu ti fano a a koe ke feleveia mo e tagata he Atua, mo e huhu atu ai e koe kia Iehova, kia pehe atu, Po ke malolo nakai au he gagao nai?

9 Ti fano ai a Hasaeli ke feleveia mo ia, kua uta foki e ia e tau mena fakaalofa ke he hana tau lima, ko e tau mena mitaki oti i Tamaseko ne fagofulu e tau kavega he tau kamela, ti hau ai a ia, kua tu mai ki mua hana, kua pehe mai, Ko e tama hau ko Penihata, ko e patuiki a Suria, kua fakafano mai au kia koe, kua pehe mai, Po ke malolo nakai au he gagao nai.

10 Ti pehe age a Elisaio kia ia, Fano a a koe, ti pehe age a koe kia ia, Kua maeke ni ke liu moui a koe; ka kua fakakite mai ni e Iehova kia au, ko e matulei ne fai a ia.

11 Ti mataono a ia kia ia, ato ma ai a ia; ti tagi ai e tagata he Atua.

12 Ti pehe age ai a Hasaeli, Ko e iki na e, ko e heigoa kia e mena kua tagi ai a koe? Ti tali age ai a ia, Ha kua iloa e au e kelea ke eke ai e koe ke he fanau a Isaraela; to huhunu ai e koe ha lautolu a tau kolo ke he afi, ti kelipopo e koe ha lautolu a tau fuata ke he pelu, ti palu hifo e koe ha lautolu a tau tama mukemuke, ti ihi e koe e tau fifine ha lautolu kua fatu.

13 Ti pehe age ai a Hasaeli, Ka ko e heigoa hāu a fekafekau, ko e kuli, ke eke ai e ia e tau mena lalahi na? Ti tali age a Elisaio, Kua fakakite mai e Iehova kia au, ko e eke ne fai a koe mo patuiki a Suria.

14 Ti fano kehe a ia ia Elisaio, ti fano ai a ia ke he hana iki; ti pehe age a ia kia ia, Ko e heigoa e kupu a Elisaio kia koe? Ti tali age ai a ia, Ne pehe mai a ia kia au, to moui ni a koe.

15 Kua hoko ke he aho a pogipogi ti toto ai e ia e ie matolu, kua fuifui ai ke he vai ti fofola ai e ia ke he hana fofoga, ti mate ai a ia. Ti eke a Hasaeli mo patuiki ke hukuiaki a ia.

16 Ko e tau lima a Iorama ko e tama a Ahapo, ko e patuiki a Isaraela, ka kua eke a Iehosafata mo patuiki a Iuta, ti eke ai e Iehoramo ko e tama a Iehosafata mo patuiki a Iuta.

17 Ko e tolugofulu ma ua e tau tau hana he eke ai a ia mo patuiki; ti valu e tau ne eke a ia mo patuiki i Ierusalema.

18 Ne fano foki a ia ke he tau puhala he tau patuiki a Isaraela, tuga ne eke ai he magafaoa a Ahapo; ha ko e tama fifine a Ahapo ne eke mo hoana hana, kua eke foki e ia e mahani kelea ki mua a Iehova.

19 Ka e nakai finagalo a Iehova ke fakaoti ai a Iuta, ha ko e hana fekafekau ko Tavita, tuga ne talahau mai a ia kia ia, ke foaki mai e ia kia ia e lamepa ma e hana fanau ke he tau aho oti.

20 Ko e vaha ne patuiki ai a ia ne fakafualoto ai a Etoma kia Iuta, ti eke ai e lautolu e patuki ma lautolu.

21 Ti fina age ai a Ioramo ki Seira ha ha ia ia foki e tau kariota oti. Ti matike a ia he po mo e keli ai e ia e tau tagata Etoma ne agaafai kia ia, katoa mo e tau iki he tau kariota, ti fehola ai e motu ke he tau fale ie ha lautolu.

22 Ka kua fakafualoto ai a Etoma ke he pule a Iuta, ke hoko mai ke he aho nai. Ti fakafualoto ai a Lipena ke he vaha ia.

23 Ko e tau mena ne toe ne eke e Ioramo katoa mo e tau mena oti ne eke e ia, nakai kia tohi ia ke he tohi ne tohi ai e tau tala ke he nofoaga he tau patuiki a Iuta?

24 Ti takoto ai a Ioramo fakalataha mo e hana tau matua, ti tanu ai a ia fakalataha mo e hana tau matua ke he maga a Tavita. Ti eke ai a Ahasaia hana tama mo patuiki ke hukui aki a ia.

25 Ko e tau hogofulu ma ua he eke a Iorama ko e tama a Ahapo mo patuiki a Isaraela, ne eke ai a Ahasaia ko e tama a Iehoramo mo patuiki a Iuta.

26 Ko e uafulu ma ua e tau tau a Ahasaia he eke e ia mo patuiki; ti taha e tau ne patuiki ai a ia i Ierusalema. Ko e higoa he hana matua fifine ko Atalia, ko e tama fifine a Omeri ko e patuiki a Isaraela.

27 Kua fano foki a ia ke he puhala he magafaoa a Ahapo, ti eke ai e ia e mahani kelea ki mua a Iehova, tuga ne magafaoa a Ahapo; ha kua magafaoa a ia mo e magafaoa a Ahapo.

28 Ti o a laua mo Ioramo ko e tama a Ahapo ke tau mo Hasaeli ko e patuiki a Suria i Ramota-Kiliata, ti kafokia ai a Ioramo he tau tagata Suria.

29 Ti liu ai a Ioramo ko e patuiki ki Isereelu, ke fakamaulu ai hana tau kafokia ne fakaka fokia ai he tau tagata Suria a ia i Rama, he tau ai a ia mo Hasaeli ko e patuiki a Suria. Ti hifo ai a Ahasaia ko e tama a Iehoramo ko e patuiki a Iuta ke ahi a Ioramo ko e tama a Ahapo i Isereelu, ha kua gagao a ia.