Mataio

13 KO e aho foki haia, kua hu ai a Iesu ki fafo he fale, kua nofo hifo ke he tapa vai;

2 Ati fakapotopoto mai ai kia ia e lanu tagata tokologa, ko e mena ia ne hake ai a ia ke he foulua kua nofo ai; kua tutu mai ai foki e lanu tagata oti ke he kauvai.

3 Kua vagahau atu a ia kia lautolu ke he tau mena loga ke he tau kupu fakatai, kua pehe age, Kitiala, kua fina atu e tagata gana saito ke gana e tau saito.

4 Ha ha ne gana e ia e tau saito, kua mokulu ai falu ke he kauhala; ati o mai ai e tau manu lele, mo e kai ai.

5 Kua mokulu foki falu ke he mena patu, tote e kelekele ne toka ai; ti tupu tuai ai ha ko e kelekele ne tote;

6 Kua hake e la, ti vela ai, ti kua fifigo ni, he nakai fai vaka.

7 Kua mokulu foki falu ke he vao mahukihuki, kua tutupu foki e vao mahukihuki, mo e apitia ai.

8 Kua mokulu foki falu ke he kelekele mitaki kua fua mai ai, takiteau e falu, takionogofulu e falu, ka e takitolugofulu e falu.

9 Ko ia ne fai teliga ke fanogonogo aki, ati fanogonogo mai a a ia.

10 Ti o mai ai hana tau tutaki, kua pehe mai kia ia, Ko e ha ne vagahau atu ai a koe kia lautolu ke he tau kupu fakatai?

11 Ati tala age ai a ia kua pehe age kia lautolu, Kua foaki atu kia mutolu ke iloa ai e mutolu e tau mena galo he kautu he lagi; ka e nakai foaki atu kia lautolu.

12 Ha ko ia kua moua, to foaki atu kia ia, ke au atu ai he loga hana tau mena; ka ko ia nakai moua, to uta kehe ia ia e mena kua moua.

13 Ko e mena ia kua vagahau atu ai au kia lautolu ke he tau kupu fakatai; ha kua kitekite a lautolu, ka e nakai kitia e lautolu; kua fanogonogo foki a lautolu ka e nakai logona, ai, ti nakai maama a lautolu.

14 Kua fakamoli ai kia lautolu e talahauaga a Isaia, ne pehe mai, To fanogonogo ni a mutolu, ka e nakai maama ai a mutolu; to kitekite foki a mutolu, ka e nakai kitia e mutolu.

15 Ha ko e mena kua matolu e tau loto he motu nei, ti nakai fanogonogo ha lautolu a tau teliga he fanogonogo, kua momohe fakakikivi ha lautolu a tau mata; neke kitia ha lautolu a tau mata, mo e fanogonogo ha lautolu a tau teliga, mo e logona ha lautolu a tau loto, mo e mafokifoki mai a lautolu, mo e fakamalolo ne au a lautolu.

16 Uhoaki ha mutolu a tau mata, nukua kitekite; mo e tau teliga ha mutolu, nukua fanogonogo.

17 Ha ko e moli ke tala atu e au kia mutolu, tokologa e tau perofeta mo e tau tagata tututonu ne manako ke kitia e tau mena kua kikite a mutolu ki ai, ka e nakai kitia; ne fia fanogonogo foki a lautolu ke he tau mena kua fanogonogo a mutolu ki ai, ka e nakai ni fanogonogo ai.

18 Hanai, kia fanogonogo mai a a mutolu ke he fakatai ke he tagata gana saito.

19 Ka fanogonogo taha ke he kupu he kautu, ka e nakai maama, ti hau ai a ia ne kelea, kua fofo e tau mena ne gana ke he hana loto; ko e mena haia ne gana ke he kauhala.

20 Ha ko e mena ne gana ke he mena patu, ko e tagata haia kua fanogonogo ke he kupu, ti talia ai agataha mo e fiafia.

21 Ka e nakai fai vaka a ia, ti nakai leva foki hana tumau; ka tupu e matematekelea, po ke favale ha ko e kupu, ati tupetupe ai agataha a ia.

22 Ko e mena ne gana ke he vao mahukihuki, ko ia haia ne fanogonogo ke he kupu, ka ko e fakaatukehe ke he tau mena he lalolagi nai, mo e fakavai he koloa, kua apitia ai e kupu, ti nakai fua mai ai.

23 Ka ko e mena ne gana ke he kelekele mitaki, ko ia haia kua fanogonogo ke he kupu mo e maama ai; kua fua mai foki ia kua takiteau e falu, kua takionogofulu e falu, ka e takitolugofulu e falu.

24 Kua tala age e ia e taha fakatai kia lautolu, kua pehe age, Kua fakatai e kautu he lagi ke he tagata ne gana e tau saito mitaki ke he hana kaina;

25 Kua momohe e tau tagata, ati fina age ai a ia kua fai fi kia ia, kua gana e ia e tau titania ki luga he tau saito, ti fano kehe ai a ia.

26 Kua gotogoto e tau saito, kua fua mai, ti kitia ai e tau titania.

27 Ati o mai ai e tau fekafekau he patu he magafaoa, kua pehe mai kia ia, Ko e iki na e, ka e nakai kia ko e tau saito mitaki ne gana e koe ke he hau a kaina? Hanai, po ke mai fe kia e tau titania?

28 Ti tala age ai a ia kia lautolu, Kua eke e mena ia he tagata ne fai fi mai. Ati tala, age ai e tau fekafekau kia ia, Po ke finagalo nakai a koe ke o atu a mautolu mo e huo kehe e tau mena ia?

29 Ka kua tala age a ia, Aua ia; neke huo e mutolu mo e tau saito ka huo kehe e mutolu e tau titania.

30 Toka ai ke tupuua ai pihia, ato hoko ke he heleheleaga; ka hoko atu ke he vaha ke helehele ai, to tala age ai e au kia lautolu ka helehele, Kia huo mai fakamua e mutolu e tau titania, mo e fuhi e mutolu ke he tau fuhi ke huhunu ai; ka e tanaki mai e mutolu e tau saito ke he haku a fale saito.

31 Kua tala age foki e ia e taha fakatai kia lautolu, kua pehe age, Lata e kautu he lagi mo e fua sinapi, ne uta he taha tagata mo e to ke he hana kaina.

32 Tote foki a ia he tau fua oti he tau akau; ka oti he tupu ti mua a ia ke he tau akau mateafu, ati oti ka e akau lahi ni, kua o mai e tau manu lele, mo e momohe ke he hana tau la.

33 Kua vagahau foki a ia kia lautolu ke he taha fakatai, Kua lata e kautu he lagi mo e mena fakaea kua uta he taha fifine, mo e tuku i loto he falaoa lagatolu e fafati, ati oti ka e ea oti ai.

34 Kua vagahau e Iesu e tau mena oti na ke he lanu tagata ke he tau fakatai; ko e tau fakatai hokoia ne vagahau atu ai a ia kia lautolu;

35 Kia fakamoli ai e kupu he perofeta ne pehe mai, To vagahau atu au ke he tau fakatai, to tala atu e au e tau mena ne galo tali mai he fakave e lalolagi.

36 Ti kua toka e ia e lanu tagata, ka e hu atu a Iesu ke he fale; ti o mai ai kia ia hana tau tutaki, kua pehe mai, Kia fakamatala mai e koe kia mautolu e fakatai ke he tau titania he kaina.

37 Ati tala age ai a ia, kua pehe age kia lautolu, Ko ia ne gana e tau saito mitaki, ko e Tama he tagata haia;

38 Ko e kaina foki, ko e lalolagi haia; ko e tau saito mitaki, ko e fanau haia he kautu; ko e tau titania, ko e fanau haia hana kua kelea;

39 Ko ia ne fai fi mai, ne gana e ia e tau mena ia, ko e tiapolo haia; ko e heleheleaga, ko e fakaotiaga haia he lalolagi; ko lautolu ke helehele, ko e tau agelu haia.

40 Hanai, tuga ne huo mai e tau titania, mo e huhunu ke he afi, to eke pihia foki ke he fakaotiaga he lalolagi nai.

41 To fakafano atu he Tama he tagata hana tau agelu, to fakapotopoto mai e lautolu he hana kautu a lautolu oti kua fakatupetupe mo lautolu kua mahani kelea.

42 To liti a lautolu ki loto he gutuumu kaka; ha ha i ai e tagi aue mo e konoi he tau nifo.

43 Ati kikila ai a lautolu kua tututonu tuga ne la ke he kautu he Matua ha lautolu. Ko ia ne fai teliga ke fanogonogo aki, ati fanogonogo mai a a ia.

44 Kua lata foki e kautu he lagi mo e koloa kua galo ke he fonua; kua kitia he taha tagata, ati fufu ai e ia; ko e hana fiafia foki kua fano ai a ia, kua fakafua atu hana tau mena oti, ti fakafua aki mai e fonua ia.

45 Kua lata foki e kautu he lagi mo e tagata fakafua koloa, kua kumikumi e tau penina mitaki;

46 Kua kitia ai foki e ia taha penina fakafua lahi, ati fano ai a ia, kua fakafua atu hana tau mena oti ti fakafua aki mai.

47 Kua lata foki e kautu he lagi mo e kupega kua liti ke he tahi, kua moua ai e tau ika kehekehe oti.

48 Kua puke ti toho hake ai e lautolu ke he mataafaga, kua nonofo ai mo e fafao e tau ika mitaki ke he tau oa; ka ko e tau ika kelea kua tiaki.

49 To pihia foki ke he fakaotiaga he lalolagi; to o atu e tau agelu ke vevehe kehe e tau tagata mahani kelea mo e tau tagata tututonu,

50 Ti liti e lautolu a lautolu ke he gutuumu kaka; ha ha i ai e tagi aue mo e konoi he tau nifo.

51 Ti pehe atu ai a Iesu kia lautolu, Kua logona nakai e mutolu e tau mena oti na? Kua tala age a lautolu kia ia, E, ko e Iki na e.

52 Ti tala age ai a ia kia lautolu, Hanai, ko e tau tohikupu oti kua fakaako ke he tau mena he kautu he lagi, kua lata a lautolu mo e patu he magafaoa, kua ta mai e tau mena fou mo e tau mena tuai mai he fale koloa hana.

53 Kua fakahiku e Iesu e tau fakatai nai, ati haele kehe ai a ia he mena ia.

54 Kua hoko atu foki a ia ke he hana māga, ati fakaako atu ai a ia kia lautolu ke he sunako ha lautolu; ti kua ofomate ai a lautolu, kua pehe age, Po ke moua mai fe he tagata nai e pulotu nai mo e tau mana ia?

55 Ka e nakai kia ko e tama he tagata ta fale hanei? ka e nakai kia ko Maria e higoa he hana matua fifine, ko e hana tau matakainaga foki ko Iakopo, mo Iose, mo Simona, mo Iuta?

56 Ka e nakai kia ha ha ia tautolu hana lafu mahakitaga oti? ka e moua mai fe he tagata nai e tau mena oti ia?

57 Ati tupetupe ai a lautolu ia ia. Ka kua tala age a Iesu kia lautolu, Nakai noa ha perofeta mo e lilifu, ko e hana māga mo e hana magafaoa hokoia nakai lilifu ai.

58 Kua nakai loga foki e tau mana ne eke e ia he mena ia, ha ko e nakai tua ha lautolu.