Tau Salamo

55 KO e Atua na e, kia fakateliga mai a koe ke he haku a liogi, aua foki neke kalo kehe a koe ka ole atu au.

2 Kia fanogonogo mai a koe kia au, mo e talia e koe au; kua fakaatukehe au ke he haku a manamanatu, to hea ai na au;

3 Ha ko e leo hana ne fai fi mai, ha ko e favale he tagata mahani kelea; ha kua tuku mai e lautolu kia au e mahani hepehepe, ko e ita ni kua favale mai ai a lautolu kia au.

4 Kua hopo haku a ate ki loto ia au; kua to foki kia au e matakutaku ke he mate.

5 Kua hoko mai kia au e matakutaku mo e vivivivi; kua moua ni au he matakutaku lahi.

6 Ti pehe atu au, Ko hai ke ta mai maku e tapakau poke lupe? Ti lele kehe ai au, mo e nofo mau ai.

7 Kitiala, to hola mamao atu au, mo e nofo ni ke he vao. Sila.

8 To fakatepetepe au ke hola, ha ko e matagi lahi mo e afa.

9 Ko e Iki na e, kia fakaotioti e koe a lautolu, kia veveheua ha lautolu a tau pulega: ha kua kitia e au e favale mo e latau ke he maga.

10 Kua takai e laua a ia ke he hana pa ke he aho mo e po; ha i loto ia ia e mahani hepehepe mo e malaia;

11 Ha i loto ia ia e mahani matahavala; ti nakai fano kehe mo e hana male e favale mo e pikopiko.

12 Ha ko e mena nakai ko ia ne fai fi kia au ne eke fakakelea mai kia au; ane mai ko ia po kua fakauka au ki ai; nakai ko ia ne ita mai kia au ne fakatokoluga mai kia au, ane mai ko ia po kua fakamumuli au kia ia,

13 Ka ko koe ni ko e tagata kua tatai a taua mo au; ko e haku a kapitiga ni, ne mahani fakalataha a taua;

14 Ne fevagavagahauaki fakalataha a taua mo e fiafia, ne o a taua fakalataha mo e moto tagata ke he fale he Atua.

15 Kia hoko fakalutukia kia lautolu e mate; kia o hifo moui a lautolu ki seoli; ha kua ha i ai e tau mena kelea ke he tau mena kua nonofo ai a lautolu, ha i loto ia lautolu ni.

16 Ka ko au, to ui atu ni au ke he Atua; to fakamoui mai e Iehova au.

17 Ko e afiafi, mo e pogipogi, mo e tupou la, ke tagi atu ai au, mo e kalaga atu ai au; ti fanogonogo mai ai a ia ke he haku a leo.

18 Ne laveaki e ia au mai he tau ha ha ia au, kia mafola ai au; ha kua tokologa a lautolu ha ha ia au.

19 To fanogonogo e Atua, mo e fakamamahi a lautolu; ko ia ni ne nofo tali mai i tuai tigahau. Sila. Kua nakai fehikitaki a lautolu, mo e nakai matakutaku a lautolu ke he Atua.

20 Kua fakahoko atu hana tau lima kia lautolu ne nonofo fakamitaki mo ia kua holi e ia e maveheaga hana.

21 Kua molemole hana gutu tuga ne puke huhu tuli, ka ko e faitaua ha he loto hana; kua mua e molulu he hana tau kupu ke he puke lolo, ka ko e tau pelu ni kua āki.

22 Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.

23 Ka ko koe ko e Atua na e, to palu e koe a lautolu ke he luo ke popo ai; ko e tau tagata lima toto mo e pikopiko, nakai hohoko a lautolu ke he lotoga he tau aho ha lautolu; ka ko au, to tua ni au kia koe.