1 Samuela

19 TI vagahau age e Saulo kia Ionatana hana tama, katoa mo e hana tau fekafekau oti, kia keli e lautolu a Tavita; Ka ko e tama a Saulo ko Ionatana ne fiafia lahi a ia kia Tavita.

2 Ti tala age e Ionatana kia Tavita, kua pehe age, Kua lamalamati haku matua ko Saulo ke keli a koe; ko e hanai, a koe kia koe ke he aho a pogipogi, ti nofo a koe ke he mena galo, mo e fakamumuli ai a koe;

3 Ka ko au, to fina atu au, ti tu ai au ke he tapa he haku a matua ke he fonua ha ha i ai a koe, ti vagahau atu e au ke he haku a matua kia koe ti kitia ai e au po ke fefe ti tala atu ai e au kia koe;

4 Ti vagahau fakamitaki atu e Ionatana kia Saulo hana matua kia Tavita; na pehe atu foki a ia kia ia, Aua neke mahani kelea e patuiki ke he hana fekafekau ko Tavita, ha kua nakai mahani kelea a ia kia koe; ka e mahani mitaki lahi a ia kia koe;

5 Ne tuku foki e ia hana moui ke he hana lima, mo e keli e ia e tagata Filisitia, ti eke ai e Iehova e fakamouiaga lahi ma Isaraela oti; ti kitia ni e koe, mo e fiafia ai; ke mahani kelea he ha a koe ke he tagata nakai hala, ke tamate noa e koe a Tavita?

6 Ne fanogonogo a Saulo ke he tau kupu a Ionatana, ti omonuo ai e Saulo, ko e moui a Iehova, nakai ni tamate a ia.

7 Ti ui mai e Ionatana kia Tavita, ne tala mai foki e Ionatana kia ia e tau kupu oti nai; ti ta mai ai e Ionatana a Tavita kia Saulo; ti ha i ai a ia ki mua hana tuga ne tau aho fakamua.

8 Ti tau foki ni e motu; ti fina atu ai a Tavita, kua tau a ia mo e tau tagata Filisitia, ti keli e ia a lautolu ko e keliaga lahi, ti fehola ai a lautolu ki mua hana.

9 Ti ha ha ia Saulo e agaga kelea mai ia Iehova; kua nofo a ia ke he hana fale mo e hana tao ke he lima hana, kua ta foki e Tavita e kitara ke he hana lima.

10 Ti eke e Saulo ke keli a Tavita ke he tao, ke tuina ua ai a ia mo e kaupa he fale; ka e kalo kehe a ia ki mua a Saulo, ti tu ai e tao ke he kaupa he fale; ti hola ai a Tavita, kua hao a ia ke he po ia ni.

11 Ti fakafano atu e Saulo e tau fekafekau ke he fale a Tavita ke takahao kia ia, mo e keli a ia ke he aho a pogipogi; ti tala age e Mekala hana hoana kia ia, kua pehe age, Kaeke ke nakai fakahao e koe hau a moui ke he po nai, ka hoko ke he aho a pogipogi ti mate ai a koe.

12 Ti tuku hifo e Mekala a Tavita ke he fakamaama, ti fano a ia, ti hola a ia, ti hao ni a ia.

13 Ti uta e Mekala e fakatino, ti tuku e ia a ia ke he moheaga, ti fakauluga ai e ia hana ulu ke he ie fulu koti, ti fakakafu e ia a ia ke he kafu.

14 Kua fakafano atu e Saulo e tau fekafekau ke tapaki a Tavita; ti pehe mai ai e fifine, Kua gagao a ia.

15 Ti fakafano atu e Saulo e tau fekafekau ke kitia a Tavita, kua pehe age, Kia ta mai e mutolu a ia kia au ki luga he moheaga, kia tamate e au a ia.

16 Kua o atu e tau fekafekau, kitiala, ko e fakatino ha ha he mohega, mo e ie fulu koti ne uluga ai.

17 Ti pehe age a Saulo kia Mekala, Ko e ha ne fakavai ai pihia e koe au? mo e fakafano kehe e koe haku a fi, ti hao ai a ia? Ti pehe age Mekala kia Saulo, Ne pehe mai a ia kia au, Kia toka e koe au, ke fano, ke keli e au a koe he ha?

18 Kua hola a Tavita, kua hao a ia, ti hoko atu a ia kia Samuela i Rama; ti tala atu ai e ia e tau mena oti ne eke e Saulo kia ia; ti o ai a laua mo Samuela, ti nonofo a laua i Naiota.

19 Ti tala age ai kia Saulo, kua pehe age, kitiala, ko Tavita ha ha i Naiota i Rama.

20 Ti fakafano atu ai e Saulo e tau fekafekau ke tapaki a Tavita. Kua kitia e lautolu e fakapotopotoago he tau perofeta, kua perofeta ai, mo Samuela kua tu ai ke pule kia lautolu; ti ha i ai ki luga he tau fekafekau a Saulo e Agaga he Atua, ti perofeta ai foki e lautolu.

21 Kua talahau atu ai kia Saulo, ti fakafano atu ai e ia falu a fekafekau; ti perofeta ai foki e lautolu. Ti fakafano atu foki e Saulo falu a fekafekau, ko e laga tolu ia; ti perofeta ai foki e lautolu.

22 Ti fano ai a ia ki Rama; kua hoko atu a ia ke he vaikeli lahi, ha ha i Seku, ti huhu ai a ia, kua pehe, Ko e fe kia a Samuela mo Tavita? ti tali mai ai e taha, Kitiala, ha ha i Naiota i Rama a laua.

23 Ti fano ai a ia ki Naiota i Rama; ti ha i ai i luga hana foki e Agaga he Atua, ti fano ai a ia mo e perofeta ai ato hoko atu a ia ki Naiota i Rama.

24 Kua aki e ia hana tau tapulu, ti perofeta foki a ia ki mua a Samuela, kua takoto ai a ia mo e nakai tapulu ai ke he aho katoa ia; mo e po katoa; ko e mena ia kua pehe age a lautolu, Kua fakalataha kia a Saulo foki mo e tau perofeta?