1 Korinito

15 KO e tau matakainaga na e, kua fakailoa atu e au kia mutolu e vagahau mitaki ne fakamatala atu ai au kia mutolu, ne talia ai foki e mutolu, kua tumau foki a mutolu ki ai;

2 Kua momoui ai foki a mutolu, kaeke kua taofi mau e mutolu ke he kupu ne fakamatala atu e au kia mutolu; kaeke kua nakai talia teao e mutolu.

3 Ha ko e mena ne tuku atu e au kia mutolu e falu a mena fakamua ne moua ai foki e au; ne matulei a Keriso mo lukutoto he tau hala ha lautolu, kua lata mo e tau Tohi.

4 Ne tanu foki a ia, mo e liu foki tu mai ke he aho tolu, kua lata mo e tau Tohi.

5 Ne kitia foki e Kefa a ia, ti kitia ai he tokohogofulu ma ua.

6 Ti kitia ai a ia he tau matakainaga kua fakalataha ne tokolima e teau mo e tuma; na tokologa foki a lautolu kua momoui gaia kua hoko ke he aho nai; ka kua momohe falu.

7 Ati kitia ai a ia e Iakopo, ti kitia ai a ia he tau aposetolo oti.

8 Ka e fakamui ne kitia ai a ia e au, tuga e tama kua fanau maua.

9 Ha ko au, ko e muikau au he tau aposetolo; kua nakai aoga au ke talahaua ko e aposetolo, ha ko e mena ne favale au ke he ekalesia he Atua.

10 Ko e fakaalofa noa he Atua kua pehenei ai au; ti nakai moua teao e au hana fakaalofa noa ia, ka kua mua haku a tau gahua kia lautolu oti; ka e nakai ko au, ka ko e fakaalofa noa he Atua ha ha ia au.

11 Hanai, po ko au, po ko lautolu, kua pihia ha mautolu a fakamatala atu, ti pihia foki ha mutolu a talia.

12 Kaeke kua fakamatala atu a Keriso kua fakatu mai tuai ia lautolu kua mamate, po kua talahau fefe e falu ia mutolu kua nakai tuai tutu mai a lautolu kua mamate?

13 Kaeke ke nakai tuai tutu mai a lautolu kua mamate, ti nakai fakatu mai ai ni a Keriso;

14 Kaeke kua nakai fakatu mai a Keriso ti teao ha mautolu a fakamatala atu, ti teao foki ha mutolu a tua.

15 Kua eke foki e mautolu mo tau fatipiko ke he Atua, ha ko e mena kua talahau e mautolu ke he Atua, kua fakatu mai e ia a Keriso; ka kua nakai fakatu mai e ia kaeke kua moli nakai tuai tutu mai a lautolu kua mamate.

16 Ha ko e mena kaeke ke nakai tuai tutu mai a lautolu kua mamate, ti nakai fakatu mai ai a Keriso.

17 Kaeke kua nakai fakatu mai a Keriso, kua nakai aoga ha mutolu a tua; kua nonofo agaia a mutolu ke he tau hala ha mutolu;

18 Mo e hanai foki, kua malaia a lautolu ne momohe ha ha ia Keriso.

19 Kaeke kua ha ha he mouiaga nai hokoia e tau mena kua amaamanaki a tautolu ki ai kia Keriso, po kua mua ha tautolu a malaia ke he tau tagata oti kana.

20 Ka ko e hanai, kua fakatu mai a Keriso ia lautolu kua mamate, kua uta a ia mo fua uluaki kia lautolu kua momohe.

21 Ha ko e tagata ne hoko mai ai e mate, ti ko e tagata foki kua hoko mai ai e liu foki tutu mai a lautolu kua mamate.

22 Ha ko e mena tuga he mamate e tau tagata oti kia Atamu, to pihia foki e fakamomoui mai oti kia Keriso.

23 Ka e takitokotaha mo e hana vahega; ko e fua uluaki ko Keriso haia, ti mumui atu ai a lautolu ha ia Keriso ke he vaha ka haele mai ai a ia.

24 Ti hoko ai e fakahikuaga, ka oti he tuku atu e ia e kautu ke he Atua, ko e Matua haia, ka oti he fakaotioti e ia e tau iki ne mua oti kana, mo lautolu gotoa kua pule, mo lautolu kua malolo.

25 Ha ko e mena to pule ni a ia ato tuku e ia hana tau fi oti ki lalo he na ve hana.

26 Ko e fi fakamui ke fakaotioti ai ko e mate haia.

27 Ha kua tuku e ia e tau mena oti ki lalo he na ve hana; ka pehe mai a ia, Kua tuku e tau mena oti ki lalo ia ia, ti maliali mai ni kua toe a ia ne tuku e tau mena oti ki lalo ia ia.

28 Ka oti he tuku e tau mena oti ki lalo ia ia, ti tuku ai foki e Tama ki lalo ia ia ne tuku ai e tau mena oti ki lalo ia ia, kia pule okooko e Atua ke he tau mena oti kana.

29 Ka nakai pihia to eke fefe a lautolu kua papatiso ha ko lautolu kua mamate, kaeke kua moli nakai tuai tutu mai a lautolu kua mamate? ti ko e ha kia kua papatiso ai a lautolu ha ko lautolu kua mamate?

30 Ti ko e heigoa foki e mena kua nonofo fehagai a mautolu mo e mate ke he tau magaaho oti?

31 Kua fakamoli ni e au ke he hula ha ha ia au ha ko mutolu kia Keriso Iesu, ko e Iki ha tautolu, kua mate au ke he taha aho mo e taha aho.

32 Ne aoga ha ha kia au he tau mo e tau manu favale i Efeso tuga e tau tagata, kaeke ke nakai tuai tutu mai a lautolu kua mamate? Kia kai mena a tautolu mo e inu, ha ko e mena mamate a tautolu a pogipogi.

33 Aua neke fakahehe ai a mutolu, Ko e feoaki mo lautolu kua mahani kelea kua kelea ai e tau mahani mitaki.

34 Kia ala mai ā mutolu ke eke e mahani tututonu, aua neke hala; ka ko e mena pouli falu ke he kupu he Atua; kua tala atu pihia au kia mutolu ke fakama ai a mutolu.

35 Ka e pehe mai taha, Po ke fefe he tutu mai a lautolu kua mamate? Ko heigoa foki e tino ke o mai ai a lautolu?

36 Ko koe na, e goagoa! ko e mena kua gana e koe, nakai moui ia kaeke ke nakai popo.

37 Ko e mena foki kua gana e koe, nakai gana ai ko e tino ke tupu mai ai; ka ko e fua noa, tokai ko e saito po ke taha fua pihia.

38 Ka kua āge he Atua ki ai e tino kua finagalo a ia ki ai; ko e tau fua foki takitaha mo e hana tino.

39 Kua nakai tino taha e tau tino oti; ka e kehe e tino he tau tagata, ti kehe e tino he tau manu, ti kehe e tino he tau ika, ti kehe e tino he tau manu lele.

40 Ha ha i ai foki e tau tino kua lata mo e lagi, mo e tau tino kua lata mo e lalolagi; ka e kehe e fulufuluola he tau mena he lagi, ti kehe e fulufuluola he tau mena he lalolagi.

41 Kua kehe e kikila he la, ti kehe foki e kikila he mahina, ti kehe foki e kikila he tau fetu; nukua kehe e kikila mai he taha fetu mo e taha fetu.

42 To pihia foki e liliu tutu mai a lautolu kua mamate; ne gana mo e popo, to fakatu mai foki mo e nakai popo;

43 Ne gana mo e fuafuakelea, to fakatu mai foki mo e fulufuluola; ne gana mo e lolelole, to fakatu mai foki mo e malolo;

44 Ne gana ko e tino kua omaoma ke he tino, to fakatu mai foki ko e tino kua omaoma ke he agaga; ka ha i ai e tino kua omaoma ke he tino, ti ha i ai e tino kua omaoma ke he agaga.

45 Kua pihia foki e tohi, Ne eke a Atamu e tagata uluaki mo agaga moui, ka ko e Atamu fakamui, ko e agaga haia ke fakamoui ai.

46 Ka e nakai fakamua e tino kua oma ke he agaga, ka ko ia kua oma ke he tino; ti mui atu ai a ia kua oma ke he agaga.

47 Mai he kelekele e tagata uluaki, kua lata a ia mo e kelekele; ka ko e tagata ke ua aki, ko e Iki haia mai he lagi.

48 Tuga a ia ne lata mo e kelekele, ti pihia foki a lautolu mai he kelekele; tuga e tau mena he lagi, ti pihia foki a lautolu mai he lagi.

49 Tuga he fakatai a tautolu kia ia kua lata mo e kelekele, ti fakatai foki pihia a tautolu kia ia mai he lagi.

50 Ko e tau matakainaga na e, ko e haku a tala atu hanai, nakai maeke ke uta e kautu he Atua ma lautolu ha he tino kakano mo e toto; nakai uta foki e moui nakai popo ma lautolu ke popo.

51 Kitiala, ko e tala atu ne fai e au e mena galo kia mutolu; nakai momohe a tautolu oti, ka to faliu a tautolu oti,

52 To fakaofo ni tuga e magaaho ke kemo ai e mata, ka fakatagi e pu ke fakaoti ai; ha ko e mena to fakatagi ni e pu, ti fakatu mai ai a lautolu kua mamate ke he moui nakai popo, to faliu foki a tautolu.

53 Ha ko e mena to fakatapulu ni e tino nai ke popo ke he tino nakai tuai popo ke lata ai, to fakatapulu foki e tino nai ke mate ke he tino nakai tuai mate.

54 Ka tapulu ai e tino nai ke popo ke he tino nakai tuai popo, ka tapulu ai foki e tino nai ke mate ke he tino nakai tuai mate, ti fakamoli ai e kupu kua tohi, Kua mahala e mate ke he kautu.

55 Ko e mate na e, ko fe hau a huki? Ko e tukuaga na e, ko fe hau a kautu?

56 Ko e huki he mate, ko e hala haia; ko e malolo foki he hala ko e fakatufono haia;

57 Ka e fakaaue ke he Atua, ko ia kua foaki mai e kautu kia tautolu ha ko e Iki ha tautolu ko Iesu Keriso.

58 Hanai, ko e haku a tau matakainaga fakahelehele na e, kia tumau a mutolu mo e nakai fagahuatia, kia fakamakai nakai noa ke he gahua he Iki, he iloa e mutolu nakai noa mo e fua ha mutolu a fakafita ke he gahua he Iki.