Esoto

14 KUA vagahau mai a Iehova kia Mose kua pehe mai,

2 Kia tala age e koe ke he fanau a Isaraela, kia liliu age a lautolu mo e he api ki mua a Pehairota, ke he vaha a Mikatolo mo e tahi, ki mua a Paala-sefono, to he api a mutolu fehagai mo ia tata age ke he tahi.

3 Ka to pehe a Farao ke he fanau a Isaraela, Kua hehe fano a lautolu ke he motu, kua puipui tuai he tutakale a lautolu.

4 To fakamao e au e loto a Farao, ti tutuli mai e ia kia mutolu, to lilifu ni au ia Farao katoa mo e hana tau kau oti kana, ti iloa ai e Aikupito, ko au ni ko Iehova. Kua eke pihia ni e lautolu.

5 Ti tala age ke he patuiki a Aikupito, kua fehola e motu; ti maliu ai e loto a Farao mo e hana tau fekafekau ke he motu ti kua pehe a lautolu, Ko e heigoa e mena nai kua eke e tautolu he toka ai e tautolu a Isaraela ke o, mo e nakai fekafekau mai kia tautolu?

6 Ti taute ni hana kariota, kua o foki a lautolu mo e hana motu.

7 Ne uta foki e tau kariota kua homo, ono ni e teau, mo e tau kariota oti ni a Aikupito, kua takitaha mo e hana tau toa.

8 Kua fakamao e Iehova e loto a Farao ko e patuiki a Aikupito, ti kua tutuli e ia e fanau a Isaraela mo e lima malolo.

9 Ti tutuli he tau tagata Aikupito a lautolu, ti moua a lautolu ha ne api tata age ki tahi, (ko e tau solofanua oti, mo e tau kariota a Farao, mo e hana tau kau heke solofanua, mo e hana tau kau,) kua tata age ki Pehairota, ki mua ni a Paala sefono.

10 Ha ne fakatata atu ki ai a Farao, ti haga atu ai e fanau a Isaraela, kitiala ko Aikupito ha ne mumui mai kia lautolu; ti matakutaku lahi ai a lautolu, ti tagi atu e fanau a Isaraela kia Iehova.

11 Ti pehe atu a lautolu kia Mose, Ha kua nakai fai tukuaga kia i Aikupito kua ta mai ai e koe a mautolu ke mamate ke he tutakale? Ko e heigoa kia e mena nai kua eke e koe kia mautolu he ta mai e koe a mautolu i Aikupito.

12 Nakai kia ko e mena nai ne tala atu ai e mautolu kia koe i Aikupito, na pehe atu, Kia toka pihia a mautolu kia fekafekau ai a mautolu ke he tau Aikupito; ha ko e mena mitaki ane fekafekau a mautolu ke he tau Aikupito, ka e kelea ke mamate a mautolu ke he tutakale.

13 Ti pehe mai a Mose ke he motu, Ua matakutaku a mutolu, ka e tutu a mutolu mo e kitekite ke he fakamouiaga mai ia Iehova, ko e eke ne fai e ia ma mutolu ke he aho nai; ha ko e tau tagata Aikupito kua kitekite a mutolu ki ai ke he aho nai, nakai tuai kitia foki a lautolu tukulagi.

14 To tau a Iehova ma mutolu, ka e nonofo fakalogologo a mutolu.

15 Ti pehe mai a Iehova kia Mose, Ko e ha ne tagi mai ai a koe kia au? Tala age a ke he fanau a Isaraela ke o atu a lautolu;

16 Ka ko koe, kia nikiti ki luga hau a tokotoko, mo e fakaolo atu hau a lima ki luga he tahi, mo e vevehe ua ai e koe; to o atu ai e fanau a Isaraela ke he vaha loto he tahi ke he hala toka momo.

17 Ko au foki, kitiala, to fakamao e au e tau loto he tau tagata Aikupito ke mumui atu a lautolu kia lautolu; to lilifu ni au ia Farao, mo e hana tau kau oti kana, ko e hana tau kariota, katoa mo e hana tau kau heke solofanua.

18 Ti iloa ai e Aikupito ko au ni ko Iehova, ka lilifu au ia Farao, ko e hana tau kariota, mo e hana tau kau heke solofanua.

19 Ti fina age ai e agelu he Atua, ko ia ne mua ke he tau kau a Isaraela, kua fina age a ia, kua mui atu kia lautolu; kua fano foki e aolagi fakatupou mai mua ha lautolu, mo e tu ki tua ha lautolu.

20 Kua fano ni a ia ke he vaha he kau a Aikupito mo e kau a Isaraela, kua eke mo aolagi mo e pouli ki tua, ka ko e maama ke he po ki mua; ti nakai fakatata mai e taha ke he taha ke he po oti ni.

21 Ti fakaolo atu e Mose hana lima ki luga he tahi, ti fakatafe e Iehova e tahi hala kehe ke he matagi lahi mai i uta ke he po oti, kua eke foki e tahi mo kelekele momo, ti veveheua ai e tahi.

22 Ti o atu ai e fanau a Isaraela ki loto he tahi ke he hala toka momo; kua eke foki e tahi mo kaupa kia lautolu ke he fahi matua ha lautolu, katoa mo e fahi hema ha lautolu.

23 Ti tutuli ni he tau Aikupito, kua mumui atu kia lautolu ki loto he tahi, ko e tau solofanua oti a Farao, mo e hana tau kariota, mo e hana tau kau heke solofanua.

24 Kua hoko ke he leoleoaga magaaho pogipogi ti kitekite atu e Iehova ke he tau kau a Aikupito mai he afi me e aolagi fakatupou, ti fakalavelave e ia e tau kau a Aikupito.

25 Ti uta kehe e ia e tau mene ne taveli aki e tau kariota ha lautolu, kia matoho uka ni; ti pehe ai e tau Aikupito, Kia fehola a tautolu ia Isaraela; ha ko Iehova kua tau ma lautolu ke he tau tagata Aikupito.

26 Ti pehe mai ai a Iehova kia Mose, Kia fakaolo hau a lima ki luga he tahi, kia liu mai e puke tahi ki luga he tau tagata Aikupito, ki luga hana tau kariota, katoa mo e hana tau kau heke solofanua.

27 Ti fakaolo e Mose hana lima ki luga he tahi ti liu mai e tahi ke he magaaho pogipogi ke he hana ni a tokaaga: kua fehola kehe a Aikupito mo e hana tutāga; kua liti hifo e Iehova e tau tagata Aikupito ki loto he tahi.

28 Kua liu e puke tahi, ti ufitia ai e tau kariota, mo e tau kau heke solofanua, ko e tau kau oti a Farao ne mumui atu kia lautolu ke he tahi; nakai ni toe taha ia lautolu.

29 Ka ko e fanau a Isaraela ne o a lautolu hala toka momo ke he vaha loto he tahi; kua eke foki e puke tahi mo kaupa kia lautolu ke he fahi matau ha lautolu, katoa mo e fahi hema ha lautolu.

30 Ne laveaki e Iehova a Isaraela ke he aho ia mai he lima a Aikupito; ne kitia foki e Isaraela e tau tagata Aikupito ke he mataafaga, kua mamate.

31 Kua kitia foki e Isaraela e mana ia ne eke e Iehova ke he tau tagata Aikupito, ti matakutaku ai e motu kia Iehova; ti tua a lautolu kia Iehova katoa mo e hana fekafekau ko Mose.