Filemoni

Ko e Tohi a Paulo kia Filemoni

1 KO au ko Paulo kua lili ha ko Keriso Iesu, ko e tohi hanai ha maua mo Timoteo ko e matakainaga, kia Filemoni ko e fakahele ko e ekegahua foki fakalataha mo mautolu;

2 Mo Afia ko e fakahele, mo Arekipa ko e kau fakalataha mo mautolu, katoa mo e ekalesia ha he fale hāu;

3 Kia ha ha ia mutolu e fakaalofa noa mo e monuina mai he Atua ko e Matua ha tautolu, katoa mo e Iki ko Iesu Keriso.

4 Kua fakaaue au ke he haku a Atua, kua manatu au kia koe nakai noa ke he haku a tau liogi.

5 He fanogonogo au ke he hau a fakaalofa mo e tua ha ha ia koe ke he Iki ko Iesu, katoa mo e tau tagata tapu oti kana;

6 Kia gahua ni kia Keriso Iesu hau a fakafetui fakalataha mo e tua, kia iloa māli e tau mena mitaki oti ha ha ia mutolu.

7 Ha ko e mena, haku matakainaga na e, kua lahi ha mautolu a fiafia mo e mafanatia ha ko e hau a fakaalofa, he fakamafanatia e tau tagata tapu ha ko koe.

8 Hanai, pete ni kua toka ia au e pule mai ia Keriso ke poaki atu ai kia koe e tau mena kua lata.

9 Ka e ole atu e au kia koe ha ko e fakaalofa, ko au nai ko Paulo ko e motua, ko e vaha nai foki kua lili ha ko Iesu Keriso.

10 Kua ole atu e au kia koe ma Onesemo, ko e tama haku, ne fanau e au ka kua lili na au,

11 Nakai aoga tuai a ia kia koe, ka ko e ainei kua aoga lahi a ia kia koe katoa mo au,

12 Kua fakafano atu e au a ia; kia talia e koe a ia, ko e haku a aloalomanava a ia.

13 Ne loto au ke taofi a ia māku, ke eke mo hukui hau, ke fekafekau mai kia au ke he haku a liliaga ha ko e vagahau mitaki.

14 Ka e nakai fia eke au ha mena ka noa mo e pule hau, neke tuga mo e mena fakamakamaka hau a mahani mitaki mai, ka kia eke mo e loto.

15 Ha ko e mena ligaliga ko e mena ia ne fano kehe ai a ia ke he taha magaaho, kia moua e koe a ia tukulagi;

16 Nakai tuai tuga ne tupa, ka e mua ni ke he tupa, ko e matakainaga fakahele kia au ni, ka e nakai kia au atu ai kia koe ke he tau mena ke lata mo e tino katoa mo e tau mena ke lata mo e Iki?

17 Hanai, kaeke kua manatu e koe kua fakafetui a taua mo koe, kia talia e koe a ia tuga na au ni.

18 Kaeke kua mahani kelea a ia kia koe, po ke ha ia ia e tau mena hau, kia tuku mai kia au e mena ia.

19 Ko au ko Paulo, kua tohi atu e au ke he hoku lima, to taui atu au kia koe; ka e nakai tala atu e au, kua lata ke tuku mai e koe a koe ni kia au.

20 Ko e moli, haku matakainaga na e, kia fakafiafia mai kia au ke he Iki, kia fakamafana mai ke he haku a loto ke he Iki.

21 Kua tohi atu au kia koe ha kua tua ke he hau a omaoma mai, kua iloa e au to eke e koe e tau mena ke mua ke he tau mena kua tala atu ai e au.

22 Ko e taha mena foki, kia taute e koe taha mena ke api ai au; ha kua amaamauaki au ke tuku atu a au kia mutolu, ha ko e tau liogi ha mutolu.

23 Fakaalofa atu kia koe a Epafara, ko ia kua Iili fakalataha mo au ha ko Keriso Iesu.

24 Fakaalofa atu foki a Mareko, mo Aritako, mo Tima, mo Luka, ko e tau ekegahua fakalataha mo au.

25 Kia ha ha he tau agaga ha mutolu e fakaalofa noa he Iki ha tautolu ko lesu Keriso. Amene.