2 Timoteo

4 HANAI, kua tala atu fakalaha au kia koe ki mua he Atua mo e Iki ko Iesu Keriso, ko ia ke fakafili e tau tagata momoui katoa mo lautolu kua mamate, ka hoko ke he hana fakakite mai mo e hana kautu;

2 Kia fakamatala atu e koe e kupu, kia fakamalolo a koe ke he tau aho kua mitaki ai, mo e tau aho kua kelea ai, kia fakatonu atu, kia akonaki atu, kia tomatoma atu ke he fakauka oti katoa mo e fakaako atu.

3 Ha ko e mena to hoko mai e vaha nakai maeke ai ia lautolu ke talia e kupu tonu ka e lata ni mo e tau manako lahi ha lautolu, ke fakapotopoto ai e tau akoako ma lautolu, ha kua magiho a tau teliga ha lautolu;

4 To mafoki kehe foki ha lautolu a tau teliga mai he kupu moli, ka e hagao atu ke he tau tala tuai.

5 Ka ko koe, kia nofo fakalatalata a koe ke he tau mena oti, kia fakauka ke he tau mena ke mamahi ai, kia eke e gahua he tagata fakamatala vagahau mitaki, kia fakakatoatoa ni hāu a feua.

6 Ha ko au kua fakamaligi nai haku a toto, kua tata mai tuai e aho ke fano kehe ai au.

7 Kua tau tuai au ke he tau mitaki, kua fakahiku e au a poitufi, kua taofi au ke he tua.

8 Hanai, kua fakatoka tuai māku e foufou he tututonu, ke foaki mai kia au ke he aho ia he Iki ko e fakafili tututonu; ka e nakai kuenaia kia au, ka e katoa foki mo lautolu oti kana kua fiafia ke he hana fakakite mai.

9 Kia eke taha a koe ke hau vave kia au;

10 Ha kua tiaki tuai e Tima au, he loto a ia ke he mouiaga nai, kua fano foki a ia ki Tesalonia; kua fano a Kerese ki Kalatia, kua fano a Tito ki Talamatia;

11 Ko Luka hokoia kua nofo mo au. Kia o mai a mua mo Mareko; ha kua aoga a ia kia au ke he gahua.

12 Ka ko Tuiko, kua fakafano e au a ia ki Efeso.

13 Ka hau a koe, ti ta mai e koe e tapulu lahi ne toka e au ia Kaepo i Tiroa, katoa mo e tau tohi, ka e au atu ni e tau kilimanu.

14 Loga e tau mena kelea ne eke e Alesana kia au, ko ia ko e eke mena apa kula; kia taui atu he Iki kia ia ke lata mo a hana tau gahua.

15 A koe foki kia ia, ha kua totoko lahi mai a ia ke he tau kupu ha tautolu.

16 Ko e haku a fakatonu atu fakamua nakai fakalataha mai ai e taha kia au, ka kua tiaki au he tau tagata oti kana; aua neke tuku age kia lautolu;

17 Ka e ha ha ia au e Iki, mo e fakamalolo mai kia au; kia fakakatoatoa ha ko au e fakamatalaaga, kia fanogonogo foki ki ai e tau motu oti kana, kua laveaki foki au mai he gutu he leona.

18 To laveaki foki he lki au mai he tau mena kelea oti, mo e fakamoui au ato hoko ke he hana kautu ha he lagi; kia ha ha ia ia e fakahekeaga tukulagi tukumuitea. Amene.

19 Fakaalofa atu kia Pisila mo Akula, mo e magafaoa a Oneseforo.

20 Kua nofo agaia a Erato i Korinito; ka ko Tofimo, ne toka e au a ia i Mileto kua gagao.

21 Kia eke taha a koe ke hau ka e nakaila hoko ke he tau makalili. Fakaalofa atu kia koe a Eupolo, mo Paute, mo Lino, mo Kalaotia, mo e tau matakainaga oti kana.

22 Kia ha ha he agaga hāu e Iki ko Iesu Keriso. Kia ha ha ia mutolu e fakaalofa noa. Amene.