Ruta

2 KO e taha tagata he magafaoa he tane a Naumi, ko e tagata maukoloa lahi, ko e magafaoa a Elimeleka, ko Poasa hana higoa.

2 Ne pehe atu a Ruta ko e fifine Moapi kia Naumi, Kia fano au ke he fonua, mo e oko ai e tau fua karite, to mui atu ke he tagata ke fakaalofa mai kia au. Ti pehe mai a ia, Ati fano a koe haku tama na e.

3 Kua fano a ia, kua hoko ki ai, ti oko fua karite a ia ke he fonua, kua mui age ai ke he tau tagata ne helehele; kua fano tuli a ia ke he maga fonua a Poasa, ko e magafaoa a Elimeleka.

4 Kitiala foki, ne hau a Poasa i Petelehema, ti pehe age a ia ke he tau tagata helehele karite, Kia ha ha ia mutolu a Iehova! Ti pehe age a lautolu kia ia, Kia fakamonuina atu e Iehova a koe.

5 Ti pehe age a Poasa ke he fuata ne kotofa ke pule ke he tau tagata helehele karite, Ko hai kia e tamāfine na?

6 Ti tali age e fuata ne kotofa ke pule ke he tau tagata helehele karite, kua pehe, Ko e tamafine Moapi hanā ne o mai mo Naumi he motu ko Moapi;

7 Ne pehe mai a ia, Toka au ke oko fua karite, mo e tanaki ai ke he tau vaha he tau fuhi karite, mo e mui atu ke he tau tagata helehele karite; ti fano a ia ke oko kua nofo taha ai tali mai ne pogipogi kua hoko mai ke he magala nai, ka e okioki fakatote ke he fale.

8 Ti pehe atu a Poasa kia Ruta, Kua logona mai nakai e koe haku tama fifine na e? Ua fano a koe ke oko fua karite ke he taha fonua kehe, ti aua neke fano kehe foki a koe he mena nai ka e nofo mau ai a koe mo e haku tau fekafekau fifine;

9 Kitekite la a koe ke he fonua kua helehele ai e lautolu, ti mui age a koe kia lautolu; nakai kia poaki atu au ke he haku tau fuata neke eke fakakelea e lautolu a koe? ka fia inu a koe, ti fano a koe mo e inu ai he mena kua utu mai he tau fuata.

10 Ti fakaveli fakafohifo ai a ia ke he kelekele, kua pehe age a ia kia ia, Ko e ha kua fakaalofa mai ai a koe kia au, mo e kitekite mai a koe kia au, ko au foki ko e tagata kehe?

11 Ti tali age a Poasa, kua pehe age kia ia, Kua tala mai tuai kia au, e tau mena oti ne eke e koe ke he hau a matua fugavai fifine tali he mate e tane hau; mo e toka e koe hau a matua tane, mo e hau a matua fifine, mo e motu ne fanau ai a koe, ti kua hau a koe ke he motu nakai kitia tuai;

12 Kia taui e Iehova hau a gahua, kia tuku atu kia koe e palepale lahi mai ia Iehova ko e Atua a Isaraela kua hau ai a koe ke malu ai ki lalo hana tau tapakau.

13 Ti pehe age a ia, Kia ofania au e koe, haku iki na e, ha kua fakamafana mai e koe au, mo e fai kupu mitaki mai a koe ke he hau a fekafekau fifine, ko au foki, kua nakai tuga he taha he hau a tau fekafekau fifine.

14 Ti pehe age a Poasa kia ia, ka hoko ke he magaaho ke kai mena ai, ti unu mai a koe ki hinai, mo e kai ai e areto, mo e fufui ai hau a mena kai ke he vineta; ti nofo ai a ia fakalataha mo e tau tagata helehele karite, ti ta mai e ia e tau fua saito tunu kia ia, ti kai ai e ia kua makona, ti toe ai ni.

15 Ne matike a ia ke oko fua karite; ti poaki a Poasa ke he hana tau fuata, kua pehe age, Kia toka e mutolu a ia ke oko fua karite ke he tau vaha he tau fuhi karite, ka e aua neke fakama e mutolu a ia.

16 Kia gana ai foki falu a puke aloalolima fua karite, mo e toka ai ke oko e ia mana, ti ua hataki e mutolu a ia.

17 Ne oko fua karite a ia ke he fonua ato hoko ke he afiafi, ti haha ai e ia e tau mena kua tatanaki e ia, ti lata ai mo e efa karite.

18 Ti uta ai e ia, mo e fina atu ke he maga, ne kitia he matua fugavai fifine hana e mena kua oko ai e ia; ti ta mai ai foki e ia mo e age kia ia e mena ne toe ha kua makona a ia.

19 Ti pehe mai e matua fugavai fifine hana kia ia, Kua oko mena mai i fe a koe ke he aho nai? ne gahua a koe ki fe? kia monuina a ia kua fakaalofa mai kia koe. Ti tala atu a ia ke he hana matua fugavai fifine e tagata hana e fonua ne gahua ai a ia, mo e pehe atu, Ko e higoa he tagata hana e fonua ne gahua ai au ke he aho nai, ko Poasa.

20 Ti pehe mai a Naumi ke he hana figona fifine, kia fakamonuina e Iehova a ia, ha kua nakai fakahiku ai hana fakaalofa kia lautolu ne momoui mo lautolu ne mamate, Kua faoa fakalataha a tautolu mo ia, ko e tagata ia ni kua magafaoa taha mo tautolu.

21 Ti pehe atu foki a Ruta ko e fifine Moapi, Ne pehe mai foki a ia kia au, Kia fakalataha mai a koe mo e haku tau fuata, ato fakahiku e lautolu haku a heleheleaga saito oti ni.

22 Ti pehe mai a Naumi kia Ruta hana figona, Haku tama na e, kua mitaki ke o a mutolu mo e hana tau fekafekau fifine, ti aua neke kitia e lautolu a koe ke he fonua kehe.

23 Ti fakalataha a lautolu mo e tau fekafekau fifine a Poasa ke oko mena ai; ti oti e heleheleaga karite, mo e heleheleaga saito; ne nonofo ai foki a laua mo e hana matua fugavai fifine.