Tau Salamo

136 KIA fakaheke a mutolu kia Iehova, ha kua mitaki ni a ia; ha ko e mena tukulagi ni hana fakaalofa.

2 Fakaheke atu a mutolu ke he Atua he tau atua; ha ko e mena tukulagi ni hana fakaalofa.

3 Fakaheke a mutolu ke he Iki he tau iki; ha ko e mena tukulagi ni hana fakaalofa.

4 Ko ia hokoia ni ne eke e tau mana lalahi; ha ko e mena tukulagi ni hana fakaalofa.

5 Ko ia ne eke e lagi ke he iloilo; ha ko e mena tukulagi ni hana fakaalofa.

6 Ko ia ne fofola e lalolagi ki luga he vai; ha ko e mena tukulagi ni hana fakaalofa.

7 Ko ia ne eke e tau maama lalahi; ha ko e mena tukulagi ni hana fakaalofa;

8 Ko e la ke pule ke he aho; ha ko e mena tukulagi ni hana fakaalofa;

9 Ko e mahina mo e tau fetu ke pule ke he po; ha ko e mena tukulagi ni hana fakaalofa.

10 Ko ia ne keli Aikupito ko e tau tama uluaki ha lautolu; ha ko e mena tukulagi ni hana fakaalofa;

11 Ko ia ne uta a Isaraela mai ia lautolu; ha ko e mena tukulagi ni hana fakaalofa;

12 Ke he lima malolo, mo e lima fakaolo; ha ko e mena tukulagi ni hana fakaalofa.

13 Ko ia ne vevehe e Tahi Kula ke he tau veveheaga; ha ko e mena tukulagi ni hana fakaalofa;

14 Ti takitaki age ai a Isaraela ke he vaha loto; ha ko e mena tukulagi ni hana fakaalofa;

15 Ka kua tiaki e ia a Farao mo e hana kau ke he Tahi Kula; ha ko e mena tukulagi ni hana fakaalofa.

16 Ko ia ne takitaki hana motu ke he tutakale; ha ko e mena tukulagi ni hana fakaalofa.

17 Ko ia ne keli e tau patuiki lalahi; ha ko e mena tukulagi ni hana fakaalofa.

18 Ti kelipopo foki e tau patuiki lilifu; ha ko e mena tukulagi ni hana fakaalofa;

19 Ko Sikono ko e patuiki he faoa a Amori; ha ko e mena tukulagi ni hana fakalofa.

20 Ko Oko foki ko e patuiki a Vasana; ha ko e mena tukulagi ni hana fakaalofa.

21 Ne āge foki e ia ha lautolu a kelekele ke eke mo fonua; ha ko e mena tukulagi ni hana fakaalofa;

22 Ko e fonua ni ma Isaraela hana fekafekau; ha ko e mena tukulagi ni hana fakaalofa.

23 Ko ia ne manatu a tautolu ka kua takaveli a tautolu; ha ko e mena tukulagi ni hana fakaalofa;

24 Ti laveaki foki e ia a tautolu mai ia lautolu kua fai fi kia tautolu; ha ko e mena tukulagi ni hana fakaalofa.

25 Ko ia ne foaki mena kai ke he tau mena momoui oti kana; ha ko e mena tukulagi ni hana fakaalofa.

26 Kia fakaheke atu a mutolu ke he Atua he lagi; ha ko e mena tukulagi ni hana fakaalofa.