Kenese

24 KUA motua tuai a Aperahamo, kua loga hana tau tau; ne fakamonuina foki e Iehova a Aperahamo ke he tau mena oti.

2 Ti pehe atu a Aperahamo ke he patu fekafekau he hana kaina, ko ia ne pule ke he hana tau mena oti, Kia tuku e koe hau a lima ki lalo he tega haku;

3 Mo e omonuo mai e koe kia au kia Iehova, ko e Atua he lagi, mo e Atua he lalolagi, kia nakai uta hoana e koe mo e tama haku mai he tau fifine Kanana, ko e motu haia kua nofo ai au.

4 Ka kia fano a koe ke he haku motu, mo e haku faoa, mo e ta mai ai e hoana mo e tama haku, ko Isaako.

5 Ti pehe mai ai e fekafekau kia ia, Kaeke ke nakai loto e fifine ke o mai mo au ke he motu nai, to liliu atu kia a maua mo e tama hau ke he motu ne hau ai a koe?

6 Ti pehe atu a Aperahamo kia ia, A koe, neke uta e koe haku tama ki ai.

7 Ko Iehova, ko e Atua he lagi, ko ia ne ta mai au he kaina he haku matua tane, mo e motu he haku a faoa, ko ia foki ne vagahau mai kia au, mo e omonuo mai kia au, kua pehe mai, To foaki atu e au e motu nai ke he fanau hāu; to fakafano e ia hana agelu ke mua kia koe; to ta mai foki e koe he motu ia e hoana mo e tama haku.

8 Kaeke ke nakai loto e fifine ke o mai mo koe, ti mea na koe he hau a omonuo nai; ka e aua neke uta e koe haku tama ki ai.

9 Ti tuku ai e fekafekau hana lima ki lalo he tega a Aperahamo hana iki, mo e omonuo kia ia ke he mena ia.

10 Ti uta ai he fekafekau hogofulu e kamela he tau kamela he hana iki, ti fano; ne uta foki e ia e fala mena he tau koloa oti he hana iki; kua matike a ia mo e fano ki Mesopotamia ke he maga a Nakori.

11 Kua fakatakoto e ia e tau kamela ki tua he maga, tata age ke he vai keli, ke he magaaho afiafi, ko e magaaho ne fa o atu e tau fifine ke utu vai;

12 Ti pehe atu a ia, Iehova na e, ko e Atua he haku iki ko Aperahamo, kia fakamonuina mai e koe au ke he aho nai; mo e fakaalofa mai foki ke he haku iki ko Aperahamo.

13 Kitiala, ko au nai, kua tu atu au ke he tapa he vai keli, ko e o mai foki ha ne fai e tau tama fifine he tau tagata he maga ke utu vai;

14 Kia eke ni pehe, ko e tamafine ka pehe atu au ki ai, Ta hifo a hāu a vai kia inu ai au; ti pehe mai a ia. Inu ā, to fakainu foki e au hāu a tau kamela; ko e fifine ia ni kua kotofa e koe mo e hau a fekafekau ko Isaako; ti iloa ai e au ke he mena ia kua fakaalofa mai a koe ke he haku iki.

15 Kua nakai la fakaoti e ia e tau kupu oti ia, kitiala, kua hau tuai a Repeka ko e tama fifine a Petueli, ko e tama tane a Meleka e hoana a Nakori, ko e matakainaga a Aperahamo, ha he hana ua e vai hana.

16 Ko e tama fifine mata mitaki lahi ni a ia, ko e tamafine tote a ia, nakai iloa he tane a ia; ne hifo a ia ke he vai mo e utu hana vai, ti hake mai ni.

17 Ti poi ai e fekafekau ke fonofono a ia mo e pehe atu, Toka au ke inu ha maga vai tote he vai hau.

18 Ti pehe mai ai a ia, Ko e iki na e, kia inu ā, ti ta hifo fakaave ai e ia hana vai ke he lima hana, mo e fakainu a ia.

19 Kua oti he fakainu ai e ia a ia; ti pehe mai ai a ia, To utu vai foki e au mo e tau kamela hau ato makona ai a lautolu he inu.

20 Ti fakaave ai a ia mo e liligi hana vai ke he tokaaga vai, ti liu foki poi hifo ai a ia ke he vai keli, mo e utu mai ai, ti utu e ia mo e hana tau kamela oti kana.

21 Ko e tagata foki kua ofo a ia kia ia; ti fakamate a ia he fia iloa po ke fakamonuina e Iehova hana fenoga, po ke nakai.

22 Kua oti he inu e tau kamela ti ta atu ai he tagata e mena auro ke tau ke he ihu, ko e hana mamafa ko e afa sikeli haia, mo e pipi lima auro ne ua mo e hana tau lima, ne hogofulu e sikeli e mamafa he na mena ia.

23 Kua pehe atu a ia, Ko e tama fifine ha hai a koe? talahau mai la kia au; kua fai mena nakai ke he fale he hāu a matua tane ke api ai a mautolu?

24 Ti pehe mai a ia kia ia, Ko au ko e tama fifine a Petueli, ko e tama haia a Meleka, ne fanua e ia kia Nakori.

25 Kua pehe mai foki a ia kia ia, Ha ha ia mautolu e tau otaota saito, mo e tau mena ke kai he tau manu, na loga, kua fai mena foki ke api ai.

26 Ti tukutukuhifo e tagata, mo e fakaveli fakafohifo kia Iehova.

27 Ti pehe atu a ia, Kia fakaaueina a Iehova, ko e Atua he haku iki ko Aperahamo, ha kua nakai fakahiku e ia hana fakaalofa mo e hana fakamoli ke he haku iki; ha he puhala au, ti takitaki ai e Iehova au ke he fale he matakainaga he haku iki.

28 Ti poi atu ai e tama fifine mo e talahau atu ke he magafaoa he hana matua fifine e tau mena ia.

29 Ko e tugane foki a Repeka ko Lapana hana higoa; ne poi atu foki a Lapana ke he tagata ke he vai keli.

30 Kua kitia foki e ia e mena auro tau ihu, mo e pipi lima ke he lima he hana mahakitaga, mo e logona foki e tau kupu e Repeka hana mahakitaga, kua pehe mai, Ne vagahau mai pihia e tagata kia au, ti fano ai a ia ke he tagata, kitiala, kua tu a ia mo e tau kamela ke he tapa he vai keli.

31 Kua pehe atu a ia, Kia haele mai ā, ko koe kua fakamonuina e Iehova, ko e ha ne tu ai a koe ki fafo? ha kua taute tuai e au e fale, mo e mena ke uta ki ai e tau kamela.

32 Ti hu mai ai e tagata ki fale; ti vevete e Lapana e tau kamela mo e āge e tau otaota saito mo e tau mena kai ke he tau kamela, mo e vai ke holoholo aki e tau hui he tagata, katoa mo e tau hui he tau tagata ne fakalataha mo ia.

33 Ti fakatokatoka atu ki mua hana e tau mena ke kai, ka e pehe mai a ia, Nakai kai mena au ato tala atu e au haku fekau. Ati pehe atu ai a ia, Kia talahau mai ā.

34 Ti pehe atu ai a ia, Ko au ko e fekafekau a Aperahamo.

35 Kua fakamonuina fakalahi ni e Iehova haku iki; kua lilifu tuai a ia; kua āge foki e ia kia ia e tau fuifui mamoe, mo e tau fuifui povi, mo e tau ario, mo e tau auro, mo e tau fekafekau tane, mo e tau fekafekau fifine, mo e tau kamela, mo e tau asini.

36 Ko Sara foki ko e hoana he haku iki, kua fanau e ia e tama tane ke he haku iki ka kua motua tuai a ia; kua foaki atu foki e ia hana tau mena oti kia ia.

37 Ne eke foki haku iki ke omonuo au kua pehe mai a ia, Aua neke uta hoana e koe mo e tama haku he tau fifine Kanana ko e motu haia kua nofo ai au.

38 Ka kia fano a koe ke he magafaoa he haku a matua tane, mo e faoa haku, ti ta mai ai e koe e hoana mo e tama haku.

39 Ti pehe atu au ke he haku iki, Kaeke ke nakai loto e fifine ke o mai a maua to ha?

40 Ti pehe mai a ia kia au, Ko Iehova, ne faifano au ki mua hana, to fakafano e ia hana agelu fakalataha mo koe, to fakamonuina e ia hāu a fenoga; to ta mai ai e koe e hoana mo e tama haku he faoa haku, mo e magafaoa he haku matua tane.

41 To mea a koe he hāu a omonuo nai kia au ka hoko atu a koe ke he haku a faoa; kaeke ke nakai tuku mai taha kia koe, ti mea ai a koe he hau a omonuo kia au.

42 Ne hau foki au he aho nai ke he vai keli, mo e pehe atu, Iehova na e, ko e Atua he haku iki, ko Aperahamo, kaeke kua fakamonuina nai e koe haku a fenoga ne hau ai au;

43 Kitiala, ko au nai kua tu atu au ke he tapa he vai keli, kia eke pehe ni, ka hau e tamafine ke utu vai mo e pehe atu au ki ai, Ta mai taha maga vai he vai hāu ke inu ai au;

44 Ti pehe mai a ia kia au, Kia inu a koe to utu mai foki e au mo e tau kamela hau; ko e hoana haia kua kotofa e Iehova mo e tama he haku iki.

45 Kua oti e tau kupu ia ke he haku loto, kitiala, ko Repeka ne hau mo e hana vai ha he ua hana, ti hifo ai a ia ke he vai keli mo e utu mai ai; ti pehe atu ai au kia ia, Ta mai a kou inu.

46 Ti fakaave ai a ia mo e ta hifo hana vai mo e pehe mai, Kia inu ā, to fakainu foki e au hau a tau kamela; ti inu ai au; ne fakainu foki e ia e tau kamela.

47 Ti huhu e au kia ia kua pehe atu, Ko e tama fifine ha hai a koe? Ti pehe mai a ia, Ko e tama fifine a Petueli ko e tama a Nakori, ne fanau e Meleka kia ia; ti tuku atu e au e mena auro tau ihu ke he hana fofoga, mo e pipi lima ke he hana lima.

48 Ne tukutukuhifo au mo e fakaveli fakafohifo kia Iehova, ne fakaaue foki au kia Iehova ko e Atua he haku iki ko Aperahamo, ko ia ne takitaki au ke he puhala tonu, ke uta e tama fifine he matakainaga he iki haku mo hoana he tama hana.

49 Ko e hanai, kia talahau mai e mutolu po ke fakaalofa mai mo e fakamoli mai e mutolu ke he haku iki; kaeke ke nakai, ti talahau mai la kia au; kia hagao atu ai au ke he fahi matau po ke fahi hema.

50 Ti tali mai ai a Lapana mo Petueli, kua pehe mai, Ne tupu ia Iehova e mena ia, nakai maeke ia maua ke vagahau atu kia koe po ke kelea po ke mitaki.

51 Kitiala, ko Repeka haia i mua hāu, kia uta e koe a ia ti fano; kia eke a ia mo hoana he tama he iki hau, tuga ne talahau mai e Iehova.

52 Kua logona he fekafekau e tau kupu ha laua ti fakaveli fakafohifo ai a ia ke he kelekele kia Iehova.

53 Ti eke mai he fekafekau e tau mena ario ke taute aki, mo e tau mena auro ke taute aki, katoa mo e tau tapulu, ti āge kia Repeka; ne āge foki ke he hana tugane mo e hana matua fifine e tau mena uho.

54 Ti kai mena ai a lautolu mo e inu, ko ia mo e tau tagata ne o mai mo ia, ti momohe ai a lautolu; kua mamatike a lautolu ke he magaaho pogipogi, ti pehe atu a ia, kia toka au ke fano ke he haku iki.

55 Ti pehe mai e tugane hana mo e matua fifine hana, Kia nonofo a mautolu mo e tama fifine ke he falu a aho, po ke hogofulu; ka mole ia ti fano a ia.

56 Ti pehe atu ai a ia kia laua, Ua taofi e mua au, ha kua fakamonuina mai e Iehova haku fenoga; toka au ke fano, kia fano au ke he haku iki.

57 Ti pehe mai a laua, To ui e maua ke he tama fifine, mo e huhu po ke loto ke ha a ia.

58 Ti ui ai a laua kia Repeka, kua pehe age foki kia ia, To fano nakai a koe mo e tagata nai? Ti pehe mai a ia, To fano au.

59 Ti toka ai e lautolu ha lautolu a mahakitaga, ko Repeka, ke fano, ko lautolu mo e fifine ne leveki a ia, mo e fekafekau a Aperahamo, katoa mo e hana tau tagata.

60 Ti fakamonuina atu e lautolu a Repeka, kua pehe mai kia ia, Ko koe ko e mahakitaga ha mautolu, kia eke a koe mo matua he tau tagata afe mo afe, kia moua foki he fanau hau e gutuhala ha lautolu kua fai fi kia lautolu.

61 Ti matike a Repeka mo e hana tau tama fifine, kua heke e lautolu e tau kamela, mo e mumui atu ke he tagata; kua uta ai he fekafekau a Aperahamo a Repeka, ti o ai a lautolu.

62 Ne hau foki a Isaako he puhala ki Perelaharoi ha kua nofo a ia ke he motu he fahi toga.

63 Ne fano foki a Isaako ke he fonua ke he magaaho afiafi ke manamanatu ai; kua haga atu a ia mo e kitekite, kitiala, ko e tau kamela ne o mai.

64 Kua haga atu a Repeka mo e kitia e ia a Isaako, ti hifo ai a ia he kamela.

65 Ha kua pehe a ia ke he fekafekau, Ko hai e tagata kō ne evaeva mai ke he fonua ke fonofono a tautolu? Ti pehe mai e fekafekau, Ko e haku iki haia; ti toto ai e ia e ufiufi mata, mo e ufi hifo ai a ia.

66 Kua fakamatala foki he fekafekau kia Isaako e tau mena oti ne eke e ia.

67 Ti takitaki ai e Isaako a ia ke he fale ie he hana matua fifine ko Sara, kua uta e ia a Repeka ti eke ai a ia mo hoana hana; ne fakaalofa foki a ia kia ia; ti ko e mafanatia la ia a Isaako tali he mate hana matua fifine.