Esoto

6 TI pehe mai ai a Iehova kia Mose, To kitia ainei e koe e mena ke eke e au kia Farao; ha ko e lima malolo ke toka atu ai a lautolu ke o, ko e lima malolo foki ke vega ai e ia a lautolu mai hana motu.

2 Kua vagahau mai foki e Atua kia Mose mo e pehe mai kia ia, Ko au nai ko Iehova,

3 Na fakakite a au kia Aperahamo, mo Isaako, mo Iakopo ke he higoa ko e Atua mana; ka ko e haku a higoa ko Iehova, kua nakai iloa ai e lautolu au.

4 Kua fakamau foki e au haku a maveheaga mo lautolu, ke ta atu kia lautolu e motu ko Kanana, ko e motu ne nonofo fakapaea ai a lautolu, ne nonofo api ai a lautolu.

5 Kua logona foki e au ni e tauoi he fanau a Isaraela, kua fakatupatupa he tau tagata Aikupito, kua manatu foki e au haku maveheaga.

6 Ko e hanai, kia tala atu ke he fanau a Isaraela, Ko au ko Iehova, to ta mai e au a mutolu i lalo he tau kavega mamafa a Aikupito; to laveaki foki e au a mutolu mai he tau gahua ha lautolu; to fakamoui foki e au a mutolu mo e lima fakaolo mo e tau fakahala lalahi.

7 To eke foki e au a mutolu mo motu maku, to eke foki au mo Atua ma mutolu; ti iloa ai e mutolu ko au ni ko Iehova, ko e ha mutolu Atua, ko ia ke ta mai a mutolu i lalo he tau kavega mamafa a Aikupito.

8 To atu foki e au a mutolu ke he motu ne nikiti ai e au haku lima ke ta atu e au kia Aperahamo mo Isaako, mo Iakopo, to ta atu ai e au kia mutolu ma mutolu, ko au ni ko Iehova.

9 Kua vagahau atu pihia e Mose ke he fanau Isaraela, ka e nakai fanogonogo a lautolu kia Mose ha ko e loto mamahi mo e gahua uka.

10 Kua vagahau mai foki e Iehova kia Mose, kua pehe mai.

11 Fano a, tala age kia Farao ko e patuiki a Aikupito kia toka ai e ia e fanau Isaraela ke o kehe mo e hana motu.

12 Ka kua vagahau atu e Mose ki mua a Iehova, kua pehe atu, Kitiala, kua nakai fanogonogo mai kia au e fanau Isaraela, to fanogonogo mai fefe a Farao kia au; ko au foki nakai gutu mahifi au?

13 Ne vagahau mai foki e Iehova kia Mose mo Arona, mo e fekau atu a laua ke he fanau Isaraela katoa mo Farao e patuiki a Aikupito, kia uta e laua e fanau Isaraela mai he motu ko Aikupito.

14 Ko e tau tupuna hanai he tau magafaoa he ha lautolu a tau matua tane. Ko e tau tama hanai a Reupena, ko e tama uluaki a Isaraela; ko Hanoka mo Falu ko Hesarona, mo Karame; ko e tau magafaoa haia a Reupena.

15 Ko e tau tama foki a Simeona; ko Iemuelu, mo Iaminu, mo Oata, mo Iakinu, mo Soharo, mo Saulo ko e tama haia he fifine Kanana; ko e tau magafaoa ia a Simeona.

16 Ko e tau higoa hanai he tau tama a Levi ke he ha lautolu a tau hau; ko Keresoma, mo Koato mo Merari. Ko e tau tau foki ne moui ai a Levi, ko e taha e teau ia, ti tolugofulu, ti fitu ni e tau.

17 Ko e tau tama a Keresoma ke he ha laua a magafaoa; ko Lepeni mo Simei.

18 Ko e tau tama foki a Koato; ko Amaramo, mo Isara, mo Heperona, mo Usialu. Ko e tau tau foki ne moui ai a Koato, ko e taha teau ia, ti tolugofulu, ti tolu ni e tau.

19 Ko e tau tama foki a Merari; ko Mahali mo Muse; ko e tau magafaoa haia a Levi ke he tau hau ha lautolu.

20 Kua faihoana foki a Amaramo kia Iokapeta ko e mahakitaga he hana matua tane; ne fanau foki e ia kia ia ko Arona mo Mose. Ko e tau tau foki ne moui ai a Amaramo, ko e taha teau ia, ti tolugofulu, ti fitu ni e tau.

21 Ko e tau tama foki a Isara; ko Koru, mo Nefeku mo Sikari.

22 Ko e tau tama foki a Usialu; ko Mesalu, mo Elisafano, mo Siteri.

23 Kua faihoana a Arona kia Elisapeta, ko e tama fifine a Aminatapu, ko e mahakitaga a Nahasona; ne fanau mai foki e ia kia ia ko Natapu, mo Avihu, ko Eleasaro, mo Itamaro.

24 Ko e tau tama foki a Koru; ko Asiro, mo Elekana, mo Aviasafo; ko e tau magafaoa haia he faoa a Koru.

25 Kua faihoana foki a Eleasaro ko e tama a Arona ke he taha tamafifine a Potielu; ne fanau foki e ia kia ia ko Finehaso. Ko e tau tupuna haia he tau matua tane he faoa a Levi ke he tau magafaoa ha lautolu.

26 Ko Arona mo Mose ia ne vagahau e Iehova ki ai, kia uta e laua e fanau Isaraela mai he motu ko Aikupito ke he tau kau ni ha lautolu.

27 Ko laua na ne vagahau atu kia Farao e patuiki a Aikupito, kia uta e laua e fanau Isaraela mai Aikupito; ko Mose mo Arona haia.

28 Kua hoko ke he aho ne vagahau mai ai a Iehova kia Mose ke he motu ko Aikupito;

29 Kua vagahau mai ai a Iehova kia Mose, kua pehe mai, Ko au ko Iehova; tala age ā kia Farao ko e patuiki a Aikupito e tau mena oti ne tala atu ai e au kia koe.

30 Ti pehe atu a Mose ki mua a Iehova, Kitiala, ko au kua nakai gutu mahifi au; po ke fanogonogo mai fefe a Farao kia au?