Kenese

5 KO e tohi hanai he tau hau a Atamu. Ko e aho ne eke ai he Atua e tagata, ne eke ai e ia kua fakatai ke he Atua.

2 Ne eke e ia a laua ko e tane mo e fifine; ko e aho ne eke ai e ia a laua, ne fakamonuina foki e ia a laua, mo e ui ai ha laua a higoa ko Atamu.

3 Ne moui a Atamu e tau tau ne taha e teau ti tolugofulu, ti fanau ai e ia hana tama tuga a ia, mo e fakatai kia ia; ti ui ai e ia hana higoa, ko Setu.

4 Ko e tau aho foki a Atamu tali mai he fanau e ia a Setu, ko e valu e teau ia he tau tau; ne fanau foki e tau tama tane, moe e tau tama fifine.

5 Ti ko e katoatoa he tau aho ne moui ai a Atamu, ko e hiva e teau ia he tau tau, ti tolugofulu e tau tau; ti mate ai a ia.

6 Ne moui a Setu e tau tau taha ni e teau ma lima, ti fanau ai e ia a Enosa.

7 Ko e mouiaga a Setu tali he fanau e ia a Enosa, ko e valu e teau ia he tau tau ti fitu e tau; ne fanau foki e ia e tau tama tane mo e tau tama fifine.

8 Ti ko e katoatoa he tau aho a Setu, ko e hiva e teau ia he tau tau, ti hogofulu ma ua e tau; ti mate ai a ia.

9 Ne moui a Enosa hivagofulu he tau tau, ti fanau ai e ia a Kainano;

10 Ko e mouiaga foki a Enosa tali he fanau e ia a Kainano, ko e valu e teau ia he tau tau, ti hogofulu ma lima e tau; ne fanau foki e ia e tau tama tane mo e tau tama fifine.

11 Ti ko e katoatoa he tau aho a Enosa ko e hiva e teau ia he tau tau, ti lima ni e tau; ti mate ai a ia.

12 Ne moui a Kainano fitu gofulu e tau tau, ti fanau ai e ia a Maalaelu;

13 Ko e mouiaga foki a Kainano tali he fanau e ia a Maalaelu, ko e valu teau ia he tau tau, ti fagofulu e tau; ne fanau foki e ia e tau tama tane mo e tau tama fifine.

14 Ti ko e katoatoa he tau aho a Kainano ko e hiva e teau ia he tau tau, ti hogofulu ni e tau; ti mate ai a ia.

15 Ne moui a Maalaelu ke he tau tau ne ono gofulu ma lima, ti fanau ai e ia a Iareto;

16 Ko e mouiaga foki a Maalaelu tali he fanau e ia a Iareto, ko e valu e teau ia he tau tau, ti tolugofulu e tau tau; ne fanau foki e ia e tau tama tane mo e tau tama fifine.

17 Ti ko e katoatoa he tau aho a Maalaelu, ko e valu e teau ia he tau tau, ti hivagofulu ma lima e tau; ti mate ai a ia.

18 Ne moui a Iareto ke he tau tau ne taha teau mo e onogofulu, ti ua ni e tau, ti fanau ai e ia a Enoka;

19 Ko e mouiaga foki a Iareto tali he fanau e ia a Enoka, ko e valu e teau ia he tau tau; ne fanau foki e ia e tau tama tane mo e tau tama fifine.

20 Ti ko e katoatoa he tau aho a Iareto, ko e hiva e teau ia he tau tau, ti onogofulu ma ua e tau; ti mate ai a ia;

21 Ne moui a Enoka ke he tau tau onogofulu ma lima, ti fanau ai e ia a Metusela.

22 Ne o fano foki a Enoka mo e Atua tali he fanau e ia a Metusela, tolu ni e teau he tau tau; ne fanau foki e ia e tau tama tane mo e tau tama fifine.

23 Ti ko e katoatoa he tau aho a Enoka, ko e tolu e teau ia he tau tau, ti onogofulu me lima e tau;

24 Ne o fano foki a Enoka mo e Atua; kua nakai kitia foki a ia, ha kua uta tuai he Atua a ia.

25 Ne moui a Metusela ke he tau tau taha e teau mo e valugofulu, ti fitu ni e tau, ti fanau ai e ia a Lameko;

26 Ko e mouiaga foki a Metusela tali he fanau e ia a Lameko, ko e fitu e teau ia he tau tau, ti valugofulu ma ua e tau; ne fanau foki e ia e tau tama tane mo e tau tama fifine.

27 Ti ko e katoatoa he tau aho a Metusela, ko e hiva e teau ia he tau tau, ti onogofulu ma hiva e tau; ti mate ai a ia.

28 Ne moui a Lameko ke he tau tau taha e teau, mo e valugofulu, ti ua ni e tau, ti fanau ai e ia e tama tane;

29 Ti ui ai e ia hana higoa ko Noa, kua pehe, To fakamafanatia e ia a tautolu ke he ha tautolu a tau gahua moe e mamahi he tau lima ha tautolu, ha ko e kelekele kua fakamalaia e Iehova.

30 Ko e mouiaga a Lameko tali he fanau e ia a Noa, ko e lima e teau ia he tau tau, ti hivagofulu ma lima e tau; ne fanau foki e ia e tau tama tane mo e tau tama fifine.

31 Ti ko e katoatoa he tau aho a Lameko, ko e fitu e teau ia he tau tau, ti fitugofulu ma fitu e tau; ti mate ai a ia.

32 Kua hoko ke he lima e teau he tau tau a Noa; ti fanau ai e Noa a Semu, mo Hamo, mo Iafeta.