Tau Salamo

51 KO e Atua na e, kia fakaalofa mai a koe kia au, ke lata mo e hau a fakaalofa; ke lata mo e lahi he hau a fakaalofa hofihofi, kia holoholo kehe haku a tau holifono

2 Kia mulu fakalahi e koe au ke he haku a tau mahani hepehepe, mo e fakamea e koe au he haku a tau hala.

3 Ha kua iloa ni e au haku a tau holifono; ha i mua foki ia au haku tau hala nakai noa.

4 Kua hala tuai au kia koe hoko koe ni; ne eke foki e au e mena kelea nai ki ho mua; kia tonu ai a koe ke he hāu a vagahau, kia hako foki a koe ka fakafili mena e koe.

5 Kitiala, ne fanau au mo e mahani hepehepe; ne fatu foki haku matua fifine ia au mo e hala.

6 Kitiala, kua finagalo a koe ke he fakamoli he loto; kia fakailoa mai foki e koe kia au e iloilo ke he mena galo.

7 Kia fakamea e koe au ke he hisopo, ti mea na au; kia mulu e koe au, ti mua haku a hina ke he kiona.

8 Kia fakafanogonogo e koe au ke he olioli mo e fiafia; ti fiafia ai e tau huimotua kua lipilipi e koe.

9 Kia haga kehe hāu a fofoga mo e haku a tau hala, mo e holoholo kehe e koe haku a tau mahani hepehepe oti kana,

10 Ko e Atua na e, kia eke e koe e loto meā maku; mo e fakafou e loto mau ki loto ia au.

11 Aua neke tiaki e koe au i mua hāu; aua foki neke uta kehe hāu a Agaga Tapu ia au.

12 Kia liuaki mai e koe kia au e fiafia ha he fakamouiaga mai ia koe; kia toto mau e koe au mo e loto fiafia.

13 To fakaako e au e tau holifono ke he hāu a tau puhala; ti liliu atu ni kia koe e tau tagata hala.

14 Ko e Atua na e, ko e Atua he haku a fakamouiaga, kia laveaki e koe au mai he hala he toto; ti lologo fiafia ai haku alelo ha ko e tututonu mai ia koe.

15 Ko e Iki na e, kia vevete mai e koe haku tau laugutu; ti tokutoku atu haku gutu hāu a fakahekeaga.

16 Ha kua nakai finagalo a koe ke he poa; ane pihia po kua ta atu ni e au; kua nakai fiafia a koe ke he poa huhunu.

17 Ko e tau poa ke he Atua ko e loto malipilipi ia; ko e Atua na e, nakai vihiatia e koe e loto malipilipi mo e pehia.

18 Kia fakamonuina e koe a Siona ke he hāu a finagalo fakaalofa; kia ati hake e koe e tau pa a Ierusalema.

19 Ti finagalo ai a koe ke he tau poa tonu, ko e poa huhunu, mo e poa huhunu oti; ti ta hake ai e lautolu e tau povi tane ke he hāu a fatapoa.