Isaia

53 KO hai kua talia ha mautolu a ogo; kua fakakite kia hai e lima a Iehova?

2 Ne tupu hake a ia tuga ne huli ki mua hana, ke tuga ne vaka akau ke he fonua pakepake; nakai tino mitaki a ia to nakai fulufuluola a ia; ka kitekite a tautolu kia ia nakai mitaki a ia ke manako a tautolu kia ia.

3 Kua vihiatia a ia mo e tiaki he tau tagata; ko e tagata fa fakatutuku, kua mahani foki a ia mo e matematekelea; ti tuga e haga kehe e tau mata ia ia; ne vihiatia a ia ti nakai manatu e tautolu a ia.

4 Ko e moli, kua uta fano e ia ha tautolu a tau matematekelea, ti fua fano e ia ha tautolu a tau mamahi; ka kua manatu e tautolu kua ta a ia, kua fahi a ia he Atua, mo e matematekelea a ia.

5 Ka kua tuina a ia ha ko e tau holifono ha tautolu, kua malipilipi a ia ha ko e tau mahani kelea ha tautolu; ne ha i luga hana e akonakiaga ke mafola ai a tautolu, ko e hana tau kalavalava foki kua malolo ai a tautolu.

6 Ne hehe a tautolu oti po ke tau mamoe, ne takitaha mo e hagao ke he hana ni a puhala; ka e fakahoko e Iehova kia ia e tau mahani kelea ha tautolu oti kana.

7 Ne fakamamahi a ia, ti fakatokolalo e ia a ia, ka e nakai vagahau a ia; tuga ne punua mamoe kua takitaki ke tamate, tuga foki e mamoe kua fakanono a ia ki mua ha lautolu kua helehele hana tau fulu, ti nakai vagahau a ia.

8 Ko e favale he tau tagata mo e fakafiliaga ne uta kehe ai a ia, ko hai foki he hana hau ne manatu ne vevehe kehe a ia mai he motu he tau tagata momoui? he ta ai a ia ha ko e holifono he haku motu.

9 Ne kotofa a ia ke eke hana tukuaga fakalataha mo e tau tagata mahani kelea, ka e fakalataha a ia mo e maukoloa ke he hana matulei; he nakai eke e ia ha mahani favale, ti nakai ha i ai e fakavai ke he hana fofoga.

10 Ka kua finagalo a Iehova ke lipilipi a ia, ne fakamamahi e ia a ia; ka eke ai e ia e poa ha ko e hala, ti kitia ai e ia hana fanau, ti loga ai hana tau aho, to monuina foki ia ia e finagalo a Iehova.

11 Ko e mamahi he hana agaga to kitia e ia, ti makona ai a ia, ha ko e maama mai ia ia, to talahaua tututonu ai e tau tagata tokologa, he haku a fekafekau, kua tututonu, to uta fano foki e ia ha lautolu a tau mahani kelea.

12 Ko e mena ia to vevehe e au māna e veveheaga fakalataha mo e tau tagata tokologa, to vevehe foki e ia e tau mena ne fofo he tau fakalataha mo e tau tagata malolo; ha kua liligi e ia hana moui ke mate; ti totou ai a ia fakalataha mo e tau tagata holifono; ne uta foki e ia e tau hala he tau tagata tokologa, to olelalo atu foki e ia ha ko e tau tagata holifono.