Tau Fakafili

8 TI pehe age e tau tagata Efaraimo kia ia, Ko e heigoa e mena nai kua eke e koe kia mautolu, he nakai ui mai e koe kia mautolu he fano a koe ke tau mo Mitiana? Ti taufetoko fakalahi ai a lautolu mo ia.

2 Ti pehe age a ia kia lautolu, Ko e heigoa e mena kua eke e au nai, ke tuga e mena kua eke e mutolu? Nakai kia mua he mitaki e tau fua vine venevene a Efaraimo ke he tanakiaga vine a Apiseru?

3 Kua tuku atu he Atua ke he tau lima ha mutolu e tau iki a Mitiana, ko Orepa mo Seepa; ti heigoa kia kua maeke kia au ke eke ke tuga e mena ia ha mutolu? Ti maulu ai ha lautolu a ita kia ia, ha kua vagahau age e ia e kupu na.

4 Kua hoko atu a Kiteona ki Ioritana, ti o ai a lautolu mo e tau tagata tolu e teau ne fakalataha mo ia ke he fahi atu, kua nakai fahia a lautolu, ka e tutuli ai ni.

5 Ti pehe age a ia ke he tau tagata Sukota, Kia ta mai e mutolu e tau areto pukupuku ma e motu kua mumui mai kia au, ha kua nakai fahia a lautolu, ka kua tutuli e au a Sipa mo Salemuna ko e tau patuiki a Mitiana.

6 Ti pehe age e tau iki Sukota, Kua moua kia e koe a Sipa mo Salemuna ke ta atu ai e mautolu e tau mena kai ma e kau hau?

7 Ti pehe age ai a Kiteona, Ka tuku mai ai e Iehova a Sipa mo Salemuna ke he haku a lima, to haha e au ha mutolu a tau tino ke he tau akau mahukihuki he vao mo e tau mena fotofoto.

8 Ti hake ai a ia he mena ia ki Penueli, ti vagahau age pihia a ia kia lautolu. Ti tali age e tau tagata Penueli kia ia, tuga ne tali age ai e tau tagata Sukota.

9 Ti tala age foki a ia ke he tau tagata Penueli, kua pehe age, Ka liu mai au mo e monuina to ulu ki lalo e au e kolo na.

10 Ha ha i Karekori a Sipa, mo Salemuna, katoa mo e kau ha laua ne fakalataha mo laua, tokai ko e hogofulu e afe ti lima e afe tagata, ko lautolu na ne toe he kau oti he tau tagata he fahi uta; ha kua kelipopo ai e tau tagata ne toto e pelu ko e taha teau afe ti uafulu e afe tagata.

11 Ti hake ai a Kiteona ke he puhala ha lautolu ne nonofo ke he tau fale ie ke he fahi uta a Nopa mo Iakepea; ti keli ai e ia e kau, ha kua nonofo fakahanoa ai e kau.

12 Kua fehola foki a Sipa mo Salemuna, ti tutuli e ia a laua, ti moua ai e ia e tau patuiki tokoua a Mitiana, ko Sipa mo Salemuna; ti fakamatakutaku atu e ia ke he kau oti kana.

13 Ti liu mai ai a Kiteona ko e tama a Ioasa he tau; mai he mena ne hake ai a Heresa.

14 Ti moua ai e ia taha fuata he tau tagata Sukota, ti huhu a ia kia ia, ti tohi ai e ia kia ia e tau iki Sukota mo e tau patu ha lautolu, ko e tau tagata toko fitugofulu ma fitu.

15 Ti fina age a ia ke he tau tagata Sukota, ti pehe age a ia, Kitiala, ko Sipa mo Salemuna ne va mai ai e mutolu kia au, kua pehe mai, Kua moua nai kia e koe a Sipa mo Salemuna, ke ta atu ai e mautolu e tau mena kai ma e tau tagata hau kua nakai fahia?

16 Ti uta e ia e tau patu he maga, mo e tau lakau mahukihuki he vao mo e tau mena fotofoto ti akonaki atu ai e ia ke he tau tagata Sukota.

17 Ti ulu ki lalo e ia e kolo i Penueli, mo e kelipopo ai e ia e tau tagata he maga.

18 Ti pehe age a ia kia Sipa mo Salemuna, Ko e tau tagata fefe ne kelipopo ai e mutolu i Tapora? Ti pehe age a laua tuga na koe a lautolu, ne takitaha a lautolu mo e tino mitaki tuga ne tau tama he patuiki.

19 Ti pehe age a ia, Ko e haku a tau matakainaga, ia, ko e tau tama he haku a matua fifine a lautolu; ko e moui a Iehova, ane mai kua fakamoui e mua a lautolu po kua nakai keli e au a mua.

20 Ti pehe age a ia kia Ieteru hana tama uluaki, Kia tu a a koe mo e keli e laua. Ka e nakai aki he tama hana pelu he matakutaku a ia, ha ko e tama gaia ni a ia.

21 Ti pehe age ai a Sipa mo Salemuna, Kia tu mai a a koe, mo e keli a maua ha ko e mena tuga ne tagata kua pihia foki hana malolo. Ti tu atu ai a Kiteona, ti keli e ia a Sipa mo Salemuna; ti uta kehe ai e ia e tau kahoa ha ha he tau ua he tau kamela ha laua.

22 Ti pehe atu e tau tagata Isaraela kia Kiteona, Kia pule a koe kia mautolu, ko koe, mo e hau a tau tama tane; ha kua laveaki mai e koe a mautolu he tau lima a Mitiana.

23 Ti pehe mai a Kiteona kia lautolu, Nakai pule au kia mutolu, to nakai pule foki haku a tama tane kia mutolu; to pule ni a Iehova kia mutolu.

24 Kua pehe mai foki a Kiteona kia lautolu, Ko e taha mena ke ole atu ai au kia mutolu, kia takitaha e tagata ha mutolu mo e ta mai kia au e tau mena tau teliga he hana tau tagata ne fofo he tau; (ko e mena fai mama auro tau teliga a lautolu, ha ko e tau tagata Isamaeli a lautolu.)

25 Ti pehe atu ai a lautolu kia ia, To ta atu ni e mautolu. Ti fofola ai e lautolu e tapulu, ti takitaha e tagata ha lautolu mo e liti ki ai e tau mama tau teliga he hana tau tagata ne fofo he tau.

26 Ko e mamafa he tau mama auro tau teliga ne ole e ia, ko e tau sikeli auro ne taha e afe ti fitu e teau, ti tuku atu ki ai e tau mena kua kahoa ai, mo e tau tifa tau teliga, mo e tau tapulu kula uhi ha i ai ke he tau patuiki a Mitiana, katoa mo e filifili auro ha ha he tau ua he tau kamela ha laua.

27 Ti eke ai e Kiteona e efota, ti tuku e ia a ia ke he hana maga ko Ofira; ti o atu ki ai a Isaraela oti, kua faivao ai a lautolu; ti eke e mena ia mo hele kia Kiteona mo e hana magafaoa.

28 Kua fakatokolalo ai a Mitiana ki mua he fanau a Isaraela, ti nakai liu foki hahaga hake ki luga a lautolu. Ti okioki ai e motu ke he tau tau ne fagofulu ke he vaha ia Kiteona.

29 Ti fano a Ierupaala ko e tama a Ioasa, ti nofo ai a ia ke he hana kaina.

30 Ne tokofitugofulu e tau tama tane a Kiteona ne fanau ai e ia; ha ko e loga e tau hoana hana.

31 Ne fanau ai foki hana hoana fakahoa i Sikema e tama tane mana; ti ui ai e ia hana higoa ko Apimeleko.

32 Ti mate a Kiteona ko e tama a Ioasa, kua motua lahi ni a ia; ti tanu e lautolu a ia ke he tukuaga he hana matua tane ko Ioasa i Oferā he tau tagata Apiseru.

33 Kua mate a Kiteona ti liliu kehe foki e fanau a Isaraela ti mumui atu a lautolu kia Paala ke faivao ai, ti eke ai e lautolu a Paalaperita mo atua ha lautolu.

34 Ti nakai manatu e fanau a Isaraela kia Iehova ha lautolu a Atua, ne laveaki mai a lautolu he tau lima ha lautolu oti ne fai fi kia lautolu, ne agaagai mai kia lautolu.

35 Ti nakai fakaalofa atu a lautolu ke he magafaoa a Ierupaala, ko Kiteona haia, ke lata mo e tau mena oti ne eke fakamitaki atu ai e ia kia Isaraela.