Iopu

28 HA ha i ai e mena kua moua ai e ario, mo e mena ma e auro kua fakamea ai e lautolu.

2 Kua moua e lapatoa ke he kelekele, kua tunu e tau maka ke liliu mo puke vai ke moua ai e apa kula.

3 Kua fakahiku he tagata e pouli, kua kumi fakamakutu foki e ia ke he tau mena oti; ko e tau maka ha ha i ai ke he pouli kikio mo e ata he mate.

4 Kua keli hifo e ia e luo ki lalo kua mamao mo e mena kua nonofo ai e tau tagata, kua nimo ai ke he tau hui ne o ai i luga; kua tautau ai a lautolu mo e tauoga fano kua mamao mo e tau tagata.

5 Kua tutupu mai he kelekele e tau mena kai; ha ha i lalo hana foki kua tuga he keli aki ke he afi.

6 Ko e hana tau maka ko e mena haia ne toka ai e tau safaira, ha ha i ai foki e efuefu auro.

7 Ko e puhala ha i ai kua nakai iloa he tau manu lele favale, nakai kitekite ki ai foki e tau mata he aie.

8 Nakai taholi ai he tau manu favale, ti nakai fina age ai e leona.

9 Kua fakaolo atu he tagata hana lima ke he kaumaka uli, kua fuluhi e ia e tau mouga mai he tau mena ne fakavē ai.

10 Kua foa ai e ia e tau hala vai ke he tau kaumaka; kua kitia foki he tau mata hana e tau mena uho oti kana.

11 Kua ponoponoti ai e ia e tau vailele neke hihina hifo ai; ne ta mai foki e ia ke he maama e tau mena galo.

12 Ka ko e iloilo ke moua i fe a ia? Po ko fe foki e mena ne toka ai e pulotu?

13 Nakai iloa he tagata e mena ke fakafua aki a ia; nakai moua ai foki ke he motu he tau tagata momoui.

14 Ne pehe mai e moana Nakai toka ai ia au; ne pehe mai foki e tahi Nakai ha ha ia au a ia.

15 Nakai fakafua ai ke he auro mitaki, ti nakai fafati atu foki e ario ke fakafua aki a ia.

16 Nakai fakalata ia ke he tau auro mai Ofaira, po ke tau maka uho ko e safaira, po ke soama.

17 Nakai maeke ke fakatatai mo ia e auro mo e tau maka tioata; nakai totogi aki foki ia ke he tau mena ke taute aki ne eke ai he auro mitaki.

18 Nakai talahau ai e tau feo mo e tau kapesa, ha ko e mena ka moua e iloilo kua mua hana mitaki ke he tau penina.

19 Nakai tatai mo ia e topasi mai Aitiope nakai fakalata ki ai e auro mitaki.

20 Hanai, ne hau i fe kia e iloilo? po ko fe foki e mena ha ha i ia e pulotu?

21 Ko e mena fufu ia he tau mata he tau mena momoui oti kana, ne galo foki ia ke he tau manu lele he pulagi.

22 Kua pehe mai e malaia mo e mate, Ne logona ai he tau teliga ha maua hana a ogo.

23 Kua fioia ni he Atua hana puhala, kua iloa foki e ia e mena ha ha i ai a ia.

24 Ha kua fofoga atu a ia ke he tau motuaga he lalolagi; kua fioia ni e ia i lalo he lagi oti;

25 Kia fakalata ai e ia e mamafa he matagi, mo e fafati ai e ia e tau vai ke he fua tautau.

26 Ko e hana ni a vaha ne eke ai e ia e fakatufono ma e uha, mo e puhala ma e uhila he pakulagi;

27 Ti fioia ai e ia, mo e fakakite mai ai; ne fakamau ai e ia, mo e kumi ai ni.

28 Ti pehe mai a ia ke he tau tagata, Kitiala, ko e matakutaku ke he Iki, ko e iloilo ni haia; ko e kalo kehe mo e mahani kelea, ko e pulotu ni haia.