1 Timoteo

4 KA kua talahau fakatonu mai he Agaga, to o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni;

2 Ha ko e fakavai he tau tagata vagahau pikopiko, ko lautolu kua fakavela e tau loto manamanatu hifo ha lautolu ni ke he lapatoa kaka;

3 Kua hataki e lautolu ua fai hoana, ti fono e falu a mena kai, ko e tau mena kua eke he Atua ke talia mo e fakaaue a lautolu kua tua, mo e iloa mitaki e kupu moli.

4 Ha ko e tau mena oti kua eke he Atua, kua mitaki ia, ti nakai fai mena ke tiaki, ka kia talia moe fakaaue;

5 Ha kua fakamea ai ke he kupu he Atua mo e liogi.

6 Kaeke ke tuku atu e koe e tau mena na ke he tau matakainaga, ti eke ai a koe mo fekafekau mitaki a Iesu Keriso, kua fakamahani e koe a koe ke he tau kupu he tua, mo e tau kupu mitaki kua taofi e koe ki ai.

7 Ka ko e tau tala tuai kua kelea, ko e tau tala he tau fifine fuakau goagoa kia kalo kehe ai e koe; ka kia fakamahani ke he mahani Atua.

8 Ha kua aoga fakatote e fakamahani ke he tau mena he tino, ka ko e mahani Atua kua aoga ia ke he tau mena oti kana, he toka ai e mena kua talahaua mai ke he mouiaga nai katoa mo ia kua tatali.

9 Ko e kupu moli haia; kua lata ke talia fakaoti ni.

10 Ha ko e mena ia ni kua gahua ai a tautolu, mo e fakakelea ai a tautolu, ha kua amaamanaki tuai a tautolu ke he Atua moui, ko ia ko e Fakamoui he tau tagata oti, ka e au atu kia lautolu kua tua.

11 Kia tala atu e tau mena ia mo e fakaako ai.

12 Aua neke fakalialia e taha ke he hau a fuata, ka kia eke a koe mo fakafifitaki kia lautolu kua tua ke he kupu, mo e mahani, mo e fakaalofa, mo e loto mo e tua, katoa mo e loto mea.

13 Kia hagaaki totou tohi a koe, ti tomatoma atu, ti fakaako atu, ato fina atu au.

14 Aua neke fakateaga ke he mena fakaalofa ha ia koe, ne tuku atu kia koe ke he perofetaaga, mo e fakalago atu he tau lima he tau patu.

15 Kia manamanatu a koe ke he tau mena na, kia fakamahani a koe ki ai; kia kitia ai he tau tagata oti hāu a mafiti.

16 A koe kia koe ni, katoa mo e hau a fakaako atu, kia tumau ki ai; ha ko e mena ka eke e koe e mena ia ti fakamoui ai e koe a koe, katoa mo lautolu kua fanogonogo kia koe.