Efeso

3 HA ko e mena ia, ko au ko Paulo kua lili ha ko Keriso Iesu, ha ko mutolu ko e tau tagata he tau motu kehe;

2 Kaeke ko e moli kua logona e mutolu ke he tauteaga he fakaalofa noa he Atua kua foaki mai kia au ma mutolu,

3 Kua fakailoa mai e ia kia au ke he fakakiteaga e mena kua galo, (tuga ne tohi tuai e au kia mutolu ke he tau kupu gahoa,

4 Ka totou ai ti maeke ia mutolu ke iloa ai haku a iloilo ke he tau kupu galo kia Keriso,)

5 Nakai fakailoa atu ai ke he tau tagata he tau hau kehe, tuga e fakailoa mai nai he Agaga ke he hana tau aposetolo tapu mo e hana tau perofeta tapu;

6 Kia eke e tau motu kehe mo hakeaga fakalataha mo tino taha kia igatia fakalataha foki ke he hana mena kua talahaua mai kia Keriso ke he vagahau mitaki;

7 Kua eke au mo fekafekau ki ai, ke lata mo e mena foaki noa mai he fakaalofa noa he Atua, kua foaki mai kia au ke he gahua malolo he hana mana.

8 Kua ta mai kia au, kua muikau fakaoti ke he tau tagata tapu oti kana, e fakaalofa noa nai ke fakamatala atu e au ke he tau motu kehe e koloa lahi a Keriso kua nakai maeke ke totou.

9 Ke fakamaama atu ke he tau tagata oti kana e kakano he fakafetui he mena galo, ne galo ke he tau hau i tuai ha he Atua, ko ia ne eke e tau mena oti kana ia Iesu Keriso.

10 Kia iloa ainei he tau iki lalahi mo e tau pule ke he tau mena ha he lagi, ke he ekalesia e pulotu kehekehe loga he Atua,

11 Ke lata mo e hana finagalo i tuai tigahau ne finagalo ai a ia kia Keriso Iesu ha tautolu a Iki;

12 Ha ko ia kua moua ai e tautolu e fakamalolo, mo e takitakiaga ha i ai e fakamanavalahi, ke he tua kia ia.

13 Hanai, kua ole atu e au aua neke fakalolelole a mutolu he matematekelea au ha ko mutolu, ha ko e mena haia ke fakaheke ai a mutolu.

14 Ko e mena ia kua fakatokotui ai au ke he Matua he Iki ha tautolu, ko Iesu Keriso;

15 Ko ia kua fakahigoa mai ai e tau faoa oti kana ha he lagi katoa mo e lalolagi;

16 Kia foaki e ia kia mutolu fakalata ke he lahi ue atu he hana lilifu, kia fakamalolo a mutolu ke he mana he hana Agaga ke he tagata i loto,

17 Kia nofo mau a Keriso ke he tau loto ha mutolu ke he tua, kua mauokafua a mutolu, mo e fakave ke he fakaalofa;

18 Kia maeke ai ke iloa tonuhia e mutolu katoa mo e tau tagata tapu oti kana, po ke heigoa e laulahi, mo e loa, mo e hokulo, mo e tokoluga,

19 Kia iloa foki e lahi ue atu he fakaalofa a Keriso kua nakai maeke ke iloa, kia fakapuke a mutolu ke he puke katoa he Atua.

20 Kia ha ha ia ia kua maeke ke eke e tau mena oti kua mua ke he tau mena ke ole atu, po ke manamanatu ai a tautolu, ke lata mo e malolo kua gahua lahi ai a ia ki loto ia tautolu.

21 Kia ha ha ia ia e fakahekeaga ke he ekalesia ha ko Keriso Iesu ke he tau hau oti kana, tukulagi tukumuitea. Amene.