Tau Fakafili

10 KUA mole atu a Apimeleko ti tu mai ai ke fakamoui a Isaraela a Tulaga ko e tama tane a Pua, ko e tama a Toto, ko e tagata Isakara, kua nofo a ia i Samira ke he mouga ko Efaraimo.

2 Ne fakafili ai e ia a Isaraela ke he tau tau ne uafulu ma tolu, ti mate a ia, kua tanu ai a ia i Samira.

3 Kua mole atu a ia ti tu mai ai a Iairo ko e tagata Kiliata; ti fakafili ai e ia a Isaraela ke he tau tau ne uafulu ma ua.

4 Ne tokotolugofulu e tama tane hana, kua heke ai e lautolu e tau asini tolugofulu; ha ha ia lautolu e tau maga ne tolugofulu, kua ui ai a lautolu ko Havotaiairo kua hoko mai ke he aho nai, ha ha he kelekele a Kiliata.

5 Kua mate a Iairo, ti tanu ai a ia i Kamoni.

6 Ti liu foki mahani kelea ai e fanau a Isaraela ki mua a Iehova, kua fekafekau a lautolu kia Paala, mo Asaira, mo e tau atua a Suria, mo e tau atua a Saitonu, mo e tau atua a Moapi, mo e tau atua he fanau a Amoni, mo e tau atua he tau tagata Filisitia; ka e tiaki e lautolu a Iehova, ti nakai fekafekau a lautolu kia ia.

7 Ti ita lahi ai a Iehova kia Isaraela, ti tuku atu e ia a lautolu ke he lima he tau tagata Filisitia, mo e lima he fanau a Amoni.

8 Ne fakamamahi atu e lautolu mo e tukimakaefu ai e lautolu ke he fanau a Isaraela ke he vaha ia, tokai ko e hogofulu ma valu e tau, ko e fanau a Isaraela oti ha ha he fahi atu a Ioritana ke he motu he tau tagata Amori i Kiliata.

9 Ti laka atu e fanau a Amoni a Ioritana, ke tau a lautolu mo Iuta, mo Peniamina, mo e magafaoa a Efaraimo; ti matematekelea lahi ni a lautolu.

10 Ti tagi atu ai e fanau a Isaraela kia Iehova, kua pehe atu, Kua hala a mautolu kia koe, ha kua tiaki e mautolu ha mautolu a Atua, ka e fekafekau a mautolu kia Paala.

11 Ti pehe mai ai a Iehova ke he fanau a Isaraela, Nakai kia fakamoui e au a mutolu mai Aikupito, mo e tau tagata Amori, mo e fanau a Amoni, mo e tau tagata Filisitia;

12 Mo e tau tagata Saitonu, mo Amaleka, mo Meona, ne favale atu a lautolu kia mutolu, ti tagi mai ai a mutolu kia au, ti fakamoui e au a mutolu mai he lima ha lautolu.

13 Ka ko mutolu, kua tiaki e mutolu au, mo e fekafekau ai a mutolu ke he tau atua kehe; ko e mena ia nakai liu fakamoui e au a mutolu.

14 Kia o a a mutolu, ti tauui atu ke he tau atua kua loto ki ai a mutolu, kia fakamoui ai e lautolu a mutolu ke he vaha kua matematekelea ai a mutolu.

15 Ti pehe atu ai e fanau a Isaraela kia Iehova, Kua hala tuai a mautolu, kia eke e koe kia mautolu e tau mena oti kua finagalo a koe ki ai; ka e laveaki mai e koe a mautolu ke he aho nai.

16 Ti tuku kehe e lautolu e tau atua kehe ha ha ia lautolu, mo e fekafekau ai a lautolu kia Iehova; ti hukia ai hana finagalo ha ko e mamahi a Isaraela.

17 Kua tolotolo mai ai e fanau a Amoni, mo e he api ai a lautolu i Kiliata; ti fakapotopoto ai e fanau a Isaraela, ti he api ai a lautolu i Misepa.

18 Ti pehe age e motu, ko e tau iki i Kiliata ko e taha ke he taha, Ko hai kia e tagata ke kamata ai e tau mo e fanau a Amoni? to eke ni a ia mo iki ne mua kia lautolu oti kua nonofo i Kiliata.