Tau Salamo

11 KUA falanaki au kia Iehova, kua tala mai fefe a mutolu kia au, Kia hola ā tuga ne manu lele ke he ha mutolu a mouga?

2 Ha ko e mena, kitiala, ko lautolu kua mahani kelea kua maloku ha lautolu a kaufana, mo e tuku e fana ke he filo, kia fana fufu kia lautolu kua loto tonu.

3 Ha kua ulu e tau fakaveaga; to maeke fefe ke he tagata tututonu ha mena ka eke?

4 Ha ha he hana faituga tapu a Iehova, ha ha he lagi e nofoaiki a Iehova; kua kitekite mai hana na fofoga, kua kamatamata e fanau he tagata he hana tau tuamata.

5 To kamatamata e Iehova a ia ne tututonu; ka kua vihiatia he hana finagalo e tagata ne mahani kelea, katoa mo ia kua fiafia ke he favale.

6 To fakato mai e ia poke uha ki luga he tau tagata mahani kelea e tau hele, ko e afi mo e taio, mo e matagi ke huhunu ai; ko e puke haia he kapiniu ha lautolu.

7 Ha kua tututonu a Iehova, to fiafia a ia ke he tututonu; kua kitekite hana na fofoga kia ia ne mahani hakohako.