Kalatia

2 KUA mole ia kua katoatoa e tau tau ne hogofulu ma fa, ti liliu hake ai foki a maua ki Ierusalema, ko maua mo Panapa, ne uta foki e au a Tito.

2 Na hake au ke lata mo e fakakiteaga, mo e fakailoa atu e au kia lautolu e vagahau mitaki kua fakamatala atu ai e au ke he tau motu kehe, ka e fakailoa atu kia tua kia lautolu kua talahaua, neke teao haku a poi nai, po ke poi kua mole atu.

3 Ka ko Tito ne fakalataha mo au, ko e tagata Heleni foki a ia, nakai fakamakamaka e taha kia ia kia peritome a ia.

4 Ka ko e tau matakainaga pikopiko ne fakahuhū mai fufu, ko e tau tagata ne o age fufu ke fakaati ha tautolu a tokanoaga ha ha ia tautolu kia Keriso Iesu, kia fakatupatupa ai e lautolu a tautolu.

5 Ka e nakai fakalolelole a mautolu ke omaoma kia lautolu ke he taha magaaho taha, kia tumau kia mutolu e tonu he vagahau mitaki.

6 Ko lautolu foki, kua talahaua, (po ke fefe a lautolu i tuai, nakai ko e haku a mena ia, kua nakai fakamailoga tagata he Atua;) kua nakai lafilafi mai ha mena kia au e lautolu kua talahaua;

7 Ka e nakai kuenaia, ka kua iloa e lautolu kua tuku mai kia au e vagahau mitaki ma lautolu kua nakai peritome, tuga ne tuku ai kia Peteru ma lautolu kua peritome,

8 (Ha ko ia ne gahua ki loto a Peteru ke he feua he aposetolo ma lautolu ne peritome, ko ia ni kua gahua ki loto ia au ma e tau motu kehe,)

9 Kua iloa e lautolu e fakaalofa noa kua foaki mai kia au, ti ta mai ai e Iakopo, mo Kefa, mo Ioane, kua talahaua ko e tau pou, e lima matau he fakafetui kia maua mo Panapa kia o atu a maua ke he tau motu kehe, ka ko lautolu ke he tau tagata peritome;

10 Taha maka ni e kupu ha lautolu, kia manatu a maua ke he tau tagata nonofogati, ko e mena foki haia kua foli au ki ai ke eke.

11 Ka kua fina atu a Peteru ki Anetioka, ti totoko atu au kia ia, ki mua hana ni, ha kua hehe tuai a ia.

12 Ha kua nakai la o mai falu ia Iakopo, kua kai mena a ia fakalataha mo e tau tagata kehe; ka kua hohoko mai a lautolu, ti kalo kehe ai a ia, mo e mavehe kehe ai, ha kua matakutaku a ia kia lautolu ne peritome.

13 Ti fakatupua ai fakalataha mo ia e falu a Iutaia, ati oti ka e hekeheketakina foki a Panapa ke he fakatupua ha lautolu.

14 Ka kua kitia e au kua nakai mahani fakahakohako a lautolu ke lata mo e kupu moli he vagahau mitaki, ti tala age ai e au kia Peteru ki mua ha lautolu oti, Ko koe ko e tagata Iutaia, kaeke kua eke e koe e mahani he tau motu kehe, ka e nakai ko e mahani Iutaia, ko e ha kia ne fakamakamaka ai e koe ke he tau tagata kehe ke eke e mahani Iutaia?

15 Ko tautolu, ko e tau tagata Iutaia moli, ka e nakai ko e tau tagata hala mai he tau motu kehe;

16 Ka kua iloa e tautolu kua nakai talahaua tututonu ha tagata ke he tau gahua he fakatufono, ka ko e tua kia Iesu Keriso; ko tautolu foki kua tua a tautolu kia Keriso Iesu, kia talahaua tututonu ai a tautolu ke he tua kia Keriso, ka e nakai ko e tau gahua he fakatufono; ha ko e mena nakai talahaua tututonu ha tagata taha ke he tau gahua he fakatufono.

17 Kaeke foki kua kumi e tautolu ke talahaua tututonu ia Keriso, kua iloa a tautolu ko e tau tagata hala, ko e mena ia kia ke eke ai a Keriso mo fekafekau ke he hala? Aua ia.

18 Ha ko e mena kaeke ke liu foki ati hake e au e tau mena ne ulu e au, kua fakakite fakatonu e au ko e holifono au.

19 Ha ko au, ne mate au ke he fakatufono ha ko e fakatufono, kia moui ai au ke he Atua.

20 Kua fakasatauro fakalataha a maua mo Keriso; ti nakai tuai ko au kua moui, ka ko Keriso kua moui ki loto ia au; ka ko e moui kua moui ai nai au ke he tino, kua moui ai au ke he tua ke he Tama he Atua, ko ia ne fakaalofa mai kia au, mo e foaki mai e ia a ia ke hukui aki au.

21 Kua nakai eke e au e fakaalofa noa he Atua mo mena nakai aoga; ha ko e mena ane mai kua hoko mai e tututonu ke he fakatufono, po kua matulei teao a Keriso.