Gahua

19 HA ha i Korinito a Apolo, kua mole ki tua ia Paulo e tau fahi tokoluga ati hoko ai a ia ki Efeso; kua kitia ai e ia e falu a tutaki;

2 Kua tala age kia lautolu, Ne moua kia e mutolu a Agaga Tapu ke he vaha ne tua ai a mutolu? Ti pehe mai a lautolu kia ia, Nakai logona ni e mautolu ha kupu ke he Agaga Tapu.

3 Ti pehe age a ia kia lautolu, Ne papatiso a mutolu ke ha? Kua tala mai a lautolu, Ko e papatisoaga a Ioane.

4 Ti kua tala age ai a Paulo, Ne papatiso a Ioane ke he papatisoaga he tokihala, kua tala age ke he tau tagata, kia tua a lautolu kia ia ne mui mai kia ia, ko e Keriso, ko Iesu haia.

5 Kua logona foki e lautolu, ti papatiso ai a lautolu ke he higoa he Iki ko Iesu.

6 Kua fakalago foki e Paulo hana tau lima kia lautolu, ti hoko ai e Agaga Tapu kia lautolu; ti vagahau a lautolu ke he tau vagahau kehekehe, mo e perofeta mai.

7 Ko e tau tagata oti, tokai ko e tokohogofulu ma ua a lautolu.

8 Kua hu a ia ke he sunako, kua fakamatala fakamalolo atu, mo e vagavagahau, mo e ole atu kia lautolu ke he tau mena he kautu he Atua ke he tolu a mahina.

9 Kua fakamao e falu, mo e nakai talia, kua kupu kelea mai ke he puhala nai ki mua he motu o tagata; ati fano kehe ai a ia ia lautolu, mo e vevehe kehe e tau tutaki, kua vagavagahau a ia ke he taha aho mo e taha aho ke he fale akoaga he taha tagata, ko Turano.

10 Ne ua la e tau ne eke ai e mena nai; ti logona ai e lautolu oti ne nonofo i Asia, ko Iutaia katoa mo Heleni e kupu he Iki ko Iesu.

11 Kua eke foki he Atua e tau mana ne mua ke he tau lima a Paulo;

12 Ti kua uta ai e tau holoholo mo e tau ie pa mai he hana tino ke he tau tagata gagao, ati maulu ai e tau gagao ha lautolu, kua o foki ki fafo ia lautolu e tau agaga kelea.

13 Ka e lali ni e falu he tau taulaatua Iutaia, ko lautolu ne o fano, ke totoku e higoa he Iki ko Iesu ki luga ha lautolu ha ha i ai e tau agaga kelea, kua pehe atu, Ko e higoa a Iesu, kua fakamatala e Paulo, kua tala atu ai fakamakamaka e mautolu kia mutolu.

14 Kua eke foki e mena nai he tau tama tane ne tokofitu a Siva, ko e tagata Iutaia, ko e ekepoa ne mua.

15 Ka e tali mai e agaga kelea, kua pehe mai, Kua iloa e au a Iesu, kua iloa foki e au a Paulo, ka ko hai kia a mutolu na?

16 Ati oho mai ai ni e tagata ha i ai e agaga kelea, kua fakamalolo a ia, kua kautu kia lautolu; ti fehola ai a lautolu ki fafo he fale kua nakai fai felevehi, ti kua kafokia.

17 Kua iloa e mena ia e lautolu oti kana ne nonofo i Efeso, ko e tau tagata Iutaia katoa mo e tau tagata Heleni; ti hoko e matakutaku kia lautolu oti kana, kua lilifu foki e higoa he Iki ko Iesu.

18 Ti o mai e tokolaga ha lautolu ne tua, kua fakakite, mo e totoku mai ha lautolu a tau mahani.

19 Na tokologa foki a lautolu ne eke e tau lagatau he tau taulaatua, kua fakapotopoto e lautolu e tau tohi ha lautolu, mo e huhunu ai ki mua he tau tagata oti; ti totou ai e lautolu e taui ke fakalata ki ai, ti limagofulu e afe he tau tupe ario ke moua ai.

20 Ko e mena ia kua tupu ue atu ai, mo e malolo e kupu he Iki.

21 Kua mole e tau mena ia, ti toka ai e Paulo ke he hana loto, ka oti he fai fano i Maketonia mo Akaia, to fano a ia ki Ierusalema, kua pehe a ia, Ka mole he fano ki ai au, ti lata ke ahi e au a Roma.

22 Kua fakafano atu e ia ki Maketonia e tokoua ha lautolu ne fekafekau kia ia, ko Timoteo mo Erato; ka ko ia kua po loga he nofo ai i Asia.

23 Ko e vaha ia kua tupu ai e go lahi ke he puhala nai.

24 Ha ko e taha tagata, ko Temetiu e higoa, ko e tagata laku mena ario, ko ia ne eke e tau faituga ario a Tiana, kua moua ai e tau koloa loga mo e tau tagata he feua ia.

25 Kua fakapotopoto e ia a lautolu, katoa mo e tau eke gahua ke he tau mena pihia, kua tala age, Ma fanau, kua iloa e mutolu, ko e feua nai kua moua ai e tau koloa ha tautolu.

26 Kua iloa foki e mutolu, mo e logona e mutolu, nakai liu mai i Efeso, ka e teitei hoko ki Asia oti kana he takitaki kehe ai e Paulo na e tau tagata tokologa he ole a ia, kua pehe, Nakai ko e tau atua kua eke he tau lima.

27 Ti nakai ko e feua ha tautolu hokoia, kua haofia neke tukulele atu, ka e talahau fakateaga foki mo e faituga he atua fifine ne mua ko Tiana, ko e fakaoti ne fai hana lilifu, ko ia kua tapuaki ki ai Asia oti kana, katoa mo e lalolagi oti.

28 Kua fanogonogo a lautolu, ti puke ai a lautolu ke he vale, kua fakatutu, kua pehe, Kua mua a Tiana he tau tagata Efeso.

29 Ti go auloa mai ai e māga oti; ati tapatapaki atu ai a Kaio mo Aritako, ko e na tagata Maketonia, ko e tau tagata he fenoga a Paulo, mo e feoho a lautolu mo e loto fakalataha ke he fale he kitekiteaga;

30 Kua fia hu atu a Paulo ke he tau tagata, ka e nakai maeke ke he tau tutaki.

31 Ko e falu foki he tau iki a Asia, ko e hana tau kapitiga kua fekau atu e lautolu kia ia, ke ole atu, ua fakamakamaka ke fano ke he fale he kitekiteaga.

32 Kua fakatutu e falu ke he taha mena mo e falu ke he taha mena, ha kua miha a fakapotopotoaga, kua nakai iloa foki he tokologa e mena ne fakapotopoto ai a lautolu.

33 Kua tuku mai e lautolu a Alesana mai he motu o tagata, he omoi mai a ia he tau tagata Iutaia. Kua alo atu foki e Alesana hana lima, kua fia fakatonu atu e ia ke he tau tagata.

34 Kua iloa e lautolu ko e tagata Iutaia a ia, ati fakatatai ai e tau leo ha lautolu oti kana, po ke ua e magaaho, kua fakatutu ai a lautolu, Kua mua a Tiana he tau tagata Efeso.

35 Kua nonofo fakatekiteki e moto tagata he hataki he tohikupu, kua tala age a ia, Ko e tau tagata Efeso na e, ma fanau, ko hai kia e tagata ia kua nakai iloa kua fekafekau e māga nai ko Efeso ke he faituga he atua fifine ne mua, ko Tiana, mo e tupua ne to hifo mai ia Tia?

36 Hanai, ha kua nakai maeke ke talahau kehe taha ke he tau mena nai, kua lata he nonofo fakatekiteki a mutolu, aua foki neke eke fakahanoa ha mena.

37 Nukua takitaki mai e mutolu e tau tagata nai, nakai fofo e lautolu e tau mena tapu, ti nakai kupu kelea ke he atua fifine ha mutolu.

38 Hanai, kaeke ke ha ha ia Temetiu mo e tau tagata eke feua fakalataha mo ia ha talahau ke he taha, kua kotofa e tau aho ke eke ai e fakafiliaga, ha i ai foki e tau iki ke pule; kia hokotaki ai e taha ke he taha.

39 Kaeke foki kua kumi e mutolu e falu a mena kehe, to fakatonu ia ke he fakapotopotoaga kua lata mo e fakatufono.

40 Ha kua haofia neke fakafili a tautolu he mumu fakahoana he aho nai, ti nakai maeke taha kupu ha tautolu ke fakatonu atu e kakano he tanakiaga nai.

41 Kua oti atu e tau kupu ia, ti fakamavehe atu ai e ia e fakapotopotoaga.