Tau Salamo

32 UHOAKI e tagata kua fakamagalo hana tau holifono, kua tanumia hana tau hala.

2 Uhoaki e tagata kua nakai talahaua e Iehova kua hala, nakai fakai foki ha fakavai ke he hana loto.

3 Ne fakamate au, ti popo ai haku a tau huimotua he haku a fakatutu ke he aho oti;

4 Ha kua mamafa ni hāu a lima ki luga ia au ke he aho katoa mo e po; kua liu haku a malolo ke he vevela he tau vevela. Sila.

5 Ti fakakite atu e au kia koe haku a hala, ti nakai fufu foki e au haku a mahani hepehepe; ne pehe au, To fakakite e au haku a holifono kia Iehova; ti fakamagalo ni e koe e kelea he haku a hala. Sila.

6 Ko e mena foki ia ke liogi ai kia koe e tau tagata tapu oti, ke he vaha ke moua ai a koe; ko e moli, nakai hokotia a lautolu he fakapuke lahi.

7 Ko koe ni ko e fakamumuliaga haku, to leveki e koe au neke matematekelea, mo e agaagai e koe au ke he tau lologo he fakamouiaga. Sila.

8 To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.

9 Aua neke tuga ne solofanua a koe, po ke falata, nakai ha i ai ha manamanatu, ko e tauteaga ha lautolu ko e fakamau gutu mo e lapatoa fakagau haia ke taofi aki, ha kua nakai fakatata mai a lautolu kia koe.

10 Loga e tau mena mamahi ke hohoko kia lautolu kua mahani kelea; ka ko ia kua tua kia Iehova, to agaagai a ia he fakaalofa.

11 Kia fiafia kia Iehova, mo e olioli a mutolu kua tututonu; kia kalaga mo e fiafia a mutolu oti kua loto fakamoli.