Tau Fakafili

16 KUA fano a Samisoni ki Kasa, ti kitia ai e ia e fifine fakataka ti fina age a ia kia ia.

2 Ti talahau ai ke he tau tagata Kasa, kua pehe, Kua hau tuai a Samisoni ki hinai, Ti agaagai ai e lautolu, mo e takahao kia ia ke he po katoa ke he gutuhala he maga; ne nonofo fakalogologo ai a lautolu ato ahogia, kua pehe a lautolu, Ka aho a pogipogi to keli ai e tautolu a ia.

3 Kua takoto ai a Samisoni ato tuloto e po, kua hoko ke he tuloto po ti matike ai a ia; ti toto ai e ia e tau puipui he gutuhala he maga mo e na pou ne ua, ti lagaaki ai e ia katoa mo e fakamau, ti tuku ai e ia ke he hana ua, mo e ta hake ai ke he tapunu mouga he mouga ne fehagai mo Heperona.

4 Kua mole e mena ia kua manako a ia ke he fifine ke he pahua a Soreta ko Talila hana higoa.

5 Ti o hake ai e tau iki Filisitia, kua pehe age a lautolu kia ia, Kia ole e koe kia ia, ke kitia ai e koe po ke heinoa ne toka ai hana malolo lahi, po ke heigoa foki e mena ke kautu ai a mautolu kia ia, mo e lili ai e mautolu a ia, ke fakamamahi ai a ia; ko mautolu foki, to takitaha a mautolu mo e ta atu kia koe e tau tupe ne taha e afe ti taha e teau e tupe.

6 Ti pehe age a Talila kia Samisoni, Kia tala mai la e koe kia au, po ke heigoa e mena ne malolo lahi ai a koe? po ke heigoa foki e mena ke lili aki a koe kia fakamamahi ai e koe?

7 Ti pehe age a Samisoni kia ia, Kaeke ke lili e lautolu au ke he tau toua mata nakai tavaki ne fitu, ti lolelole ai au, ti eke ni e au ke tuga ne taha tagata.

8 Ti ta hake kia ia he tau iki Filisitia e tau toua mata, nakai tavaki ne fitu, ti lili aki e ia a ia.

9 Ne nonofo ai ke he poko mo ia e tau tagata ne lamalamati kia ia; ti pehe age a ia kia ia, Samisoni na e, kua o mai kia koe e tau tagata Filisitia; ti motumotu ai e ia e tau toua tuga ne motumotu ai e manoa lino kua vela ke he afi; ti nakai kitia ai hana malolo.

10 Ti pehe mai a Talila kia Samisoni, Kitiala, kua fakavai e koe au, kua tala mai foki e koe e tau pikopiko; hanai, kia tala mai e koe kia au po ke heigoa e mena ke lili aki a koe?

11 Ti pehe age a ia kia ia, Kaeke ke lili ai e mutolu au ke he tau toua fou, kua nakaila eke ai ha gahua, ti lolelole ai au, to eke foki ni ke tuga ne taha tagata.

12 Ti uta ai e Talila e tau toua fou kua lili aki e ia a ia, ti pehe age a ia kia ia, Samisoni na e, kua o mai e tau tagata Filisitia kia koe. Ne nonofo ai a lautolu ke he poko ne lamalamati kia ia; ti motumotu ai e ia e tau toua mai he tau lima hana ke tuga ne manoa.

13 Ti pehe age a Talila kia Samisoni, Kua fakavai e koe au ke hoko mai ke he magaaho nai, mo e vagahau pikopiko mai a koe kia au; ti tala mai e koe kia au, ko e heigoa e mena ke lili aki a koe. Ti pehe age a ia kia ia, Kaeke ke lalaga ai e tau fili lauulu ne fitu he haku ulu fakalataha mo e hala he ie.

14 Ti fakamau ai e ia ke he fakamau, ti pehe age a ia kia ia, Samisoni na e, kua o mai kia koe e tau tagata Filisitia. Ti ala ai a ia he mohe, ti aki ai e ia e fakamau he mena kua lalaga, katoa mo e hala he ie.

15 Ti pehe age a ia kia ia, Ko e ha ne pehe mai a koe, kua fakaalofa mai a koe kia au, ka e nakai fakalataha mo au hau a loto? lagatolu ia he fakavai e koe au, to nakai tala mai e koe kia au, po ke heigoa ne toka ai hau a malolo lahi.

16 Kua fakamamahi mai e ia a ia ke he hana tau kupu ke he tau aho oti, kua fakafi mai a ia kia ia; ti fakalolelole ai hana loto, ke hoko ke he mate.

17 Ti tala age e ia kia ia hana loto oti, kua pehe age a ia kia ia, Nakai hoko ha nifo ke he ulu haku; ha ko e naseri ke he Atua au, tali he fanau mai; kaeke ke hifipuga haku ulu, ti fano kehe ai haku a malolo, ti lolelole ai au, ti eke au ke tuga ne tau tagata.

18 Kua kitia e Talila kua tala age e ia kia ia hana loto oti, ti fakafano age ai e ia, mo e ui age ke he tau iki he tau tagata Filisitia, kua pehe age, Kia haele mai a a mutolu, laga taha nai, ha kua tala mai e ia kia au hana loto oti ni. Ti o hake ai kia ia e tau iki he tau tagata Filisitia, ti ta hake ai e lautolu e tau tupe ke he tau lima ha lautolu.

19 Ti fakamohe e ia a ia ki luga hana tau hui; ti ui a ia ke he tagata ti hifipuga ai e ia e tau lauulu fili ne fitu he hana ulu, ti kamata ai e ia ke fakamamahi a ia; ti fano kehe ia ia hana malolo.

20 Ti pehe mai a ia, Samisoni na e, ko e tau tagata Filisitia kua o mai kia koe. Kua ala a ia he mohe, ti pehe age ai a ia, To fina atu au tuga ne fa eke, mo e luelue ai e au a au; ka e nakai iloa e ia kua haele kehe ia ia a Iehova.

21 Ti tapaki he tau tagata Filisitia a ia, ti kape e lautolu hana tau mata; kua ta hifo e lautolu a ia ki Kasa, mo e lili e lautolu a ia ke he tau liliaga apa kula ne ua; ti holo saito ai a ia ke he fale puipui.

22 Ka kua kamata e lauulu he hana ulu ke tupu, ke tuga he aho ne hifipuga ai.

23 Ti fakapotopoto ai e tau iki he tau tagata Filisitia ke eke e poa lahi kia Takono ha lautolu a atua, mo e fiafia ai; kua pehe a lautolu, Kua tuku mai he atua ha tautolu ke he tau lima ha tautolu ha tautolu a fi ko Samisoni.

24 Kua kitia he motu a ia, ti fakaheke ai a lautolu ke he atua ha lautolu, ha kua pehe a lautolu, kua tuku mai he atua ha tautolu e fi ha tautolu ke he tau lima ha tautolu, ko ia ne moumou ha tautolu a fonua, mo e keli ai e ia a tautolu ne tokologa.

25 Kua hoko ke he magaaho kua fiafia ai ha lautolu a tau loto, ti pehe age a lautolu, Kia ui age la kia Samisoni, kia fefeua mai a ia ki mua ha tautolu. Ti ta mai ai e lautolu a Samisoni he fale puipui, ti fefeua ai a ia ki mua ha lautolu; kua fakatu ai e lautolu a ia ke he vaha pou.

26 Ti pehe age a Samisoni ke he fuata, ne toto ai hana lima, Toka e koe au, ke amoamo atu ke he tau pou ne mau ai e fale, ke falanaki atu ai au.

27 Ne puke ai e fale ke he tau tane mo e tau fifine; ha ha i ai e tau iki oti he tau tagata Filisitia; ti ha ha he tua fale ki luga e tau tane mo e tau fifine tokai ko e tolu e afe tagata, kua kitekite, atu a lautolu kia Samisoni kua fefeua ai ki mua ha lautolu.

28 Ti ui atu ai e Samisoni kia Iehova, kua pehe atu, Ko e Iki na e, ko Iehova, kua ole atu ai au kia koe; kia manatu mai a koe kia au, mo e fakamalolo mai kia au laga taha ni, ko e Atua na e, kia taui atu ai au lagataha ke he tau tagata Filisitia ha ko e haku a na mata ua.

29 Ti toto ai e Samisoni e na pou ua ke he lotoga ne mau ai e fale, mo e falanaki ai a ia, ko e taha ke he hana lima matua mo e taha ke he hana lima hema.

30 Ti pehe atu a Samisoni, Kia mate au fakalataha mo e tau tagata Filisitia. Ti fakahuhifo fakamalolo ai a ia, ti veli ai e fale ki luga he tau iki, ki luga foki he motu oti ha ha i ai; kua mua he tokologa ne keli ai e ia ke he hana mate kia lautolu ne keli he moui hana.

31 Ti o hifo ai hana tau matakainaga mo e magafaoa oti he hana matua tane, ti likiti e lautolu a ia, mo e ta hake ai, ti tanu e lautolu a ia ke he vaha a Soraa mo Esitaola ke he tukuaga he hana matua tane ko Manoa. Ne fakafili ai e ia a Isaraela ke he tau tau ne uafulu.