Numera

23 TI pehe atu a Palaamo kia Palako, Kia ati ai e koe ki hinei fitu e fatapoa maku, ti taute ai e koe ki hinei maku ko e tau povi tane ne fitu mo e tau mamoe tane ne fitu.

2 Kua eke foki e Palako tuga ne poaki atu ai e Palaamo; kua takitaha e fatapoa mo e eke ai e Palako mo Palaamo taha povi tane mo e taha mamoe tane mo poa.

3 Ti pehe atu a Palaamo kia Palako, Kia tu ai a koe ke he tapa he hau a poa huhunu ka e fano au po ke haele mai nakai a Iehova ke feleveia ai a maua mo ia; ko e kupu foki ke fakakite mai ai e ia kia au to tala atu au kia koe. Ti hake ai a ia ke he mena tokoluga.

4 Kua haele mai e Atua kia Palaamo; ti pehe atu a ia kia ia, Kua taute tuai e au fitu e fatapoa, mo e takitaha foki e fatapoa kua eke ai taha povi tane mo e taha mamoe tane mo poa.

5 Ti tuku ai e Iehova e kupu ke he gutu a Palaamo kua pehe mai, Kia liu a koe kia Palako, mo e tala age a koe kia ia pihia.

6 Ti liu atu a ia kia ia kitiala foki, kua tu ai a ia ke he tapa he hana poa huhunu, ko ia mo e tau iki oti a Moapi.

7 Ti taute ai e ia hana fakatai kua pehe atu, Ne ta mai e Palako ko e patuiki a Moapi au i Arana, mai he atu mouga ki uta, kua pehe mai a ia, Kia hau la, kia kaialu kia Iakopo maku; kia hau a a koe ke tugi maama kia Isaraela.

8 Ko e kaialu fefe e au kia lautolu kua nakai kaialu ai he Atua? po ke tugi maama fefe e au kia lautolu kua nakai tugi maama ki ai e Iehova?

9 Ha ko e mena kitia atu e au a ia mai luga he tau kaumaka, kua kitekite au kia ia mai he tau mouga; kitiala, ko e motu kua nonofo a lautolu hoko lautolu ni; ka e nakai totou ai a lautolu mo e tau motu kehe.

10 Ko hai kua maeke ke totou e efuefu a Iakopo, po ke maveheaga ne fa aki ka totou a Isaraela? Kia mate au ke he mateaga he tagata tututonu, kia tatai foki haku a fakahikuaga mo e hana ni.

11 Ti pehe mai a Palako kia Palaamo, Ko e heigoa e mena kua eke e koe kia au? ne ta mai e au a koe ke kaialu a koe ke he haku tau fi, ti kitiala, kua fakamonuina atu ni e ko a lautolu.

12 Ti tali atu ai a ia, kua pehe atu, Nakai kia taofi ai e au e kupu kua tuku mai e Iehova ke he haku gutu ke vagahau atu ai?

13 Ti pehe mai a Palako kia ia, Hau ke o a taua ke he taha mena ke kitia ai a lautolu mai he mena ia; to kitia ai e koe e tau kala ha lautolu, ka e nakai kitia a lautolu oti; ti kaialu atu ai e koe kia lautolu mai he mena ia maku.

14 Ti uta e ia a ia ke he fonua ko Sofima ke he tapunu mouga ko Peseka; kua ati ai foki e ia fitu e fatapoa; ti taha foki e fatapoa kua eke ai taha povi tane mo e taha mamoe tane mo poa.

15 Ti pehe atu a ia kia Palako Kia tu a koe ki hinei lata age ke he hau a poa huhunu; ka ko au, to feleveia au mo Iehova ke he mena ko.

16 Kua haele mai foki a Iehova kia Palaamo mo e tuku mai e kupu ke he hana gutu, kua pehe mai, Kia liu atu a koe kia Palako ti vagahau atu kia ia kua pehe atu.

17 Ti fina atu ai a ia kia ia, kitiala foki, kua tu ai a ia lata age ke he hana poa huhunu, ko e tau iki a Moapi foki fakalataha mo ia. Ti pehe age a Palako kia ia, Ko e heigoa kia e mena kua talahau mai e Iehova?

18 Ti taute ai e ia hana fakatai, kua pehe atu, Palako na e, kia tu mai a, mo e fanogonogo mai, kia fakateliga mai a koe kia au ko e tama a Siporu na e.

19 Nakai ko e tagata e Atua ke pikopiko ai a ia, po ke tama he tagata ke tokihala ai a ia; kua talahau kia a ia, ka e nakai eke ai? ti vagahau mai kia a ia ka e nakai fakamau ai?

20 Kitiala, kua tuku mai kia au ke fakamonuina atu; kua fakamonuina tuai e ia, ti nakai maeke e au ke liliu kehe ai.

21 Nakai kitekite a ia ke he mahani hepehepe kia Iakopo; ti nakai fioia ai foki e ia ha mahani kelea kia Isaraela; kua fakalataha mo ia a Iehova hana Atua ha ha ia ia ni e kalaga fiafia he patuiki.

22 Ne ta mai he Atua a lautolu i Aikupito; ha ha ia ia e mafiti lahi po ke mafiti he rema.

23 Ha ko e mena nakai fai lagatau kia Iakopo, to nakai fai lagatau taulatua kia Isaraela; to pehe mai ainei kia Iakopo katoa mo Isaraela, Kitiala e mena kua eke ai he Atua.

24 Kitiala, kua matike ai e motu tuga ne leona fifine, kua tu ai a ia ki luga tuga ne leona; ti nakai takoto a ia ato kai ai e ia e mena ne hēhē, mo e inu ai e toto he tau tagata ne keli.

25 Ti pehe mai a Palako kia Palaamo, Aua neke kaialu a koe kia lautolu, ti aua foki neke fakamonuina atu a koe kia lautolu.

26 Ti tali atu ai a Palaamo, kua pehe atu kia Palako, Nakai kia tala atu ai e au kia koe, kua pehe atu, Ko e tau mena oti ke vagahau mai e Iehova kia au, ko e tau mena ia ke eke ai e au.

27 Ti pehe mai a Palako kia Palaamo, Kia hau la ke o a taua mo koe ke he taha mena; po ke lata nakai ke he Atua kia kaialu atu e koe kia lautolu māku mai he mena ia.

28 Ti ta hake ai e Palako a Palaamo ke he tapunu mouga ko Peoro ne fehagai mo e vao.

29 Ti pehe atu a Palaamo kia Palako, Kia ati ai e koe maku fitu e fatapoa ke he mena nai, mo e taute ai e koe ki hinei maku fitu e povi tane, mo e fitu e mamoe tane.

30 Ti eke e Palako tuga ne tala atu ai e Palaamo, mo e eke ai e tau povi tane, mo e tau mamoe tane mo poa, ne takitaha ai ki luga he tau fatapoa.