Numera

19 KUA vagahau mai foki a Iehova kia Mose mo Arona, kua pehe mai,

2 Ko e kotofaaga hanai he fakatufono kua poaki mai ai e Iehova, kua pehe mai, Kia vagahau atu e koe ke he fanau a Isaraela kia ta mai e lautolu kia koe e povi fifine kula, kua katoatoa e mitaki, nakai ha i ai ha kelea, nakai hoko foki kia ia e lakau hahamo,

3 Ti tuku atu e lautolu a ia kia Eleasaro ko e ekepoa, ti takitaki ai a ia ki tua he heaga api ti keli ai he taha a ia ki mua hana.

4 Ti uta ai e Eleasaro ko e ekepoa taha maga he toto ke he hana matalima mo e pipi aki lagafitu ke he maga toto hana ki mua he fale uta fano he tutuutaga.

5 Ti huhunu ai he taha e povi fifine ki mua hana; ko e hana kili, mo e hana kakano, mo e hana toto, mo e hana faliu kia huhunu ai.

6 Ti uta foki he ekepoa e akau ko e arasi, mo e hisopo, mo e ie kula momoho, mo e liti ke he afi kua huhunu ai e povi fifine.

7 Ti unu he ekepoa hana tau tapulu, mo e koukou ai hana kakano ke he vai; ka mole ia to hau a ia ke he heagaapi; ti kelea ai foki e ekepoa ato hoko ke he afiafi.

8 Ko ia foki ne huhunu ai e povi kia unu e ia hana tau tapulu ke he vai, mo e koukou ai hana kakano ke he vai, to kelea foki a ia ato hoko ke he afiafi.

9 Ti tanaki ai he tagata ne mea e tau efuefu afi he povi fifine, mo e tuku ai ke he mena toka noa ki tua he heaga api; to ha i ai foki ia ke toka ai ma e fakapotopotoaga he fanau a Isaraela, ke eke aki e vai ma lautolu kua kelea; ko e poa ha ko e hala haia.

10 Ko e tagata foki ne tanaki ai e tau efuefu afi he povi fifine, kia unu e ia hana tau tapulu, to kelea ai foki a ia ato hoko ke he afiafi; to eke foki ia mo fakatufono tukulagi ke he fanau Isaraela, katoa foki mo e tagata kehe kua nofo ia lautolu.

11 Ko ia ke pipiki atu ke he tino he taha tagata kua mate, to kelea ai a ia ke he tau po ne fitu.

12 Kia fakamea e ia a ia ke he vai ia ke ha aho tolu, ti mea ai a ia ke he aho fitu, kaeke ke nakai fakamea e ia a ia ke he aho tolu mo e aho fitu, ti nakai ni mea a ia.

13 Kaeke foki ke pipiki atu e taha ke he tino he tagata kua mate ti nakai fakamea e ia a ia, kua fakakelea ai e ia e faituga a Iehova; to vevehe kehe ni e tagata na ia Isaraela ha kua nakai pīpī aki a ia ke he vai ma lautolu kua kelea, kua kelea a ia; kua toka gaia ni hana kelea kia ia.

14 Ko e fakatufono hanai ka mate ai ha tagata ke he fale ie; ko lautolu ka huhu atu ke he fale ie, mo lautolu oti ha ha he fale ie to kelea ai a lautolu ke he tau po ne fitu.

15 Ko e tau kapiniu oti foki nakai ufia nakai ni lili ai e tau ūfi, to kelea ia.

16 Kaeke ke pipiki atu e taha ke he tagata kua keli ke he pelu kua takaveli ke he vao, po ke tagata mate, po ke hui atua he tagata, po ke tukuaga, to kelea ni a ia ke he tau po ne fitu.

17 Ti uta e lautolu ma e tagata kua kelea mai he efuefu afi he povi fifine ne huhunu, ko e poa ha ko e hala, ti tuku ki ai e lautolu e maga vai he vai puna ke he kapiniu.

18 Ti uta he tagata kua mea e hisopo, mo e fufui ai ke he vai, mo e pīpī aki e fale ie, mo e tau mena oti, katoa mo e tau tagata ne ha i ai, mo ia ne pipiki atu ke he hui atua, po ke tagata ne keli, po ke tagata kua mate, po ke tukuaga.

19 Ti pīpī aki e ia kua mea kia ia ne kelea ke he aho tolu, katoa foki mo e aho fitu; to fakamea ai e ia a ia ke he aho fitu, ti unu e ia hana tau tapulu mo e koukou ke he vai, ti mea ai a ia ka hoko ke he afiafi.

20 Ka ko e tagata kua kelea, ti nakai fakamea e ia a ia to vevehe kehe e tagata ia mo e fakapotopotoaga, ha kua fakakelea ai e ia e faituga a Iehova; nakai pīpī aki a ia ke he vai ma lautolu kua kelea; kua kelea ni a ia.

21 To eke foki e mena nai mo fakatufono tukulagi kia lautolu, ko ia foki ne pīpī ai e vai ma lautolu kua kelea, kia unu ai e ia hana tau tapulu, mo ia foki kua pipiki ke he vai ma lautolu kua kelea to kelea ai a ia ato hoko ke he afiafi.

22 Ko e tau mena oti foki ke pipiki atu ki ai a ia kua kelea, to kelea ia; ko e tagata foki ka pipiki atu ki ai to kelea ai a ia ato hoko ke he afiafi.