Numera

6 KUA vagahau mai foki a Iehova kia Mose, kua pehe mai,

2 Kia vagahau atu a koe ke he fanau a Isaraela, ti pehe atu a koe kia lautolu, Ko e tane po ke fifine kua vevehe kehe e ia a ia ke omonuo ke he omonuo he naseri, ke vevehe kehe e ia a ia ma Iehova;

3 Kia tapu ni kia ia e uaina mo e kava, aua neke inu e ia e vineta kua eke ke he uaina, mo e vineta kua eke ke he kava, aua neke inu foki e ia e puke he tau fua vine, ti ua kai foki e ia e tau fua vine ko e tau fua mata po ke tau fua kua tavaki.

4 Ko e tau aho oti hana ne vevehe kehe a ia aua neke kai ai e ia ha mena taha kua eke ke he vine kua eke aki e uaina, ko e tau tega ni katoa mo e kili.

5 Ko e tau aho oti he hana omonuo ke eke ai a ia mo naseri nakai ni hoko ha tafi ke he hana ulu; to tapu ni a ia, ato katoatoa ai e tau po kua vevehe kehe e ia a ia ma Iehova, kia toka ai hana lauulu ke tupu.

6 Aua neke fina atu a ia ke he tagata mate, ke he tau aho oti he hana vevehe kehe ai ma Iehova.

7 Aua neke mokamoka a ia ha ko e hana matua tane, po ke hana matua fifine, po ke hana matakainaga po ke hana mahakitaga ka mamate a lautolu; ha ko e mena ha i luga hana ulu e foupāpā he hana Atua.

8 Ko e tau aho oti kua eke ai a ia mo naseri kua tapu ni a ia ma Iehova.

9 Kaeke foki ke mate teia taha tagata ke he hana tapa, ti kelea ai hana ulu kua fakatapu, ti hifipuga ai e ia hana ulu ke he aho he hana fakameaaga, ko e aho fitu ke hifipuga ai a ia.

10 Ti ta mai foki e ia ke he aho valu ua e kulukulu, po ke ua e punua lupe ke he ekepoa ke he gutuhala he fale uta fano he tutuutaaga;

11 Ti eke ai he ekepoa ia, ko e taha ke eke mo poa ha ko e hala, mo e taha ke eke mo poa huhunu, ti eke e ia e lukutoto māna, ha ko e mena hala a ia ha ko e tagata mate, ti fakatapu foki e ia hana ulu ke he aho ia ni.

12 Ti fakatapu ai e ia ma Iehova e tau aho kua eke ai a ia mo Naseri, ti ta mai foki e ia e punua mamoe tau taha ke eke mo poa ha ko e hehe; ka ko e tau po fakamua nakai totou ia ha kua kelea hana naseri.

13 Ko e fakatufono hanai he naseri, ko e aho ke katoa ai e tau po he hana eke mo naseri to ta mai ai a ia ke he gutuhala he fale uta fano he tutuutaga.

14 Ti ta mai ai e ia hana poa kia Iehova ko e taha punua mamoe tane, tau taha, kua katoatoa e mitaki, ke eke mo poa huhunu; ti taha punua mamoe fifine tau taha, kua katoatoa e mitaki, ke eke mo poa ha ko e hala; ti taha foki e mamoe tane ke eke mo poa fakaaue;

15 Ko e kato foki he tau areto nakai fakaea, ko e tau areto pukupuku foki he falaoa mitaki kua laku mo e puke lolo, mo e tau areto aleale nakai fakaea kua takai aki he lolo, ko e ha lautolu a tau poa mena kai foki, mo e ha lautolu a tau poa inu.

16 Ti ta mai ai he ekepoa ia ki mua a Iehova, to eke ai foki e ia hana poa ha ko e hala, mo e hana poa huhunu;

17 Ti eke ai e ia e poa fakaaue kia Iehova ke he mamoe tane, fakalataha mo e kato he tau areto nakai fakaea; ti eke ai foki he ekepoa hana tau poa mena kai, mo e hana tau poa inu.

18 Ti hifi puga ai he naseri hana ulu he naseri ke he gutuhala he fale uta fano he tutuutaga, ti uta ai e ia e lauulu he hana ulu he naseri, mo e tuku ai ke he afi ha i lalo he poa fakaaue.

19 Ti uta ai he ekepoa e lima he mamoe tane kua tunu, mo e taha he tau areto pukupuku nakai fakaea mai he kato, mo e taha he tau areto aleale nakai fakaea, ti tuku ai ke he tau aloalolima he naseri, ka kua oti he hifipuga hana ulu he naseri.

20 Ti lialiaki ai he ekepoa ia, ko e poa lialiaki haia ki mua a Iehova; ko e mena tapu haia ma e ekepoa, mo e fatafata kua lialiaki, katoa mo e lima kua nikiti, kua mole ia ti maeke ni he naseri ke inu uaina.

21 Ko e fakatufono hana he naseri kua omonuo, mo e hana poa kia Iehova ha ko e hana vevehe kehe, ti lafi e ia ke he tau mena na e mena ke moua ai e ia; tuga ni hana omonua ne omonuo ai e ia, kia eke pihia ni e ia, ke lata ai mo e omonuo he hana vevehe kehe.

22 Kua vagahau mai foki a Iehova kia Mose, kua pehe mai,

23 Kia vagahau atu a koe kia Arona, mo e hana tau tama tane, pehe, Kia pehenai ha mutolu a fakamonuina ke he fanau a Isaraela, kia pehe atu kia lautolu.

24 Kia fakamonuina e Iehova a koe, mo e leveki e ia a koe;

25 Kia fakakikila e Iehova hana fofoga ki luga ia koe, mo e fakaalofa atu a ia kia koe;

26 Kia haga mai e Iehova hana fofoga kia koe, mo e tuku atu ai e ia kia koe e monuina.

27 To talahau atu ai e lautolu haku a higoa ki luga he fanau a Isaraela; ko au foki to fakamonuina atu e au a lautolu.