2 Nofoaga he Tau Patuiki

27 Ne uafulu ma lima e tau tau a Iotamo he eke a ia mo patuiki; ne hogofulu ma ono foki e tau ne patuiki ai a ia i Ierusalema. Ko e higoa he hana matua fifine ko Ierusa ko e tama fifine a Satoka.

2 Ne eke e ia e tau mena tonu ki mua a Iehova, ke lata mo e tau mena oti ne eke he matua tane hana ko Usia; ka e nakai hu atu a ia ke he faituga a Iehova. Ne eke agaia foki he motu e tau mahani kelea.

3 Ne ati ai e ia e gutuhala tapa ki luga he fale a Iehova, mo e eke foki e ia e tau gahua loga ke he kaupa ko Ofele.

4 Ne ati foki e ia e tau maga ke he tau mouga a Iuta, ne ati foki e ia e tau fale kua eke mo tau taue, mo e tau kolo ke he vao motua.

5 Ne tau foki a ia mo e patuiki he fanau a Amoni, mo e kautu a ia kia lautolu. Ti ta age ai he fanau a Amoni kia ia he tau ia taha teau taleni ario, mo e hogofulu e afe kori karite. Ne age ai pihia he fanau a Amoni kia ia ke he tau ne ua aki foki, mo e tau ne tolu aki.

6 Ne malolo a Iotamo he taute ai e ia hana tau puhala ki mua a Iehova hana Atua.

7 Ko e tau mena ne toe ne eke e Iotamo, mo e hana tau tau oti, mo e hana mahani, kitiala, kua tohi ai ke he tohi he tau patuiki a Isaraela mo Iuta.

8 Ko e uafulu ma lima e tau tau hana he eke a ia mo patuiki; ne hogofulu ma ono foki e tau ne patuiki ai a ia i Ierusalema.

9 Ti takoto a Iotamo fakalataha mo e hana tau matua, ti tanu e lautolu a ia ke he maga a Tavita. Ti eke e tama hana ko Ahasa mo patuiki ke hukui aki a ia.