1 Samuela

22 KUA fano kehe a Tavita he mena ia, ti hola atu a ia ke he ana i Atulama, kua logona ai he tau matakainaga hana katoa mo e magafaoa oti he hana matua, ti o hifo ai a lautolu kia ia ke he mena ia.

2 Kua fakapotopoto atu foki kia ia e tau tagata oti ne matematekelea, mo e tau tagata oti ne uta noa e tau mena ke totogi, mo e tau tagata oti ne mamahi ai e tau loto, ti eke a ia mo iki kia lautolu; ti ha ha i ai mo ia tokai ko e tau tagata fa ni e teau.

3 Ti fano ai a Tavita he mena ia ki Misepa i Moapi, ti pehe age a ia ke he patuiki a Moapi, Kia toka e koe haku a matua tane mo e haku a matua fifine ke o mai kia mutolu, ato iloa e au po ke heigoa e mena ke eke he Atua kia au.

4 Ti ta mai e ia a laua ki mua he patuiki a Moapi, ti nonofo ai a lautolu mo ia ke he tau aho oti ne ha i ai a Tavita ke he taue.

5 Ti pehe age e perofeta ko Kato kia Tavita, Ua nofo a koe ke he taue; fano a, ti fano a koe ke he motu a Iuta. Ti fano ai a Tavita ti hoko atu a ia ke he vao motua ko Hareta.

6 Ne logona e Saulo kua kitia a Tavita mo e tau tagata ne fakalataha mo ia; kua nofo a Saulo i Kipeā i lalo he akau lahi ke he mena tokoluga, mo e hana tao ke he hana lima; ti tutu ai hana tau fekafekau oti ki mua hana.

7 Ti pehe age a Saulo ke he hana tau fekafekau ne tutu ki mua hana, Kia fanogonogo mai a a mutolu ko e tau tagata Peniamiana na e! To ta atu kia he tama a Iese kia mutolu oti takitaha e tau fonua mo e tau uluvine? ti kotofa kia e ia a mutolu oti ke eke mo tau iki he tau tokoafe, mo e tau iki he tau tokoteau;

8 Kua fakafualoto ai a mutolu oti kia au, ti nakai fakakite mai e mutolu kia au e maveheaga he haku a tama mo e tama a Iese? ti nakai fakaalofa mai a mutolu kia au, mo e fakakite mai kia au kua fakaohooho he tama haku haku a fekafekau ke takahao mai kia au tuga ne eke ke he aho nai.

9 Ti tali age ai he tagata Etoma ko Toeka, ha kua tu ai a ia mo e tau fekafekau a Saulo, kua pehe age, Ne kitia e au e tama a Iese, ne fina age a ia ki Nove, kia Ahimeleke ko e tama a Ahitupu,

10 Ti huhu ai e ia kia Iehova mana, mo e age e ia e tau mena kai kia ia, ti age foki e ia kia ia e pelu a Koriato ko e tagata Filisitia.

11 Ti fakafano atu he patuiki mo e ui atu kia Ahimeleke ko e tama a Ahitupu ko e ekepoa, katoa mo e magafaoa oti he hana matua, ko e tau ekepoa a lautolu i Nove; ti o mai ai a lautolu oti ke he patuiki.

12 Ti pehe atu a Saulo, Kia fanogonogo mai ā ko e tama a Ahitupu na e. Ti pehe mai a ia Ko e iki na e, ko au hanai.

13 Ti pehe atu a Saulo kia ia, Ko e ha ne fakafualoto ai a mua kia au, ko koe mo e tama a Iese? ne ta age ai e koe kia ia e tau mena kai, mo e pelu, ti huhu atu e koe ke he Atua mana, ti tu mai a ia kia au ke takahao mai tuga ne eke ai ke he aho nai.

14 Ti tali mai ai a Ahimeleke ke he patuiki, kua pehe mai, Ko hai kia he hau a tau fekafekau oti kua tatai mo Tavita he fakamoli? koe figona foki a ia he patuiki, ti fano ai a ia ke he hau a tau fekau, ti talahaua mitaki a ia ke he hau a magafaoa.

15 Ne kamata kia au ke he aho ia ke huhu atu ke he Atua mana? Kia mamao e mena na ia au; aua neke tuku mai he patuiki e mena na ke he hana fekafekau, mo e magafaoa oti he haku a matua, ha kua nakai iloa he fekafekau hau e mena tote, po ke mena lahi he tau mena oti na.

16 Ti pehe atu e patuiki, To mate ni a koe Ahimeleke, ko koe katoa mo e magafaoa oti he hau a matua.

17 Ti pehe age e patuiki ke he kau leoleo ne tutu ai ki mua hana, Kia liliu atu a mo e tamate e mutolu e tau ekepoa a Iehova, ha kua kau foki a lautolu mo Tavita; ha kua iloa foki e lautolu kua hola a ia ka e nakai tala mai e lautolu kia au. Ka e nakai mafai e tau fekafekau he patuiki ke fakaolo atu e tau lima ha lautolu ke keli e tau ekepoa a Iehova.

18 Ti pehe age e patuiki kia Toeke, Kia liu atu a koe, mo e keli e koe e tau ekepoa. Ti liu atu ai a Toeka ko e tagata Etoma, mo e keli e ia e tau ekepoa; ti keli ai e ia ke he aho ia e tau tagata tokovalugofulu ma lima ne tapulu ai ke he efota ie lino.

19 Ko Nove foki ko e maga he tau ekepoa ne keli ai e ia ke he pelu; ko e tau tane katoa mo e tau fifine, ko e tau tama ikiiki katoa mo e tau tama mukemuke, ko e tau povi, mo e tau asini, katoa mo e tau mamoe ne keli ai e ia ke he pelu.

20 Ka e hao e taha tama tane a Ahimeleke ko e tama a Ahitupu, ko Aviata hana higoa, ti hola atu a ia kia Tavita.

21 Ti tala age e Aviata kia Tavita, Kua keli e Saulo e tau ekepoa a Iehova.

22 Ti pehe age a Tavita kia Aviata, Ne iloa e au ke he aho ia, ne ha i ai a Toeka ko e tagata Etoma, ko e mena tala age ni e ia kia Saulo; ko au ko e fu ti hoko ai e mate ke he magafaoa oti he hau a matua.

23 Kia nonofo a taua mo au, ua matakutaku a koe; ha ko ia kua kumi ke mate ai au, kua kumi foki e ia ke mate ai a koe, ka e puipui ai a koe he fakalataha a taua mo au.