Esekielu

38 NE hoko mai foki kia au e kupu a Iehova, kua pehe mai,

2 Ko e tama he tagata na e, kia hagao atu a koe kia Koku he motu a Makoku, ko e iki a Rosi, mo Meseko, mo Tupalu, mo e perofeta atu a koe kia ia.

3 Mo e pehe atu, Kua pehe mai e vagahau he Iki ko Iehova, Kitiala, kua eke a koe mo fi haku, Koku na e, ko e iki a Rosi, mo Meseko, mo Tupalu.

4 To fakaliu atu e au a koe, mo e tui ai e au e tau matau ke he tau kauloa hāu, mo e takitaki atu e au a koe, mo e kau oti hāu, ko e tau solofanua mo e tau tagata heke solofanua, ne tapulu ai a lautolu oti ke he tau tapulu tau katoatoa, ko e motu o tagata tokologa ni, mo e tau akau pāpā, mo e tau akau punuti, ne toto e lautolu oti e tau pelu;

5 Ko Peresia, mo Aitiope, mo Futu, fakalataha mo lautolu; ne ha ha ia lautolu oti e tau akau punuti, mo e tau potiki tau;

6 Ko Komeru mo e hana kau oti; ko e magafaoa foki a Tokaremo mai he fahi tokelau mo e hana kau oti, ko e tau motu loga ni fakalataha mo koe.

7 Tauteute a, kia tauteute a a koe, ko koe mo e hāu a tau moto tagata oti, kua fakapotopoto mai ai kia koe, kia eke foki a koe mo leveki kia lautolu.

8 Ka mole atu e tau aho loga ti ahi ai a koe; ko e tau tau fakamui to hau ai a koe ke he motu kua liuaki mai he pelu, kua fakapotopoto mai ai he tau motu loga ke he tau mouga a Isaraela, ne eke mau mo tau mena kua moumou; ka to ta mai ai he tau motu kehekehe, to nonofo ai a lautolu mo e monuina ko lautolu oti.

9 To hake a koe, to hoko mai a koe tuga ne afā; to tatai a koe mo e aolagi kua ufiufi ai e motu, ko koe, mo e hāu a tau kau oti, mo e tau motu loga ne fakalataha mo koe.

10 Kua pehe mai e vagahau he Iki ko Iehova, Ko e vaha ia to tutupu ai e tau mena ke he loto hāu, to manamanatu ai foki a koe e tau manatu kelea;

11 To pehe a koe, To hake au ke he motu ha i ai e tau māga kua nakai nonofo taue; to fano au kia lautolu kua nonofo fakatekiteki, ko lautolu kua nonofo fakahanoa, ko lautolu oti kua nonofo mo e nakai fai kaupa a lautolu, to nakai fai fakamau fakalava a lautolu, po ke tau gutuhala.

12 Kia uta ai e tau mena ne moua he tau, ke uta foki e tau mena ne fofo he tau, ke hoko e lima hāu ke he tau mena ne eke mo tau mena kua moumou, ka ko ainei kua kakai tuai, ko e motu foki kua fakapotopoto mai he tau motu kehe, ha ha ia lautolu e tau manu mo e tau koloa, kua nonofo a lautolu ke he lotouho he lalolagi.

13 Ko Sihipa, mo Titana, mo e tau tagata fakafuakoloa a Tasisa, mo e hana tau punua leona oti, to pehe atu a lautolu kia koe, Kua hau kia a koe ke uta e tau mena ne fofo he tau? kua fakapotopoto kia e koe e kau hāu ke uta ai e tau mena ne moua he tau? ke uta ai e tau ario mo e tau auro, ke uta e tau manu mo e tau koloa, ke uta e tau mena loga ne fofo he tau?

14 Ko e mena ia, ko e tama he tagata na e, kia perofeta age a, mo e pehe age a koe kia Koku, Kua pehe mai e vagahau he Iki ko Iehova, Ko e vaha ke nonofo fakahanoa ai haku a motu ko Isaraela, to nakai kia iloa e koe?

15 Ti hau ai ni a koe he hau a mena kua nofo ai ke he fahi tokelau, ko koe mo e tau motu loga fakalataha mo koe, kua heke solofanua a lautolu oti, ko e motu o tagata tokologa, mo e kau lahi mahaki.

16 To hake foki a koe ke tau mo e motu haku ko Isaraela, ke tuga e aolagi ke ufia ai e motu; to hoko ai e mena ia ke he vaha fakamui; to ta mai foki e au a koe ke he haku a motu, kia iloa he tau motu a koe, ka fakatapu ai au ia koe ma Koku na e, ki mua ha lautolu.

17 Kua pehe mai e vagahau he Iki ko Iehova; nakai kia ko koe ne vagahau atu ai e au ke he tau aho i tuai ke he haku a tau fekafekau ko e tau perofeta Isaraela, ne perofeta ai a lautolu he vaha ia ke he tau tau, ke ta mai ai e au a koe ke tau mo lautolu?

18 Kua pehe mai foki e Iki ko Iehova, Ko e aho ia ni ke fina atu ai a Koku ke he kelekele a Isaraela; to tupu lahi ai haku a ita lahi.

19 Ko e haku a ita tufuā foki, ko e afi ni he haku a ita kua vagahau ai au, Ko e aho ia ni to ha i ai e mafuike lahi ke he motu ko Isaraela;

20 Ti vivivivi ai ki mua haku e tau ika he tahi, mo e tau manu lele he pulagi, mo e tau manu he vao, mo e tau mena totolo oti kua totolo ke he kelekele, katoa mo e tau tagata oti ha ha he fuga kelekele, to ulu ki lalo foki e tau mouga, to fuluhi foki e tau mena patu, to veveli foki ke he kelekele e tau kaupa oti.

21 To ui foki e au ke he pelu ke he haku a tau mouga oti kia hoko ia kia ia, kua pihia mai e Iki ko Iehova; to takitokotaha foki mo e fakahagao atu hana pelu ke he taha.

22 To fakahala foki e au a ia ke he tatalu mo e toto, to fakato hifo foki e au ki luga ia ia mo e hana tau kau, katoa mo e tau motu loga ha ha ia ia, e uha lahi, mo e uha tuli matafua, ko e afi mo e taio.

23 To fakalilifu e au a au, mo e fakatapu e au a au, to iloa foki au ki mua he tau motu loga, to iloa ai e lautolu ko au ni ko Iehova.