Tau Salamo

33 KIA kalaga fiafia kia Iehova, ko mutolu kua tututonu; kua gali kia lautolu kua mahani hako ke fakaheke atu.

2 Kia fakaheke a kia Iehova ke he kitara; kia uhu lologo kia ia mo e napeli ne hogofulu hana tau filo.

3 Kia lologo atu kia ia ke he lologo fou, kia ta fakamitaki e mutolu e kitara mo e leo fiafia.

4 Ha kua hako ni e kupu a Iehova; kua eke foki e ia hana tau gahua oti ke he fakamoli.

5 Kua fiafia a ia ke he tututonu mo e fakafiliaga tonu; kua puke e lalolagi ke he fakaalofa a Iehova.

6 Ko e kupu a Iehova ne eke ai e lagi; ko e kau oti ha i ai kua eke ia ke he fafagu he hana fofoga.

7 Kua fakapotopoto e ia e puke tahi tuga ne tumutumu; kua tanaki e ia e moana ke he tau fale koloa.

8 Kia matakutaku kia Iehova e lalolagi oti kana; kia matakutaku a kia ia e tau tagata oti kua nonofo ke he atu motu.

9 Ha ko ia ni ne vagahau, ti ha i ai; ko ia kua fekau mai, ti mau ai.

10 Kua fakahui e Iehova e tau pulega he tau motu kehe; ko ia ne teao ai e tau fatuakiloto he tau tagata.

11 Ti tumau e pule a Iehova tukulagi, ko e tau fatuakiloto he hana finagalo ke hahau mo hahau ia.

12 Uhoaki e motu kua Atua kia Iehova, ko e motu kua fifili e ia ke eke māna.

13 Ne kitekite a Iehova mai he lagi, kua fioia e ia e fanau oti kana he tau tagata.

14 Kua kitekite ni a ia mai he mena kua haele ai a ia kia lautolu oti kua nonofo ke he lalolagi.

15 Ne eke e ia ni ha lautolu a tau loto oti; kua manamanatu e ia ha lautolu a tau gahua oti.

16 Nakai fakai ke fakamoui e patuiki he tokologa hana kau; nakai laveaki e tagata toa he hana malolo lahi.

17 Kua nakai aoga e solofanua ke fakamoui taha, ti nakai laveaki e ia taha ke he hana malolo lahi.

18 Kitiala, kua kitekite a Iehova kia lautolu kua matakutaku kia ia, ko lautolu kua amaamanaki ke he hana fakaalofa;

19 Kia laveaki e ia a lautolu mai he mate, kia momoui ai foki a lautolu ke he vaha hoge.

20 Kua talifaki ha tautolu a tau loto kia Iehova; ko ia ni ko e ha tautolu a lagomatai mo e ha tautolu a akau punuti.

21 Ha kua fiafia kia ia ha tautolu a tau loto; ha kua tua a tautolu ke he hana higoa tapu.

22 Iehova na e, kia ha ha i luga ia mautolu hau a fakaalofa, ke lata mo e ha mautolu a amaamanaki kia koe.