Tau Salamo

57 KO e Atua na e, kia fakaalofa mai a koe kia au, kia fakaalofa mai a koe kia au; ha kua tua ni au kia koe; kua tua au ke he malu he hāu a tau tapakau, ato mole atu e tau mena matematekelea nai.

2 To ui atu au ke he Atua Mua ue atu; ko e Atua ni, ko ia kua eke e tau mena oti maku.

3 To fekau mai e ia mai he lagi mo e fakamoui au, ka kua kupu kelea mai a ia ne faguhē mai kia au. Sila. To fekau mai he Atua hana fakaalofa mo e hana fakamoli.

4 Ko au nai, ha he vaha he tau leona au; to takoto ni au ke he vaha ha lautolu ne puhopuho he ita, ko e tau tagata ni, ko e tau nifo ha lautolu ko e tau tao mo e tau fana ia, ko e tau pelu matila foki ha lautolu a tau alelo.

5 Ko e Atua na e, kia mua ue atu a koe ke he lagi; kia ha ha he lalolagi oti hāu a lilifu.

6 Kua taute e lautolu e kupega mo e haku tau hui; kua taofi hifo e lautolu au; kua keli e lautolu e luo ki mua haku, kua to hifo ki ai a lautolu ni. Sila.

7 Ko e Atua na e, kua mau hoku loto, kua mau hoku loto; to lologo atu au, mo e uhu lologo au.

8 Ala mai a haku lilifu; ala mai a, ma napeli, mo e kitara; to ala au ke he magaaho pogipogi.

9 Ko e Iki na e, to fakaheke atu au kia koe ki mua he tau motu; to uhu lologo au kia koe ki mua he tau tagata.

10 Ha kua lahi hāu a fakaalofa kua hoko ni ke he lagi, mo e hāu fakamoli kua hoko ia ke he tau aolagi.

11 Ko e Atua na e, kia tokoluga a koe ki luga he lagi; kia ha ha he lalolagi oti hāu a lilifu.