Tau Salamo

86 IEHOVA na e, kia haga mai hāu, a na teliga, kia fanogonogo mai a koe kia au; ha kua matematekelea mo e nofogati au.

2 Kia leveki e koe au; ha ko e tagata tapu au; ko koe na, haku Atua na e, kia fakamoui e koe hāu a fekafekau kua tua kia koe.

3 Ko e Iki na e, kia fakaalofa mai a koe kia au; ha kua ui atu e au kia koe ke he aho oti.

4 Kia fakafiafia mai e loto he hāu a fekafekau; ha kua hagao atu haku a loto kia koe, ko e Iki na e,

5 Ha ko koe, ko e Iki na e, kua mitaki ni a koe, ti fakamagalo e tau hala; kua lahi foki hāu a fakaalofa kia lautolu oti kua tauui kia koe.

6 Iehova na e, kia fakateliga mai a koe ke he haku a liogi; mo e haga mai hāu a na teliga ke he leo he haku a ole.

7 Ko e aho ka matematekelea ai au, to ui atu ai au kia koe; ha kua fanogonogo mai a koe kia au.

8 Ko e Iki na e, nakai ha he tau atua taha ke tuga a koe, nakai fai gahua foki ke tuga hāu a tau gahua.

9 Ko e tau motu oti ne eke e koe, to o mai a lautolu mo e hufeilo a lautolu ki ho mua, ma Iki na e; mo e fakalilifu e lautolu hāu a higoa.

10 Ha kua homo ni a koe, kua eke e koe e tau mana, ko koe hoko koe ni ko e Atua.

11 Iehova na e, kia fakakite mai e koe hāu a puhala, to fano au ke he tonu mai ia koe, kia fakamau e koe hoku loto ke matakutaku ke he hāu a higoa.

12 Ko e Iki na e, haku Atua, to fakaaue atu au kia koe mo e haku a loto katoa, to fakalilifu tukulagi e au hāu a higoa.

13 Ha kua lahi hāu a fakaalofa kia au; ne laveaki e koe haku agaga mai seoli ki lalo.

14 Ko e Atua na e, kua tutu mai kia au e tau tagata fakatokoluga, ko e fakapotopotoaga foki he tau tagata favale kua kumi au ke keli; nakai tuku atu e lautolu a koe ki mua ha lautolu.

15 Ka ko koe ma Iki na e, ko e Atua fakaalofa hofihofi a koe, mo e fakaalofa noa, kua fakatuai hāu a ita, kua lahi e fakaalofa mo e fakamoli.

16 Kia hagao mai a koe kia au, mo e fakaalofa mai kia au; kia foaki mai e koe hāu a malolo ke he hāu a fekafekau, kia fakamoui foki e tama he hāu a fekafekau fifine.

17 Kia eke e koe e fakamailoga maku kia mitaki ai au; kia kitia ai e lautolu ne fakavihia au, mo e mā ai a lautolu; ha ko koe, Iehova na e, kua lagomatai mai, mo e fakamafana mai kia au.